lo se mànci te màkfa pe la .oz.

sei la'o gy. L. Frank Baum .gy finti
sei la selpa'i cu fanva






ni'o ni'o pa mo'o
lo vilcarbì'e

ni'o la .dorotis. cu xabju lo midju be lo ganra sastu'a pe la .kanzas. fi'o kansa la nakfamti .xenris. ku noi te cange ku'o .e la fetfamti .em. ku noi speni lo te cange .i lo zdani cu cmalu ki'u lo nu lo mudri poi zy ke'a zilzba cu jai sarcu fai lo ka lo carce cu bevri ce'u ve'a lo minli be li so'i .i zy se pagbu lo vo bitmu .e lo loldi .e lo drudi vu'o noi sumji fa lo pa kumfa .i ky vasru lo furtirse se jvinu toknu .e lo kajnyta'e be lo palta be'o .e lo jubme .e lo ci ji'i vo stizu .e lo ckana .i la nakfamti .xenris. jo'u la fetfamti .em. cu ponse lo barda ckana be bu'u pa lo kojna .i je la .dorotis. cu go'i lo cmalu ckana be bu'u lo drata kojna .i zasti fa no sai drusro .e no lolnitku'a po'u na'e bo lo cmalu kevna poi pu te kakpa lo loldi zi'e poi se cmene «lu vilcarbi'e lolnitku'a li'u» noi lo lanzu ka'e klama la'e ke'a va'o lo nu pa lo barda carbi'e cu tolcanci fau lo nu tsali banzu lo nu da'i marxa ro lo dinju pe lo ra ve muvdu .i pluta lo kevna fo lo lolvro be bu'u lo loldi midju be'o poi lo rajyserti cu cnita ve klama lo cmalu je manku kevna

  

ni'o la .dorotis. ca lo nu sanli bu'u lo zdani vorme gi'e ru'u catlu cu ka'e viska fa'a ro da no na'e bo lo ganra je grusi sastu'a .i je no tricu .e no zdani cu zvati lo ganra je pinta tumla poi kuspe lo korbi be lo tsani bu'u ro lo farna .i lo solri nu glare cu ba'o rinka lo nu lo se plixa tumla cu binxo lo grusi pesxu poi se fenra lo cmalu .i lo srasu ku ji'a sai na crino .i ki'u bo lo solgu'i cu ba'o jelgau lo jipno be lo clani srasu co'u lo nu sy cu skari lo mintu grusi se skari poi se viska bu'u ro da .i pa roi ku lo zdani cu pu se cintypu'i .i ku'i lo solri cu gasnu lo nu lo cinta cu vasru lo varboi .i je lo carvi cu lumci vimcu .i je ca ku lo zdani cu kandi gi'e grusi vau du'i tu'a ro drata
 

ni'o la .em. ca lo nu klama ti te zu'e lo nu bu'u xabju cu citno je melbi speni .i lo solri jo'u lo brife cu cnegau .ebu ji'a .i crigau lo kanla lo ka carmi kei ja'e lo nu lo kanla cu sampu grusi .i crigau lo molmla .e lo ctebi lo ka xunre kei ja'e lo nu grusi fa vo'e ji'a .i .ebu cinla gi'e ca no roi cisma .i ca lo nu la .dorotis. noi rircau cu pa re'u klama .ebu kei .ebu tai se spaji lo nu cmila pe lo verba ja'e lo nu krixa gi'e da'ergau lo xance lo risna ca ro nu tirna lo gleki voksa be la .dorotis. .i .ebu za'o catlu lo cmalu nixli fau lo nu manci lo nu zasti fa da poi jai mu'i cmila fai ny


ni'o la nakfamti .xenris. cu no roi cmila .i xy to'e lazni gunka co'a lo cerni co'u lo nicte gi'e na djuno lo du'u lo si'o gleki cu mo kau .i xy ji'a cu grusi fe'e co'a lo ri clani xejykre fe'e co'u lo rufsu cutci gi'e se jvinu lo jursa .e lo junri gi'e so'u roi tavla

ni'o du la .totos. fa lo jai gau cmila be fai la .dorotis. .i ty boi dy nurgau lo nu binxo lo grusi dunli be lo drata vanbi .i la .totos. na grusi .i ty cmalu ke xekri gerku gi'e se kerfa lo clani ke silka simlu gi'e se kanla lo cmalu xekri poi gleki kalga'osli bu'u lo re mlana be lo xajmi je cmatce nazbi .i la .totos. cu kelci ze'a lo mulno djedi .i je la .dorotis. cu kelkansa gi'e mutce lo ka se dirba ty

ni'o ku'i ca lo cabdei cu na kelci .i la nakfamti .xenris. cu zutse lo vorme serti gi'e xanka catlu lo tsani noi grusi ba'e zmadu lo fadni .i la .dorotis. cu sanli bu'u lo vorme fau lo nu jgari la .totos. lo birka kei gi'e si'a catlu lo tsani .i la fetfamti .em. ca'o lumci lo palta


ni'o ra'i lo darno berti cu tirna lo dizlo tonga se patcmo pe lo brife .i je la nakfamti .xenris. .e la .dorotis. cu viska lo nu lo srasu cu se krori'a lo jbibi'o vilti'a tai tu'a lo boxna .i ba bo lo kinli nu siclu bu'u lo vacri ra'i lo snanu cu cfari .i je lo re da ca lo nu fa'a catlu cu viska lo cmalu boxna be lo srasu bei ra'i lo di'u farna ku ji'a

ni'o ca bo suksa fa lo nu la nakfamti .xenris. cu sa'irbi'o

ni'o «lu lo vilcarbi'e ti muvdu doi .em. —sei xy fi lo speni cu cladu cusku— .i mi ba kurji lo danlu li'u» .i ba bo bajra fa'a lo ta'ozda noi lo bakni jo'u lo xirma cu se setca fi ke'a

ni'o la fetfamti .em. cu co'u gunka gi'e klama lo vorme .i .ebu ca lo nu ze'i pa re'u catlu cu djuno lo du'u ma kau ckape


ni'o «lu ko sutra doi .dorotis. —sei .ebu krixa— .i ko bajykla lo lolnitku'a li'u»

ni'o la .totos. cu plipe fi lo birka be dy gi'e sezyselmragau ni'a lo ckana .i je lo nixli cu co'a cpacu klama .i la fetfamti .em. fau lo nu terpa mutce cu kargau lo lolvro be bu'u lo loldi gi'e fa'a ni'a cpare lo rajyserti se ka'a lo cmalu je manku kevna .i la .dorotis. cu ro mai kavbu la .totos. gi'e co'a jersi lo fetfamti .i ca lo nu ba'o xadba pagre lo kumfa cu se sance lo cladu savru fa lo brife .i je lo zdani cu tai rufsu slilu ja'e lo nu dy gau co'u sanli gi'e jai suksa fai lo ka tsebi'o lo loldi


ni'o ba bo lo cizra cu fasnu

ni'o lo zdani cu re ji'i ci roi carna gi'e masno lo ka galze'a pa'o lo vacri .i la .dorotis. cu cinmo lo simsa be lo ka galze'a fau lo nu nenri lo vartisyboi

ni'o lo berti fa'u snanu brife cu pensi'u lo stuzi be lo zdani ja'e lo nu zy binxo lo satci midju be lo vilcarbi'e .i bu'u lo midju be lo vilcarbi'e lo vacri cu ta'e bifcau .i ku'i lo barda ni lo brife cu danre bu'u ro lo mlana be lo zdani cu rinka lo nu lo zdani cu zenba je zenba lo ka galtu kei co'u lo nu zvati lo prane galraipau be lo vilcarbi'e .i je stali gy gi'e to'o se bevri ve'a lo minli be li so'i se kai lo ka frili dunli lo nu bevri lo pimlu

ni'o mutce lo ka manku .i je lo brife cu mabla cmoni ru'u la .dorotis. .i ku'i dy co'a sanji lo du'u se marce se frili .i ba lo pa moi be lo su'o mei co nu ru'u carna .e lo pa drata jai ca nu lo zdani cu mutce lo ka mlapau carna cu cinmo lo ka toljursa se sligau tai tu'a lo cifnu pe bu'u lo slicka


ni'o la .totos. na nelci .i bajra ru'u bu'u lo kumfa fau lo nu zvati nu'i ge ca pa da ti nu'u gi ca pa de ta nu'u fau lo nu cladu cmoni .i ku'i la .dorotis. cu smaji zutse lo loldi gi'e denpa te zu'e lo nu zgana lo da'i ba fasnu

 

ni'o pa roi ku la .totos. cu binxo lo dukse be lo ka jibni lo kalri lolvro kei gi'e pa'o farlu .i pa mai lo cmalu nixli cu jinvi lo du'u ba'o cirko ty .i ku'i ba zi viska lo nu pa lo kerlo cu pagre lo vorme .i ki'u bo lo barda ni danre pe lo vacri cu stogau ty lo ka galtu kei ja'e lo nu na ka'e farlu .i ny cpare fi lo vorme gi'e co'a jgari la .totos. fo lo kerlo gi'e lacpu ty fa'a lo nenri be lo kumfa gi'e ba bo ga'orgau lo lolvro te zu'e lo nu no se jmina snuti ka'e fasnu

ni'o so'i lo cacra cu se fanmo .i je masno fa lo nu la .dorotis. cu binxo lo ka co'u terpa .i ku'i dy cinmo lo ka sepcni mutce .i je lo brife cu tai cladu se sance ja'e lo nu dy na ru'e binxo lo tinynalka'e .i ca lo cfari dy kucli lo du'u xu kau dy ba se marxa ja'e lo so'i spisa va'o lo nu lo zdani cu di'a farlu .i ku'i fau lo nu lo cacra cu se fanmo .e lo nu no xlatce cu fasnu kei dy co'u xanka gi'e jdice lo nu smacni denpa gi'e facki lo du'u lo balvi cu mo kau .i ro mai dy cpare lo desku loldi lo vo'a ckana gi'e vrebi'o lo gapru .i je la .totos. cu jersi gi'e vrebi'o lo jibni be dy

ni'o to'e ki'u nai lo nu lo zdani cu slilu .e lo nu savru se sance fa lo brife kei la .dorotis. cu ba zi ga'orgau lo kanla gi'e sipybi'o





lo se mànci te màkfa pe la .oz.

ni'o ni'o re mo'o
lo nu pènmi lo màxpre

ni'o la .dorotis. cu se cikyri'a lo jenca poi tai suksa gi'e tai jursa vau ja'e lo nu da'i la .dorotis. va'o lo nu na cpana lo ranti ckana cu se xrani .i da'i nai lo jenca cu rinka lo nu dy cu barda vasxu gi'e kucli lo du'u ma kau pu fasnu .i je la .totos. cu punji lo ri lenku ke cmalu nazbi lo flira be dy gi'e badri patcmo .i la .dorotis. cu tsebi'o gi'e sajbi'o lo nu ge nai lo zdani cu muvdu gi na'e manku ki'u lo carmi solgu'i cu pagre lo canko fau lo nu culgau lo cmalu kumfa .i dy plipe fi lo ri ckana gi'e bajra fau lo nu la .totos. cu jibni jersi kei gi'e kargau lo vorme
 

ni'o lo cmalu nixli cu manci krixa gi'e ru'u catlu fau lo nu lo kanla cu banro je banro se ja'e lo nu viska lo tai se manci


ni'o lo vilcarbi'e pu toljursa mutce punji (to ma'i lo vilcarbi'e toi) lo zdani lo midju be lo se manci melbi gugde .i zvati fa lo kukte sastu'a pe lo melbi tricu poi se dandu lo ricfu je kukte grute .i lo foldi be lo mlecai xrula cu zvati ro lo mlana .i je lo cipni pe lo rirci je carmi pimlu cu sanga gi'e na'irsutyvoi ne'i lo tricu .e lo demspa .i va lo tordu milxe da cmalu rirxe gi'e muvdu je mircai pagre lo jbini be lo crino sastu'a gi'e kandi bacru se pi'o lo voksa poi mutce lo ka jai te ckire fi lo cmalu nixli poi xabju ze'a lo tai clani lo sudga je grusi sastu'a


ni'o la .dorotis. ca lo nu ca'o kucli catlu lo cizra joi melbi vanbi cu co'a sanji lo poi fa'a dy klama ku'o gunma be lo cizrai be lo ro prenu poi dy ke'a ba'o viska .i lo prenu cu cmamau lo makcu poi dy ke'a se slabu .i ku'i ji'a na mutce lo ka cmalu .i je'u py simlu lo ka cladu'i la .dorotis. ku noi banro sutra ma'i lo na'asmi verba kei gi'e ku'i jvinu simlu lo ka na'azma dy li so'i

ni'o gunma lo ci nanmu .e lo pa ninmu .i je ro se go'i cu dasni lo cizra .i dasni lo cukla mapku poi konju fi lo cmalu poi gutci li pa lo ni gapru lo stedu ku'o ku'o zi'e pe lo mapku sruri ke cmalu janbe poi jabyselsna lo titla ca lo nu muvdu .i lo mapku pe lo nanmu cu blanu .i je lo mapku pe lo cmalu ninmu cu blabi .i je ny cu dasni lo blabi pastu poi cinje dandu lo janco .i py se barna lo so'i tarci poi carmi bu'u lo solgu'i tai tu'a lo tabjme .i lo nanmu cu dasni lo blanu pe lo mintu selskalei pe lo mapku gi'e dasni lo xamgu se spali cutci poi lo blanu bolci cu jorne ke'a lo jipno .i lo nanmu (to la .dorotis. cu jinvi toi) cu kaijbi lo ka dunli la nakfamti .xenris. lo ka tolci'o .i ki'u bo re lo nanmu cu se xejykre .i ku'i lo cmalu ke tolci'o ninmu cu ju'o sai tolci'o zmadu mutce .i lo flira be ny cu se gacri lo cinje .i lo kerfa be ny cu na ru'e blabi .i je ny cu tinsa nalmli cadzu

ni'o lo bi'u nai prenu ca lo nu jbibi'o lo zdani noi la .dorotis. cu sanli lo ke'a vorme cu klasti gi'e lauble casnu vau tai lo nu terpa lo nu zenba lo ka jibni .i ku'i lo cmalu ke tolci'o ninmu cu klama la .dorotis. gi'e krobi'o rinsa gi'e cusku se pi'o lo titla voksa


ni'o «lu do zanvi'e doi nobli te makfa lo gugde be la maxpre .i mi'a do tai ckire lo nu do ba'o catra la palci termafyfe'i pe la stuna kei .e lo nu tolpifygau lo mi'a se gugde li'u»


ni'o la .dorotis. cu tinju'i lo se cusku fau lo nu se cfipu .i ki'u ma lo cmalu ninmu cu te cmene dy «lu te makfa li'u» gi'e xusra lo du'u dy catra la palci termafyfe'i pe la stuna .i la .dorotis. cu zernalfu'e je nalckape ke cmalu nixli gi'e se bevri lo vilcarbi'e ve'a lo minli be li so'i .i je ze'a pi ro lo nunji'e dy no roi catra da


ni'o ku'i lo cmalu ninmu cu za'a kanpe lo nu dy cu spuda .i se ki'u bo la .dorotis. se cau lo nu denpa cu cusku «lu do mutce lo ka xendo .i ku'i ju'o da se srera .i mi no da catra li'u»

ni'o «lu se ju lo do zdani cu co'e —sei lo cmalu ke tolci'o ninmu fau lo nu cisma cu cusku— .i je la'e di'u mintu .i ko catlu —sei ny fau lo nu degja'o lo kojna be lo zdani cu di'a co'e— .i lo re jamfu be ty cu za'o bancu fi lo cnita be lo mudri bliku li'u»


ni'o la .dorotis. cu catlu gi'e krixa co terpa .i je'u va ku lo cnita be lo kojna be lo barda kamju poi lo zdani cu se sarji ke'a cu krasi lo re jamfu poi dasni lo rijno cutci pe lo kinli crapau

ni'o «lu ii ii —sei la .dorotis. cu terpa krixa be fau lo nu xance jalsimgau— .i ju'o lo zdani pu farlu ta .i .ei mi'o mo li'u»


ni'o «lu no da se bilga —sei lo cmalu ninmu cu nalselra'u cusku— li'u»


ni'o «lu ku'i ta mo —sei la .dorotis. cu retsku— li'u»


ni'o «lu ke'u ta me la palci te makfa pe la stuna —sei lo cmalu ninmu cu spusku— .i se pinfu ro la maxpre ze'a lo nanca be li so'i fau lo nu la maxpre cu selfu ze'a lo nicte jo'u lo donri .i ca ku ro la maxpre cu zifre gi'e ckire do lo nu xagzu'e li'u»


ni'o «lu la maxpre cu mo —sei la .dorotis. cu te preti— li'u»


ni'o «lu my se gugde lo vi gugde pe la stuna ge'u noi la palci termafyfe'i pu turni li'u»


ni'o «lu xu do maxpre —sei la .dorotis. cu retsku— li'u»


ni'o «lu na go'i .i ku'i mi pendo my to'e ki'u nai lo nu mi xabju lo gugde pe la berti .i la maxpre ca lo nu viska lo nu lo te makfa pe la stuna cu morsi cu benji lo notybei mi .i je mi klama zi .i mi'e la te makfa pe la berti li'u»


ni'o «lu ue sai —sei la .dorotis. cu krixa— .i xu do jetnu termafyfe'i li'u»


ni'o «lu je'u go'i —sei lo cmalu ninmu cu spusku— .i ku'i mi vrude termafyfe'i .i je lo prenu mi prami .i mi vlipa mleca la palci termafyfe'i ku poi vi turni .i se va'o nai bo da'i ba'e mi pu tolpifygau lo prenu li'u»


ni'o «lu ku'i mi pu sruma lo du'u ro termafyfe'i cu palci —sei lo nixli noi xadba terpa lo nu jikca lo jetnu termafyfe'i cu cusku— li'u» .i «lu la'e di'u se srera .i pu zasti fa lo vo po'o termafyfe'i bu'u lo mulno gugde pe la .oz .i re boi ty poi xabju la berti fa'u la snanu cu vrude termafyfe'i .i mi djuno lo du'u jetnu kei ki'u lo nu mi me lo vo mei .i lo xabju be la stuna be'o .e lo xabju be la stici cu je'u palci termafyfe'i .i ku'i ca lo cabna poi nu do ba'o catra pa boi ty cu zvati lo mulno gugde pe la .oz. fa pa po'o palci termafyfe'i no'u la xabju be la stici li'u»


ni'o «lu ku'i —sei la .dorotis. ba lo nu ze'i pensi cu cusku— la fetfamti .em. mi pu jungau lo du'u lo ro termafyfe'i cu mrobi'o pu za lo nanca be li so'i so'i li'u»


ni'o «lu la fetfamti .em. cu mo —sei lo cmalu ke tolci'o ninmu cu te preti— li'u»


ni'o «lu .ebu fetfamti mi gi'e xabju la .kanzas. ku noi mi pu klama fi ke'a li'u»


ni'o la termafyfe'i pe la berti cu simlu lo ka ze'a pensi kei fau lo nu lo vo'a stedu cu nitsalpo joi lo nu lo kanla cu se farna lo loldi .i ba bo ty cu fa'a ga'u catlu gi'e cusku «lu mi na djuno lo du'u ma kau stuzi la .kanzas .i ki'u bo mi pu no roi tirna lo nu lo bi'u nai gugde cu te tavla .i ku'i ko mi jungau .i xu ky cu lujyklu gugde li'u»


ni'o «lu ja'a go'i —sei la .dorotis. cu spusku— li'u»


ni'o «lu ja'o la'e di'u krinu .i ia bu'u lo lujyklu gugde no termafyfe'i cu za'o jmive .i je nai su'o mafcre .a su'o mafpli .a su'o te makfa cu go'i .i ku'i lo gugde pe la .oz. pu no roi se lujyklugau .i ki'u bo mi'a sepli pi ro lo ve vimcu be fi lo munje .i se ki'u bo za'o me mi'a fa lo termafyfe'i .e lo te makfa li'u»


ni'o «lu te makfa fa ma —sei la .dorotis. cu retsku— li'u»


ni'o «lu la .oz. cu du la banli te makfa —sei la termafyfe'i fau lo nu laurjdikygau lo voksa ja'e lo nu toncauba'u cu spusku— .i .obu vlipa zei zmadu lo ro mi'a poi gunma .i .obu xabju la ri'ojme tcadu li'u»


ni'o la .dorotis. cu pu'o da'i te preti fi lo se jmina .i ku'i ca ku la maxpre ku noi pu ca'o pu ca'o ne'a smaji sanli cu cladu cmoni gi'e degja'o lo kojna be lo zdani be'o noi la palci termafyfe'i pu ca'o vreta


ni'o «lu mo li'u» se retsku lo cmalu ke tolci'o ninmu noi catlu gi'e co'a cmila .i lo jamfu be lo morsi termafyfe'i cu ba'o mo'u canci .i je no da po'u na'e bo lo rijyska cutci cu ve vimcu

ni'o «lu ty pu tai tolci'o —sei la termafyfe'i pe la berti cu ciksi— ja'e lo nu sutra lo ka sudbi'o bu'u lo solgu'i .i lo cabna cu fanmo ty .i ku'i lo rijno cutci ca me do moi .i je .ei do dasni li'u» .i ty tengau lo birka gi'e lebna lo cutci .i je ba lo nu desygau vimcu lo pulce lo nenri be cy cu dunda cy la .dorotis.


ni'o «lu la termafyfe'i pe la stici pu jgira tu'a lo va cutci —sei pa la maxpre cu cusku— .i je cy cu vasru da poi makfa .i ku'i lo du'u ma kau makfa zo'u: mi'a pu no roi djuno li'u»

ni'o la .dorotis. cu bevri lo cutci lo nenri be lo zdani gi'e punji cy lo jubme .i ba bo dy cu bartu xruti la maxpre gi'e cusku


ni'o «lu mi carmi lo ka djica lo nu xruti lo mi fetfamti .e lo mi nakfamti .i ki'u bo mi birti lo du'u ra xanka tu'a mi .i xu do mi ka'e sidju lo nu mi facki lo du'u ma kau pluta li'u»


ni'o la maxpre joi la termafyfe'i cu catlu simxu gi'e ba bo catlu la .dorotis. gi'e ba bo desygau lo vo'a stedu


ni'o «lu na'e vu bu'u la stuna —sei pa boi my cu cusku— cu barda kutytu'a .i je no da ka'e pagre li'u»


ni'o «lu mintu lo tcini pe bu'u la snanu —sei lo drata cu cusku— .i ki'u bo mi ba'o zvati gi'e ba'o viska .i la snanu cu gugde la vonpre li'u»


ni'o «lu ti'e —sei lo ci moi be lo nanmu cu cusku— mintu bu'u la stici .i je lo va gugde noi la .uinkis. cu xabju cu se turni la palci termafyfe'i pe la stici ge'u ku noi sefygau do va'o lo nu da'i do lampagre li'u»


ni'o la berti cu zdani mi —sei lo tolci'o ninmu cu cusku— .i je se korbi lo mintu ke barda kutytu'a poi sruri lo vi gugde pe la .oz .i uu ru'a doi pe mi dirba do bi'ai xabju kansa mi'a li'u»


ni'o la .dorotis. cu co'a klaku fi la'e di'u .i ki'u bo dy cu cinmo lo ka nonkansa bu'u lo ro vi fange prenu .i lo se klaku be dy cu simlu lo ka drigau la xendo maxpre .i ki'u bo my cu ba zi lebna lo vo'a zbibu'u gi'e si'a co'a klaku .i lo cmalu ke tolci'o ninmu zo'u: ny toldasybi'o lo ri mapku gi'e lanxe cpanygau lo te konju lo vo'a nazbi ca lo nu kancu cusku «lu pa .i re .i ci li'u» se pi'o lo junri voksa .i ba zi bo lo mapku cu binxo lo tanbo noi te ciska se pi'o lo barda je blabi ke bakri lerfu

KO CuRMI LO NU LA .DoROTIS.

CU KLaMA LA RI'oJME TCaDU

li'u»

ni'o lo cmalu ke tolci'o ninmu cu lebna lo tanbo lo ra nazbi gi'e retsku ca lo nu ba'o tcidu lo valsi kei «lu xu do se cmene zo .dorotis. doi dirba li'u»


ni'o «lu go'i —sei lo verba fau lo nu fa'a ga'u catlu gi'e sudgau lo se klaku cu spusku— li'u»


ni'o «lu va'o ku do klama .ei la ri'ojme tcadu .i ju'o cu'i la .oz. do ba sidju li'u»


ni'o «lu ma stuzi lo tcadu —sei la .dorotis. cu retsku— li'u»


ni'o «lu lo prane midju be lo gugde .i se turni la .oz. no'u la banli te makfa poi mi pu tavla do ke'a li'u»


ni'o «lu xu .obu xamgu nanmu —sei lo nixli cu xanka te preti— li'u»


ni'o «lu .obu xamgu te makfa .i lo du'u xu kau nanmu cu na ka'e se djuno mi .i ki'u bo mi no roi viska .obu li'u»


ni'o «lu ta'i ma mi ka'e klama —sei la .dorotis. cu retsku— li'u»


ni'o «lu .e'i do cadzu .i clani nu litru pa'o lo gugde poi su'o roi jai pluka gi'e su'o roi manku joi mabla .i ku'i mi ba pilno ro lo makfa larcu poi mi se slabu ku'o te zu'e lo nu do se bandu fi lo ckape li'u»


ni'o «lu xu na ku do mi klama kansa —sei lo nixli noi pu co'a jinvi lo du'u lo cmalu ke tolci'o ninmu ku po'o pendo cu cpedu cusku— li'u»


ni'o «lu na go'i .i mi na kakne —sei ny spuda— .i ku'i mi do ba cinba .i no da darsi lo nu crogau lo prenu poi ba'o se cinba la termafyfe'i pe la berti li'u»


ni'o ny jbikla la .dorotis. gi'e toljursa cinba dy lo mebri .i tolcanci lo ve pencu be lo nixli bei lo ctebi fa lo pa cukla je carmi barna (to la .dorotis. cu ba za facki toi)


ni'o «lu lo dargu be la ri'ojme tcadu cu se gacri lo pelxu kitybli —sei la termafyfe'i cu cusku— .i se ki'u bo frili fa lo nu tolcri .i ko ca lo nu do tolcliva la .oz. cu na terpa tu'a .obu gi'e cpedu lo ka .obu do sidju .i co'o pe mi dirba li'u»


ni'o lo ci maxpre cu dizlo krobi'o fa'a dy gi'e zandapma dy lo pluka nunli'u gi'e ba bo to'o cadzu pa'o lo tricu .i la termafyfe'i cu xendo ke stedu muvdu fa'a la .dorotis. gi'e ci roi carna fi'o te sanli lo jmati'e gi'e jai suksa fai lo ka canci .i la'e di'u fanza zei mutce la .totos. ku noi fa'a cladu gercmo ca lo nu ba'o canci kei ki'u lo nu ty pu terpa lo nu gercmo ca lo nu la termafyfe'i cu ca'o zvati


ni'o ku'i la .dorotis. ki'u lo nu djuno lo du'u ty termafyfe'i cu kanpe lo nu ty cu canci du'i la'e di'u .i je dy na sai se spaji







lo se mànci te màkfa pe la .oz.

ni'o ni'o ci mo'o
lo nu la .dorotis. cu nurgau la cpitepygau

ni'o la .dorotis. ca lo nu no drata cu zvati cu co'a xagji .i ja'e bo dy cu klama lo kajnyta'e gi'e se va'u katna lo nanba noi dy punji lo matne ke'a .i dunda lo pi su'o si'e la .totos. gi'e lebna lo baktu lo kajna gi'e bevri by lo cmalu rirxe gi'e tisygau by lo klina je carmi djacu .i la .totos. cu bajra klama lo tricu gi'e co'a batci fa'a lo cipni poi zutse ty .i la .dorotis. cu klama te zu'e lo nu cpacu la .totos. kei gi'e viska lo tai kukte grute poi dandu lo jimca ku'o ja'e lo nu jajgau lo pi so'u si'e fau lo nu jinvi lo du'u prane lo ka mapti lo nu jmina fi lo cersai

ni'o ba bo dy cu xruti lo zdani .i je ca lo nu ba'o gasnu lo xamgu nu vo'a .e la .totos. cu pinxe lo lenku je klina djacu cu co'a zukte lo ka brebi'o lo nu litru se ka'a la ri'ojme tcadu

ni'o la .dorotis. cu ponse pa po'o taxfu .i ku'i je'u ty jinsa gi'e dandu lo grana be ne'a lo ckana .i ty marji lo gingamu ne lo blabi jo'u blanu kurfa .i je ty. to'e ki'u nai gi lo blanu cu ba'o milxe lo ka kadbi'o gi ja'a melbi taxfu .i lo nixli cu srerivzu'e sezlu'i gi'e dasybi'o lo jinsa gingamu bo taxfu gi'e lasna lo xunblabi solmapku lo stedu be ny .i ny lebna lo cmalu lanka gi'e clugau ly lo nanba pe lo kajnyta'e fau lo nu punji lo blabi bukpu lo gapru .i ba bo ny. fa'a ni'a catlu lo ny. jamfu gi'e sajbi'o lo du'u ma kau ni lo cutci pe ny cu laldo

ni'o «lu ju'o ti na banzu lo clani nunli'u doi .totos. —sei dy cusku— li'u» .i je la .totos. cu fa'a ga'u catlu lo flira be dy te ga'a lo vo'a cmalu ke xekri kanla gi'e desygau lo rebla te zu'e lo nu jarco lo ka djuno lo du'u dy ma kau skudji

ni'o ca bo la .dorotis. cu viska lo nu cpana lo loldi fa lo rijno cutci poi pu se ponse la termafyfe'i pe la stuna

ni'o «lu mi kucli lo du'u xu kau cy mi mapti —sei dy fi la .totos. cu cusku— .i cy mapti ju'o lo barda nu cadzu se pi'o cy .i ki'u bo da'i cy cu no roi selplidu'e li'u»

ni'o dy co'u dasni lo ri tolci'o ke skapi cutci gi'e troci co dasni lo rijno cutci noi mapti zei prane dy tai lo nu da'i cy pu se zbasu te zu'e tu'a dy

ni'o ro mai lafti lo lanka

ni'o «lu ko klama doi .totos. —sei dy cusku— .i mi'o ba klama la ri'ojme tcadu gi'e retsku fi la banli .oz. fe lo se du'u ta'i ma kau xruti la .kanzas. li'u»

ni'o dy ga'orgau lo vorme gi'e telgau gi'e ralci setca lo ckiku lo daski be lo taxfu .i ja'e bo fau lo nu la .totos. cu cikcni ke cadzu jersi cu co'a litru

ni'o so'o da jibni dargu .i ku'i la .dorotis. na nitcu lo clani se ditcu lo nu tolcri lo dargu poi se gacri lo pelxu kitybli .i ba zi lo tordu dy ca'o cadzu sutra fa'a la ri'ojme tcadu fau lo nu lo vo'a rijno cutci cu gleki jabyselsna do'e lo jdari je pelxu ke dargu sefta .i lo solri cu carmi te gusni .i je lo cipni cu titla sanga .i je la .dorotis. cu na sai xlali cinmo du'i lo noi ju'o cu'i do ke'a kanpe ku'o nu lo nixli poi pu jai suksa fai lo ka se vimcu fi lo zdani gugde gi'e se punji fi lo midju be lo fange gugde cu ja'a no'a
 

ni'o dy se spaji ca lo nu ca'o cadzu kei lo nu lo sruri gugde cu tai melbi .i lo cnici bitmu cu zvati lo re mlana be lo dargu gi'e zilcintypu'i lo kukte blanu .i je ze'o lo bitmu cu foldi lo gurni .e lo te stagi fa lo so'i rau mei .i za'a la maxpre cu certu te cange gi'e kakne lo ka kurji lo barda te crepu .i di'i ru'e ku la .dorotis. cu lampagre lo zdani .i je lo prenu cu barkla te zu'e lo nu catlu dy gi'e krobi'o fa'a dy ca lo nu dy cu lampagre .i ki'u bo ro da djuno lo du'u dy pu tutci lo nu daspo la palci termafyfe'i gi'e sefselfamgau my .i lo zdani pe la maxpre cu cizyselji'u dinju .i ni'i bo zy cu slanu .i je drudi fa lo bolxadba .i ro boi zy cu zilcintypu'i fa lo blanu .i ki'u bo bu'u lo vi gugde pe la stuna lo blanu cu selneirai skari

ni'o ca lo nu co'a vanci noi nu la .dorotis. co'a tatpi lo nu ve'u cadzu kei gi'e co'a kucli lo du'u .ei dy ma kau zvati ze'a lo nicte zo'u: dy tolcliva lo zdani poi nalmli lo ka bramau lo drata .i bu'u lo crino sastu'a be ca'u zy cu dansu fa lo so'i nanmu .e lo so'i ninmu .i lo mu cmalu verba cu kelci se rai lo ka cladu .i je lo prenu cu cmila gi'e sanga .i fau bo lo ne'a jubme cu culno lo kukte grute fa'u narge .e lo pesxu .e lo titnanba .e lo so'i drata ke xamgu cidja
 

ni'o lo prenu cu xendo rinsa la .dorotis. gi'e friti lo nu dy cu kansa py lo nu vacysai citka .i ki'u bo ti zdani lo pa cmima be lo cfurai be la maxpre ku pe lo gugde .i je lo pendo be cy cu jmaji cy te zu'e lo nu salci lo nu zifre lo ka na selfu la palci termafyfe'i
 

ni'o la .dorotis. cu citka lo kukte vacysai gi'e se selfu lo ricfu maxpre noi se cmene zo .bok .i ba bo dy cu tsebi'o lo sfofa gi'e catlu lo nu lo prenu cu dansu
 

ni'o ca lo nu la .bok. cu viska lo rijno cutci pe la .dorotis. cu cusku «lu ju'o ru'a do banli te makfa li'u»

ni'o «lu ki'u ma —sei lo nixli cu retsku— li'u»

ni'o «lu ki'u lo nu do dasni lo rijno cutci gi'e pu catra la palci termafyfe'i .i ji'a lo do taxfu cu vasru lo blabi .i je no na'e bo lo termafyfe'i cu dasni lo blabi li'u»

ni'o «lu lo mi taxfu cu se prina lo blanu jo'u blabi kurfa —sei la .dorotis. fau lo nu xulgau vimcu lo cinje be ty cu cusku— li'u»

ni'o «lu do xendo lo nu dasni ta —sei la .bok. cu cusku— .i blanu fa lo skari pe la maxpre .i je blabi fa lo skari pe lo termafyfe'i .i ja'o mi'a djuno lo du'u do xendo termafyfe'i li'u»

ni'o la .dorotis. cu na djuno lo du'u .ei spuda la'e di'u ma kau .i ki'u bo ro lo prenu cu simlu lo ka jinvi lo du'u dy termafyfe'i .i je dy cu ja'a sai djuno lo du'u sa'u dy fadni ke cmalu nixli gi'e funca klama ri'a lo vilcarbi'e lo cizra gugde

ni'o ca lo nu dy ba'o co'a tatpi lo nu catlu lo nundansu kei la .bok. cu klagi'a dy lo zdani nenri noi bu'u ke'a by dunda fi dy fe lo kumfa poi vasru lo melbi ckana .i lo ckagai cu marji lo blanu bukpu .i je la .dorotis. cu panpi sipna se ru'u cy co'u lo cerni
 

ni'o dy citka lo ricfu cersai gi'e catlu lo cmalu ke maxpre cifnu noi kelci la .totos. gi'e lacpu lo rebla gi'e ge krixa gi cmila vau tai da poi la .dorotis. cu mutce lo ka se zdile ke'a .i la .totos. cu xamgu cinri lo ro prenu .i ki'u bo py cu pu no roi viska lo gerku

ni'o «lu ma ni darno la ri'ojme tcadu —sei lo nixli cu te preti— li'u»

ni'o «lu mi na djuno —sei la .bok. cu junri spuda— .i ki'u bo mi no roi zvati ty .i xagmau fi lo prenu fa lo nu darno la .oz. va'o lo nu na se cuntu fa py joi .obu .i ku'i clani ve klama la ri'ojme tcadu .i je lo djedi be li so'i ba ditcu .i lo vi gugde cu ricfu gi'e pluka .i ku'i do nitcu lo nu pagre lo rufsu je ckape stuzi pu lo nu do tolcliva lo fanmo be lo do nunli'u li'u»

ni'o la'e di'u milxe se xanka la .dorotis. .i ku'i dy djuno lo du'u no na'e bo la .oz. cu ka'e sidju dy lo nu xruti la .kanzas. .i se mu'i bo dy cu virnu jdice lo du'u na ba tolselfarbi'o

ni'o dy tolrinsa lo pendo be dy gi'e za'u re'u co'a litru lo pelxu kitybli dargu .i ca lo nu ba'o klama ve'a lo minli be li so'i cu jdice lo nu klasti te zu'e lo nu surla .i ja'e bo parkla lo gapru be lo bitmu poi jibni lo klaji ku'o gi'e tsebi'o .i lo barda grufoi cu ragve lo bitmu .i je lo naldarno zo'u dy viska lo cpitepygau noi galtu zvati lo grana te zu'e lo nu fanta lo nu lo cipni cu jbibi'o lo makcu gurni
 

ni'o la .dorotis. cu cpanygau lo xejni'a lo xance gi'e pensi catlu la cpitepygau .i stedu cy fa lo cmalu dakli noi terse'a lo sudysrasu zi'e noi lo kanla .e lo nazbi .e lo moklu cu pu se cintypu'i te zu'e lo nu sinxa lo flira .i lo tolci'o ke se kilji'o je blanu mapku poi pa la maxpre pu ponse ke'a cu ba'o se punji fi lo gapru be lo stedu be cy .i je lo te zilvi'u be lo prenu cu marji lo blanu taxfu noi ba'o selplidu'e gi'e ba'o kadbi'o ku'o gi'e ji'a terse'a lo sudysrasu .i lo jamfu cu dasni lo tolci'o cutci ne lo blanu jipno (to dunli lo se dasni be lo ro prenu poi xabju lo vi gugde toi) .i je lo bi'u nai prenu cu gau galtu fi lo stani be lo gurni se pi'o lo grana poi pagre lo trixe be py

ni'o ca lo nu la .dorotis. cu ca'o junri catlu lo cizra je se cintypu'i flira be la cpitepygau kei dy se spaji lo nu viska lo nu cy. masno kalgaisligau .i dy ca lo cfari cu jinvi lo du'u ju'o dy srera .i ki'u bo no lo cpitepygau pe la .kanzas. cu su'o roi kalgaisligau .i ku'i nau ku lo prenu cu sedyfarmu'u fa'a dy tai lo te xendo .i ba bo dy nitparkla lo bitmu gi'e cadzu fa'a py fau lo nu la .totos. ru'u lo grana cu bajra gi'e gercmo
 

ni'o «lu coi —sei la cpitepygau cu sudga voksa cusku— li'u»

ni'o «lu xu do pu tavla —sei lo nixli fau lo nu manci cu retsku— li'u»

ni'o «lu ju'o —sei la cpitepygau cu spuda— .i ma do li'i cabna li'u»

ni'o «lu lo xamgu ki'e do'u —sei la .dorotis. cu clite spusku— .i ma do li'i cabna li'u»

ni'o «lu mi na cinmo lo pluka —sei la cpitepygau fau lo nu cisma cu cusku— .i ki'u bo mutce lo ka tolzdi kei fa lo nu ca ge lo nicte gi lo donri cu tepygau lo korvo li'u»

ni'o «lu xu na kakne lo ka fa'a ni'a klama —sei la .dorotis. cu retsku— li'u»

ni'o «lu na go'i .i ki'u bo lo vi grana cu pagre lo mi trixe .i .e'o va'o gi do vimcu lo grana gi mi mutce lo ka ckire do li'u»

ni'o la .dorotis. cu pejgau lo re birka gi'e viclafti lo prenu lo grana .i ki'u bo py ri'a lo nu terse'a lo sudysrasu cu linto tcemli

ni'o «lu ki'e sai do —sei la cpitepygau ca lo nu ba'o punji fi lo loldi cu cusku— .i mi cinmo lo ka cnino prenu li'u»

ni'o la .dorotis. cu se spaji la'e di'u .i ki'u bo simlu lo ka cizra kei fa lo nu tirna lo nu lo terse'a nanmu cu tavla kei kei .e lo nu viska lo nu ny cu krobi'o rinsa gi'e kansa cadzu pa'a tu'a dy

ni'o «lu do me ma —sei la cpitepygau ca lo nu ba'o pejgau lo sevzi gi'e ba'o ta'irva'u cu retsku— .i je do ma ca'o klama li'u»

ni'o «lu mi se cmene zo .dorotis. —sei lo nixli cu cusku— gi'e ca'o klama la ri'ojme tcadu te zu'e lo nu cpedu fi la banli .oz. fe lo nu xrugau mi la .kanzas. li'u»

ni'o «lu ma stuzi la ri'ojme tcadu —sei te preti— .i ji'a la .oz. cu mo li'u»

ni'o «lu ue xu do na djuno —sei dy se spaji spuda— li'u»

ni'o «lu je'u na go'i .i mi na djuno su'o da .i za'a dai mi terse'a .i se ki'u bo mi na sai se besna —sei badri spusku— li'u»

ni'o «lu ua —sei la .dorotis. cu cusku— .i mi do kecti zei mutce li'u»

ni'o «lu ba'a pei —sei retsku— va'o lo nu mi do kansa lo nu klama la ri'ojme tcadu zo'u: la .oz. cu dunda lo besna mi li'u»

ni'o «lu mi na ka'e djuno —sei dy xrugau— .i ku'i do zifre lo nu kansa mi .i ga nai la .oz. na dunda lo besna do gi no da do to'e prali li'u»

ni'o «lu jetnu —sei la cpitepygau cu cusku— .i je'u —sei cy sivni ra'irgau— mi na se nabmi lo nu lo tuple .e lo birka .e lo xadni vu'o pe mi cu sudysrasu terse'a .i ki'u bo mi na ka'e cortu .i lo nu da'i da stapa pa lo mi jmadegji gi'a tunta mi se pi'o lo jesni cu na vajni .i ki'u bo mi na kakne lo ka ganse .i ku'i mi na djica lo nu lo prenu mi te cmene zo bebna .i je va'o lo nu lo mi stedu cu stodi lo ka culno lo po'o sudysrasu jo'u nai lo besna zo'u: ta'i ma mi ka'e djuno su'o da li'u»

ni'o «lu mi jimpe lo du'u do ma kau cinmo —sei lo cmalu nixli noi je'u kecti cu cusku— .i va'o lo nu do klama kansa mi kei mi ba cpedu fi la .oz. fe lo ka gasnu ro lo jai se kakne be se va'u do li'u»

ni'o «lu ki'e do'u —sei ckire spuda— li'u»
 

ni'o lo re mei cu xruti lo klaji .i la .dorotis. cu sidju la cpitepygau lo nu ravykla lo bitmu .i je lo re mei cu co'a litru lo pelxu kitybli dargu se ka'a la ri'ojme tcadu

ni'o la .totos. ca lo nuncfa na nelci lo vi ziljmina be lo bende .i ty ru'u lo terse'a nanmu cu sumnyzu'e tai lo nu da'i sruma lo du'u cumki fa lo nu lo ratcu zdani cu zvati lo sudysrasu .i je ty cu so'i roi fe'ucmo tai lo te nalxe'o fa'a la cpitepygau


ni'o «lu ko na se nabmi tu'a la .totos. —sei la .dorotis. fi lo ri cnino pendo cu cusku— .i ty cu no roi batci li'u»

ni'o «lu mi na terpa —sei la cpitepygau cu spuda— .i ty na ka'e crogau lo sudysrasu .i .e'o ko curmi lo nu mi bevri lo va lanka se va'u do .i mi na ba se nabmi .i ki'u bo mi na ka'e tatpi .i .ai mi do jungau fo lo se mipri —sei cy fau lo nu cadzu cu di'a co'e— .i zasti fa pa po'o da poi mi terpa ke'a li'u»

ni'o «lu ma co'e —sei la .dorotis. cu te preti— .i xu lo maxpre te cange poi zbasu do li'u»

ni'o «lu na go'i —sei la cpitepygau cu spusku— .i lo jelca sacki cu co'e li'u»
 

 






lo se mànci te màkfa pe la .oz.
ni'o ni'o vo mo'o
lo pluta poi pagre lo ricfoi

ni'o ba za lo cacra be li su'o lo pluta cu co'a rufsu .i je lo nu cadzu cu co'a tai nandu ja'e lo nu la cpitepygau cu so'i roi tapfli lo pelxu kitybli noi vi mutce lo ka rufsu .i je'u su'o roi ku ky ba'o porpi gi'o nai ji'a sai mulno se claxu fau lo nu zvati fa lo kunti noi la .totos. cu plipe lo ragve zi'e noi la .dorotis. cu cadzu ru'u ke'a .i la cpitepygau zo'u fau lo nu na se besna cu sirji cadzu ja'e lo nu stapa lo kunti gi'e cpana farlu lo jdari kitybli .i ku'i no roi cortu .i je la .dorotis. cu lafti gi'e sa'irgau cy fau lo nu cy boi dy kansa lo ka gleki cmila lo cy. malfu'a


ni'o lo vi cange cu na sai simsa lo fe'e pu cange lo ka xamgu se kurji .i zasti fa me'i zdani .e me'i grute tricu .i je pa'a gi lo litru cu klama gi lo gugde cu zenba lo ka seldriselji'u


ni'o ca lo dormidju cu tsebi'o ne'a lo cmalu rirxe .i je la .dorotis. cu kargau lo lanka gi'e lebna pi su'o lo nanba .i friti lo pa spisa la cpitepygau .i ku'i cy fapro

ni'o «lu mi no roi xagji —sei cy cusku— .i je zanfu'a mi fa lo nu na go'i kei ki'u lo nu lo mi moklu cu pixra po'o .i va'o lo nu mi sraku my ja'e lo nonselsfe te zu'e lo nu mi ka'e citka zo'u: lo sudysrasu poi mi terse'a ke'a cu muvdu lo bartu .i je da'i la'e di'u cu daspo lo tarmi be lo mi stedu li'u»

ni'o la .dorotis. cu zi viska lo nu la'e di'u jetnu .i se ki'u bo tu'ifru po'o gi'e di'a citka lo nanba

ni'o «lu ko mi jungau da do jo'u lo do te klama —sei la cpitepygau ca lo nu dy cu ba'o citka lo vacysai cu cusku— li'u» .i dy boi cy jungau ro da la .kanzas .e lo nu ro de bu'u grusi .e lo nu lo vilcarbi'e cu bevri dy lo vi cizra gugde pe la .oz.


ni'o la cpitepygau cu ralci tinju'i gi'e cusku «lu mi na jimpe lo du'u mu'i ma kau do djica lo nu cliva lo vi melbi gugde gi'e xruti lo sudga je grusi stuzi poi do ke'a te cmene zo .kanzas. li'u»

ni'o «lu krinu la'e di'u fa lo nu do na se besna —sei lo nixli cu spuda— .i se ja'e nai lo nu ma kau ni lo mi'a zdani cu jadycau gi'e grusi zo'u: mi'a noi rectu je ciblu prenu cu zmanei lo nu xabju zy kei lo ro me lo drata gugde moi va'o ji'a sai lo nu gy. melbi traji .i no stuzi cu simsa lo zdani li'u»

ni'o la cpitepygau cu patyva'u

ni'o «lu li'a mi na jimpe kakne —sei cy cusku— .i va'o lo nu da'i lo do stedu cu terse'a lo sudysrasu tai tu'a lo me mi moi cu la'a xabju fa ro do'o lo melbi stuzi .i je va'o ku la .kanzas. cu se zvati no sai prenu .i zanfu'a la .kanzas. fa lo nu do se besna li'u»

ni'o «lu .au pei do te lisri fi da mi ze'a lo nu ma'a surla —sei lo verba cu retsku— li'u»

ni'o la cpitepygau cu tolzau catlu vy gi'e spusku «lu

ni'o lo mi ba'o nunjmive cu tai tordu ja'e lo nu mi ca'a djuno no da .i mi se zbasu ca lo prulamdei be lo prulamdei .i lo du'u ma kau fasnu bu'u lo munje pu la'e di'u cu na sai se djuno mi .i fu'au ca lo nu lo te cange cu zbasu lo mi stedu kei pa lo pa moi se zukte cu ka pirfi'i lo mi kerlo kei ja'e lo nu mi tirna lo nu ma kau bu'u fasnu .i zvati fa lo ji'a drata maxpre .i lo pa moi se tirna be mi cu nu lo te cange cu cusku «lu do ma jinvi lo vi kerlo li'u»

ni'o «lu ky na cnici —sei lo drata cu cusku— li'u»

ni'o «lu na nabmi —sei lo te cange cu cusku— .i to'e ki'u nai kerlo li'u» noi la'e ke'a je'a jetnu

ni'o «lu ca ku mi finti lo kanla —sei lo te cange cu cusku— li'u» .i tai ku cy pirfi'i lo mi pritu kanla .i je co'a lo nu co'i mulno kei mi catlu .u'e cy .e ro lo sruri be mi fau lo nu mutce lo ka kucli kei ki'u lo nu mi pa re'u viska lo munje

ni'o «lu ta melbi kanla —sei lo maxpre noi ca'o zgana lo te cange cu te notci— .i lo blanu cu ja'a mapti se skari lo kanla li'u»

ni'o «lu .ai mi finti lo drata poi bramau milxe —sei lo te cange cu cusku— li'u» .i ca lo nu lo re moi kanla ba'o se finti kei mi ka'e viska se mau lo purci .i ba bo cy finti lo mi nazbi .e lo mi moklu .i ku'i mi na'e tavla ki'u lo nu ca ku mi na djuno lo du'u ma kau te pilno lo moklu .i mi se zdile lo nu catlu lo nu xai zbasu lo mi birka .e lo mi tuple .i ca lo nu lo mi stedu cu se lasna kei mi jgira mutce ki'u lo nu pe'i mi dunli ro lo drata lo ka remna

ni'o «lu lo vi nanmu ba banzu tepygau lo korvo —sei lo te cange cu cusku— .i se jvinu lo mintu be lo remna li'u»

ni'o «lu ju'o .i ca'a remna —sei lo drata cu cusku— li'u» .i je mi mutce lo ka tugni dy .i lo te cange mi bevri fau lo nu mi jbini lo birka jo'u lo xadni kei gi'e punji fi lo clani grana noi do mi ke'a tolcri .i cy .e lo ri pendo cu ba zi to'o cadzu ja'e lo nu mi nonkansa

ni'o mi na nelci lo nu mi tai nonkansa .i se ki'u bo mi troci lo ka cadzu jersi xai .i ku'i lo mi jamfu na lamji lo loldi .i je mi jai se bapli fai lo ka stali lo grana .i seicni nunjmive ki'u lo nu zasti fa no da poi mi ka'e pensi ke'a ku'o ki'u lo nu mi pu tai zi se zbasu .i so'i korvo je so'i drata cipni cu vofli fa'a ne'i lo gurni foldi .i ku'i zi ca lo nu viska mi cu to'o vofli fau lo nu jinvi lo du'u mi maxpre .i la'e di'u pluka mi gi'e gasnu lo nu mi cinmo lo ka vajni mutce prenu .i ba za bo pa tolci'o korvo cu vofli jbibi'o mi .i je ba lo nu ralci catlu mi cu tsebi'o lo mi janco gi'e cusku di'e
 

ni'o «lu mi kucli lo du'u xu kau lo te cange pu jinvi lo du'u tcica be mi kakne fau lo nu tai juxre .i ro korvo poi na bebna cu viska lo nu do ke po'o sudysrasu terse'a nanmu li'u» .i ba bo ky cu fa'a ni'a plipe lo mi jamfu gi'e citka ro lo gurni poi ky djica .i lo drata cipni fau lo nu viska lo nu ky na se xrani mi cu klama te zu'e lo nu cy. ji'a citka lo gurni .i ja'e bo ba za lo cmalu lo barda gunma be ky cu sruri mi

ni'o mi pu badri la'e di'u .i ki'u bo jarco lo du'u je'u mi na tai xamgu cpitepygau .i ku'i lo tolci'o korvo cu kufygau mi fau lo nu cusku «lu va'o lo nu do se besna kei do xagdu'i ro drata remna gi'e xagmau su'o boi ry .i lo besna cu selte'i lo ka lo nu da ponse ce'u cu se vamji kei fi'o nalvai lo du'u da korvo gi'i kau remna li'u»

ni'o ca lo nu lo korvo ba'o cliva kei mi pensi la'e di'u gi'e jdice lo du'u .ai troci lo ka cpacu lo besna .i zanfu'a fa lo nu do lampagre gi'e vicycpu mi lo grana .i je lo se cusku be do cu bitygau mi lo du'u la banli .oz. ba dunda lo besna mi ca lo nu mi'o tolcliva la ri'ojme tcadu li'u»

ni'o «lu mi pacna lo nu ja'a co'e kei —sei la .dorotis. cu stace cusku— ki'u lo nu do simlu lo ka djica carmi li'u»

ni'o «lu ie mi ja'a djica —sei la cpitepygau cu xrugau cusku— .i da tai tolkufra lo nu da djuno lo du'u da bebna li'u»

ni'o «lu ja'o —sei lo nixli cu cusku— mi'o klama .e'u li'u» .i je dunda lo lanka la cpitepygau

ni'o fe'e ca ku no bitmu cu jibni lo klaji mlana .i je lo gugde cu rufsu gi'e nalzilplixa .i ca lo nu lo vanci cu jibni cu tolcliva fa lo litru lo barda ricfoi noi bu'u ke'a lo tricu cu barda gi'e zvajbisi'u vau tai ja'e lo nu lo jimca be ty cu pensi'u lo gapru be lo pelxu kitybli dargu .i ni'a lo tricu cu na ru'e manku .i ri'a bo lo jimca cu fanta lo nu lo solgu'i cu nerbi'o .i ku'i lo litru cu na klasti gi'e ca'o klama lo nenri be lo ricfoi

ni'o «lu ga nai lo vi dargu cu nerbi'o gi dy bi'ai barbi'o —sei la cpitepygau cu cusku— .i je ki'u lo nu la ri'ojme tcadu cu se stuzi lo drata fanmo be lo dargu kei mi'o bilga lo ka klama ro da poi dy mi'a da klagi'a li'u»

ni'o «lu da'i ro da la'e di'u djuno —sei la .dorotis. cu cusku— li'u»

ni'o «lu ju'o .i la'e di'u krinu lo nu mi djuno —sei la cpitepygau cu spuda— .i ga nai sarcu lo nu facki kei fa lo nu se besna gi da'i mi no roi cusku de'u li'u»

ni'o ba za lo cacra be li ji'i pa lo gusni cu canci kadbi'o .i je lo litru ca tapflikla ne'i lo manku .i la .dorotis. na sai ka'e viska .i ku'i la .totos. ja'a ka'e go'i .i ki'u bo lo gerku cu certu lo ka viska ne'i lo manku .i je la cpitepygau cu xusra lo du'u cy kakne lo ka viska du'i lo nu co'e ca lo donri .i se mu'i bo dy cu jgari lo birka be cy gi'e snada lo ka xamgu banzu klama

ni'o «lu ko va'o lo nu viska da poi ma'a kakne lo ka sipna bu'u ke'a ze'a lo nicte —sei dy cusku— cu jungau mi .i ki'u bo lo nu cadzu bu'u lo manku cu mutce lo ka to'e se kufra li'u»

ni'o ba za bo la cpitepygau cu klasti
 

ni'o «lu mi viska lo cmalu cmazda fa'a lo pritu be mi'o —sei cusku— .i zilzba lo tanbo jo'u lo jimca .i .au pei mi'o klama li'u»

ni'o «lu .au ja'ai —sei lo verba cu spuda— .i mi ja'a sai tatpi li'u»

ni'o tai ku la cpitepygau cu gidva pa'o lo tricu co'u lo nu tolyli'a lo cmazda .i je la .dorotis. cu nerkla gi'e tolcri lo ckana poi sudga pezli se zbasu ku'o bu'u pa kojna .i ba zi cpana binxo .i je fau lo nu la .totos. cu mlana jibni cu zi co'a condi sipna .i la cpitepygau noi no roi tatpi cu sanli bu'u lo drata kojna gi'e depyjdari denpa co'u lo cerni

 






lo se mànci te màkfa pe la .oz.
ni'o ni'o mu mo'o
lo nu nurgau la tinci mudypre

ni'o ca lo nu la .dorotis. cu cikybi'o kei lo solgu'i cu ca'a pagre lo tricu .i je la .totos. cu xa'o bartu gi'e ru'u jersi lo cipni jo'u lo ricyractu .i dy tsebi'o gi'e ru'u catlu .i va ku la cpitepygau cu za'o depyjdari sanli bu'u lo kojna gi'e denpa tu'a dy

ni'o «lu .ei ma'a klama gi'e sisku lo djacu —sei dy fi cy cu cusku— li'u»

ni'o «lu do nitcu lo djacu ma —sei cy retsku— li'u»

ni'o «lu lo nu lumci lo mi flira ba tu'a lo pulce be lo pluta kei .e lo nu lo nanba na snipa lo mi galxe li'u»

ni'o «lu ru'a lo nu da rectu cu na'e se kufra da —sei la cpitepygau cu pensi cusku— .i ki'u bo da bilga lo ka sipna gi'e citka gi'e pinxe .i ku'i do se bersa .i je se vamji lo barda raktu fa lo nu kakne lo nu drani pensi li'u»


ni'o lo gunma cu cliva lo cmazda gi'e cadzu pa'o lo tricu co'u lo nu tolcri lo cmalu jinto be lo klina djacu be'o poi bu'u ke'a la .dorotis. cu pinxe gi'e jinru gi'e citka lo cersai .i dy viska lo nu lo nanba ve vimcu pe lo lanka cu na mutce kei gi'e ckire zi'o lo nu la cpitepygau na nitcu lo nu citka su'o da kei ki'u lo nu lo ve vimcu cu ja'a ru'e banzu lo nu dy jo'u la .totos. ka'e citka ca lo cabdei


ni'o dy ca lo nu mo'u citka lo sanmi gi'e pu'o xruti lo pelxu kitybli klaji cu se spaji lo nu tirna lo dizlo se cmoni poi jibni


ni'o «lu ta mo —sei dy toldarsi retsku— li'u»

ni'o «lu mi na ka'e se xanri —sei la cpitepygau cu spuda— .i ku'i ma'a ka'e klama gi'e facki li'u»

ni'o ca zi bo lo drata se cmoni cu se tirna gi'e simlu lo ka se krasi lo trixe be xai .i xy carna gi'e cadzu pa'o lo ricfoi ve'a lo jai ve'a su'o roi stapa .i ca bo la .dorotis. cu viska lo nu da carmi ne'i lo gusni poi pagre lo jbini be lo tricu .i dy bajra fa'a lo stuzi gi'e ba bo suksa klasti fau lo nu se spaji krixa lo cmalu

ni'o pa lo barda tricu cu su'o si'e se katna .i je fau lo nu sanli ne'a ty fau lo nu jgari lo se lafti ka'amru lo re xance zo'u: lo nanmu poi mulno lo ka tinci .i lo stedu .e lo birka .e lo tuple cu jorne lo xadni .i ku'i ny prane lo ka muvdycau kei tai lo nu na sai ka'e muvdu

ni'o la .dorotis. cu catlu ny fau lo nu manci kei .i je la cpitepygau ji'a cu go'i ca lo nu la .totos. cu kinli cmoni gi'e zukte lo ka batci lo tinci tuple kei noi crogau lo ra denci

ni'o «lu xu do pu cmoni —sei la .dorotis. cu retsku— li'u»

ni'o «lu go'i —sei lo tinci nanmu cu spusku— .i mi pu cmoni ze'u lo nanca be li za'u pa se cau lo nu da tirna mi gi'a klama te zu'e lo nu sidju li'u»

ni'o «lu mi do ta'i ma ka'e sidju —sei dy ranti tonga te preti be ki'u lo nu lo badri voksa poi lo nanmu cu se voksa ke'a cu pencu lo ruxse'i be dy— li'u»

ni'o «lu ko cpacu lo ctile lante gi'e ctile sabji lo mi te jorne —sei ny spusku— .i jy tai furtirse se pagbu ja'e lo nu mi na sai ka'e muvgau jy .i mi va'o lo nu te sabji lo ctile cu ba zi di'a se xamgu .i do ba tolcri lo ctile lante lo kajna be ne'i lo mi cmazda li'u»

ni'o la .dorotis. cu zi bajra xruti lo cmazda gi'e tolcri lo ctile lante gi'e ba bo xruti gi'e xanka retsku «lu lo do te jorne ma zvati li'u»

ni'o «lu ko sabji fi lo mi cnebo —sei la tinci mudypre cu spusku— li'u» .i ja'o dy sabji .i je ki'u lo nu furtirse mutce kei la cpitepygau cu co'a jgari lo stedu gi'e toljursa muvgau sy fau lo nu zunle fa'u pritu cargau kei co'u lo nu muvdu zifre .i je ba bo lo nanmu cu kakne lo ka muvgau sy zu'e ny po'o li'u»

ni'o «lu ca ku ko ctile sabji fi lo mi birka —sei ny cusku— li'u» .i la .dorotis. cu sabji .i je la cpitepygau cu toljursa krogau by co'u lo nu xamgu claxu lo furtirse gi'e cnino dunli

ni'o la tinci mudypre cu geicmo gi'e dzize'agau lo ri ka'amru noi my ke'a sa'orgau fo lo tricu

ni'o «lu ti barda se kufra —sei my cusku— .i mi pu jgari lo va ka'amru co'a lo nu mi furtirse selpau .i je mi gleki lo nu ro mai to'e lafti .i ca ku zo'u va'o lo nu do ctile sabji fi lo mi tuple te jorne kei mi di'a se xamgu li'u»

ni'o se ki'u bo xai ctile sabji fi lo tuple co'u lo nu muvdu zifre .i je my cu so'i roi kirsku fi lo nu ba'o se nurgau .i ki'u bo my simlu lo ka mutce lo ka clite .e lo ka ckire

ni'o «lu da'i mi va'o lo nu do na klama cu ze'e va sanli —sei my cusku— .i ja'o ju'o do nurgau lo mi nunjmive .i lo nu do ti zvati cu jalge ma li'u»

ni'o «lu mi'a klama la ri'ojme tcadu te zu'e lo nu penmi la banli .oz. —sei dy spusku— .i je mi'a klasti bu'u lo do cmazda te zu'e lo nu zvati ze'a lo nicte li'u»

ni'o «lu ki'u ma do djica lo nu penmi la .oz. —sei my retsku— li'u»

ni'o «lu .au .obu mi xrugau benji la .kanzas. .i je la cpitepygau cu djica lo nu .obu dunda lo besna cy —sei dy spusku— li'u»

ni'o la tinci mudypre cu simlu lo ka ze'i condi pendi .i ba bo cusku:

ni'o «lu ba'a pei la .oz. cu dunda lo risna mi li'u»

ni'o «lu .y ru'a —sei la .dorotis. cu spusku— .i da'i la'e di'u frili dunli lo nu dunda lo besna la cpitepygau li'u»

ni'o «lu jetnu —sei la tinci mudypre cu spuda— .i ja'o mi ji'a va'o lo nu do curmi lo nu mi kansa do cu klama la ri'ojme tcadu te zu'e lo nu cpedu lo ka la .oz. mi sidju li'u»
 

ni'o «lu .e'a ko kansa —sei la cpitepygau cu xendo cusku— li'u» .i je la .dorotis. cu jmina cusku lo se du'u da'i gleki lo nu se kansa my .i ja'e bo la tinci mudypre cu vregau lo ri ka'amru lo janco .i je bo xai pagre lo ricfoi co'u lo nu tolcliva lo klaji poi se gacri lo pelxu kitybli

ni'o la tinci mudypre pu cpedu fi la .dorotis. fe lo nu punji lo ctile lante lo lanka pe dy .i «lu .i ki'u bo —sei my cusku— mi va'o lo nu mi zilkavbu lo nuncarvi gi'e za'u re'u furtirfarvi cu ba mutce nitcu lo ctile lanka li'u»

ni'o ja'a zanfu'a fa lo nu lo cnino pendo cu cmibi'o lo bende .i ki'u bo za ba lo nu za'u re'u cfagau lo nunli'u kei by tolcliva lo stuzi noi lo tricu .e lo jimca cu banro lo tai rotsu ja'e lo nu lo litru na ka'e pagre .i ku'i la tinci mudypre cu co'a gunka se pi'o lo ri ka'amru gi'e tai xamgu katna ja'e lo nu ba za ba'o gasnu tu'a lo vorme se va'u lo mulno bende

ni'o la .dorotis. cu ca lo nu by ca'o cadzu cu tai junri pensi ja'e lo nu dy na sanji ca je fe lo nu la cpitepygau cu tapflifa'u fi lo kevna gi'e gunro fa'a lo drata mlana be lo dargu .i je'u cy bilga lo ka cpesku fi dy fe lo nu sidju fi lo nu sa'irbi'o


ni'o «lu ki'u ma do na cadzu ru'u lo kevna —sei la tinci mudypre cu retsku— li'u»

ni'o «lu mi na djuno rau da —sei la cpitepygau cu gleki spuda— .i lo mi stedu cu te setca lo sudysrasu .i la'e di'u krinu lo nu mi klama la .oz. te zu'e lo nu cpedu fi .obu fe tu'a lo besna li'u»

ni'o «lu ua —sei la tinci mudypre cu cusku— .i ku'i je'u lo besna na xagrai lo ro da pe lo munje li'u»

ni'o «lu xu do se besna —sei la cpitepygau cu te preti— li'u»

ni'o «lu na go'i .i lo mi stedu cu kunti mutce —sei la mudypre cu spusku— .i ku'i pu ku mi se besna gi'e se risna ji'a .i ja'o mi fau lo ba'o nu troci tu'a ro lo re mei cu da'i mutce lo ka zmanei lo risna li'u»

ni'o «lu ma krinu la'e di'u —sei la cpitepygau cu retsku— li'u»

ni'o «lu mi ba te lisri fi lo me mi moi do .i je ba bo do djuno li'u»

ni'o tai ku ze'a lo nu xai cadzu pagre lo ricfoi kei la tinci mudypre cu te lisri fi lo di'e lisri

ni'o «lu mi bersa lo mudypre poi katna lo tricu bu'u lo ricfoi gi'e ba bo jibri vecnu lo mudri .i ca lo nu mi binxo lo makcu kei mi ji'a binxo lo mudyka'a .i je ba lo nu lo mi patfu cu mrobi'o kei mi kurji lo mi tolci'o mamta ze'a lo nu my cu jmive .i ba bo mi jdice lo nu mi se ba'i lo nu nonkansa lo nu jmive cu ba spebi'o te zu'e lo nu na binxo lo ka seicni

ni'o pa lo nixli pe la maxpre pu tai melbi ja'e lo nu mi ba za binxo lo ka mutce lo ka prami ny .i ny zu'u nai pu nupre lo nu speni mi ca lo nu mi te pleji lo banzu be lo nu zbasu lo xagmau zdani se va'u ny .i se mu'i bo mi pu zukte lo ka gunka fi'o se camzma ro lo me lo purci moi .i ku'i lo bi'u nai nixli cu xabju fi'o kansa lo tolci'o ninmu poi na djica lo nu vo'a da speni .i ki'u bo ny tai lazni ja'e lo nu djica lo nu lo nixli cu stali gi'e jukpa gi'e nicygau lo zdani .i se mu'i bo lo tolci'o ninmu cu klama la palci termafyfe'i pe la stuna gi'e nupre lo nu dunda lo re lanme .e lo pa bakni va'o lo nu fanta lo nunspe .i ja'e bo la palci termafyfe'i cu malmafpli lo mi ka'amru .i je ca pa djedi poi nu mi xagrai selka'e katna mu'i lo nu djica lo nu cpacu lo cnino zdani .e lo mi speni ca lo cabjbicumrai zo'u: lo ka'amru cu malmu'u gi'e ka'arvi'u lo mi zunle tuple

ni'o ca lo nuncfa la'e di'u simlu lo ka barda malfunca .i ki'u bo mi pu djuno lo du'u lo nanmu poi se tuple pa da cu na ka'e xamgu mutce mudyka'a .i se ki'u bo mi pu klama lo tincyzba gi'e gasnu lo nu ty se va'u mi zbasu lo cnino tuple co tinci .i lo tuple cu xamgu gunka co'a lo nu mi friselsau tu'a ty .i ku'i lo mi selzu'e cu rinka lo nu la palci termafyfe'i pe la stuna cu fengu .i ki'u bo ty pu nupre fi lo bi'u nai tolci'o ninmu fe lo nu mi ba na speni lo melbi ke maxpre nixli .i ca lo nu mi za'u re'u co'a katna kei lo mi ka'amru cu malmu'u gi'e ka'arvi'u lo mi pritu tuple .i za'u re'u ku mi klama lo tincyzba .i je za'u re'u ku ty zbasu se va'u mi lo tuple co tinci .i ba la'e di'u lo se mafpli ka'amru cu ka'arvi'u lo mi birka (to lo pa moi pu tu'a lo re moi toi) .i je by se basti lo tinci birka .i ba bo la palci termafyfe'i cu gasnu lo nu lo ka'amru cu malmu'u gi'e ka'arvi'u lo mi stedu .i ca lo nuncfa mi jinvi lo du'u la'e di'u mi fanmo .i ku'i lo tincyzba cu funca lampagre .i je ty zbasu se va'u mi lo cnino stedu co tinci
 

ni'o mi pu jinvi lo du'u mi ca ba'o jinga fi la palci termafyfe'i kei gi'e gunka fi'o camzma ro lo me lo purci moi .i ku'i mi pu na te sidbo lo du'u ma kau ni lo mi bradi ka'e palci .i by finti lo cnino tadji be lo nu catra lo mi za'i prami lo melbi ke maxpre nixli kei gi'e za'u re'u gasnu lo nu lo ka'amru cu katna pagre lo mi xadni ja'e lo nu mi zilka'a lo re xadba .i za'u re'u ku lo tincyzba cu sidju mi gi'e zbasu se va'u mi lo xadni co tinci fau lo nu lasna lo mi tinci birka jo'u lo mi tinci tuple jo'u lo mi tinci stedu xy lo cidyterjo'e te zu'e lo nu mi kakne lo ka ru'u muvdu tai lo xagdu'i be lo me lo purci moi .i ku'i ui nai ca ku mi na se besna .i ja'e bo mi ba'o cirko pi ro lo mi ka prami lo bi'u nai maxpre nixli .i je mi pu na se vajni lo du'u xu kau mi spebi'o ny .i ru'a ny za'o xabju fi'o kansa lo laldo ninmu gi'e fau bo denpa lo nu mi klama ny

ni'o «lu lo mi xadni cu pu tai gusycai bu'u lo solgu'i .i ja'e bo mi pu jgira zei mutce xy .i je ca ku na vajni fa lo nu da'i lo mi ka'amru cu malmu'u .i ki'u bo na ka'e katna mi .i zasti fa pa po'o ckape be mi be'o noi nu lo mi cidyterjo'e cu furtirfarvi .i ku'i mi rajgau lo nu mi ralte lo ctile lante pe bu'u lo mi cmazda kei gi'e kurji lo nu mi ca ro nu nitcu cu ctilypu'i mi .i ku'i ca pa djedi poi nu mi mo'ifli lo nu zukte la'e di'u cu suksa zvati fa mi lo carvi vilti'a .i pu lo nu mi pensi lo ckape kei lo mi cidyterjo'e ba'o furtirfarvi .i je mi jai se bapli fai lo ka sanli stali ne'i lo ricfoi je co'u lo nu do klama gi'e sidju mi .i lo xlatce mi pu li'i lifri la'e di'u .i ku'i ze'a lo nanca noi nu mi bu'u sanli cu zifre lo ka pensi lo du'u lo brarai be lo mi nuncri be'o poi mi pu lifri cu nu cirko lo mi risna .i mi ca lo nu ca'o prami cu traji lo ka gleki kei lo ro remna pe lo terdi .i ku'i no prenu poi na se risna cu ka'e prami .i se ki'u bo mi zu'ejdi lo nu mi ba cpedu fi la .oz. fe lo nu dunda pa boi ry mi .i va'o lo nu .obu ja'a co'e kei mi ba xruti lo maxpre nixli gi'e spebi'o ny


ni'o ge la .dorotis. gi la cpitepygau pu ca'o mutce lo ka se cinri lo lisri be la tinci mudypre kei gi'e ca djuno lo du'u ma kau krinu lo nu my tai djica lo nu cpacu lo cnino risna

ni'o «lu to'e ki'u nai ku —sei la cpitepygau cu cusku— zo'u: .ai mi cpedu tu'a lo besna .e nai lo risna .i ki'u bo da'i lo bebna na djuno lo du'u .ei pilno ry ma kau va'o lo nu se risna li'u»

ni'o «lu .ai mi cuxna lo risna —sei la tinci mudypre cu spuda— .i ki'u bo lo nu da se besna cu na se jalge lo nu da gleki .i je lo nu gleki cu xagrai lo ro da pe lo munje li'u»

ni'o la .dorotis. cu cusku no da .i ki'u bo dy cu se cfipu lo du'u ma kau poi me lo re pendo cu drani kei gi'e jdice lo du'u va'o lo nu do'a nai dy ka'e xruti la .kanzas. .e la fetfamti .em. cu na vajni mutce fa lo du'u ji kau gi'e gi la mudypre na se besna gi la cpitepygau na se risna gi lo re da cu cpacu lo se djica

ni'o traji lo ka se xanka dy kei fa lo nu ge lo nanba cu na ru'e ba'o se xaksu gi lo ziljmina sanmi cu jai se jalge lo nu lo lanka cu kunti .i ju'o ge nai la mudypre gi nai la cpitepygau cu su'o roi citka da .i ku'i dy marji ge nai lo tinci gi nai lo sudysrasu .i je na ka'e jmive va'o lo nu na se djasabji
 

 







lo se mànci te màkfa pe la .oz.
ni'o ni'o xa mo'o
la tolvirnu cinfo

ni'o ze'a ku la .dorotis. .e lo ri kansa cu cadzu pa'o lo denmi ricfoi .i lo klaji cu fe'e za'o se gacri lo pelxu kitybli .i ku'i ky se gacri lo sudbi'o ricyjimca jo'u lo morsi pezli vu'o pe lo tricu .i je lo nu cadzu na sai pluka

ni'o so'u cipni cu zvati lo vi pagbu be lo ricfoi .i ki'u bo lo cipni cu prami lo kunti nurma noi ke'a se solgu'i mutce .i ku'i ca da fa'u de lo dizlo se cmoni be lo danlu poi se mipri lo tricu cu se cmoni .i lo di'u savru cu gasnu lo nu lo risna be lo cmalu nixli cu sutra slilu ki'u lo nu ny na djuno lo du'u ma kau krasi vo'a .i ku'i la .totos. cu djuno gi'e cadzu ne'a la .dorotis. gi'e na spuda fi lo nu cmoni ji'a sai


ni'o «lu ma temci —sei lo verba fi la tinci mudypre cu retsku— fi lo nu ma'a bartu lo ricfoi li'u»

ni'o «lu mi na ka'e djuno —sei te spuda— .i ki'u bo mi pu no roi zvati la ri'ojme tcadu .i ku'i lo mi patfu pu pa roi klama ca lo nu mi nanla .i je py cu cusku lo se du'u ge clani nu litru pa'o lo ckape gugde gi ku'i bu'u lo zmadu be fi lo ka jibni lo tcadu poi la .oz. cu xabju zo'u lo gugde cu melbi .i ku'i mi ze'a lo nu mi tolcau lo mi tinci lante cu na terpa .i je no da ka'e crogau la cpitepygau .i je do zu'u nai bevri bu'u lo mebri lo barna pe lo nuncinba pe la vrude termafyfe'i .i je la'e di'u do bandu lo ckape li'u»

ni'o «lu ku'i la .totos. zo'u —sei lo nixli cu xanka cusku— ma ba bandu ty li'u»

ni'o «lu .ei ma'a jai bandu va'o lo nu ty cu se ckape —sei la tinci mudypre cu spuda— li'u»

ni'o zi ca lo nu my cu tavla kei lo mabla cladu bo selcmo cu sance ra'i lo ricfoi .i je ca lo bavlamji mokca lo barda cinfo cu plipe lo klaji .i cy fau lo nu pa roi darxi fi lo xance cu gasnu lo nu la cpitepygau fau lo nu so'i roi sezycarna cu vofli fa'a lo korbi be lo klaji kei gi'e ba bo darxi la tinci mudypre fi lo kinli jgalu .i ku'i se ri'a lo nu la cinfo cu se spaji kei lo jgalu cu te prina lo tinci no da .i ku'i la mudypre cu farlu lo klaji gi'e muvycau cpana

ni'o la .totos. ku noi cmalu ku'o ca lo cabna noi nu da bradi cu gercmo bajra fa'a la cinfo .i je lo barda danlu ba'o kargau lo moklu te zu'e lo nu batci lo gerku .i ca bo la .dorotis. fau lo nu xanka lo nu da'i la .totos. cu se catra kei .e lo nu na sanji lo ckape cu fa'a ca'u bajra gi'e xancrada'i se rai lo kamtsa gi'e ca bo krixa:

ni'o «lu ko na sai darsi lo nu batci la .totos .i .ei do ckeji lo nu do noi barda danlu cu batci lo uu cmalu gerku li'u»

ni'o «lu mi pu na batci gy —sei la cinfo fau lo nu satre lo ve darxi be fi lo ri nazbi cu cusku— li'u»

ni'o «lu go'i .i ku'i do pu troci —sei dy xrugau— .i do du no na'e bo lo tolvirnu mutce li'u»

ni'o «lu mi djuno —sei la cinfo fau lo nu lo stedu cu ckeji dandu cu cusku— .i mi pu ro roi djuno .i ku'i .ei mi mo kau li'u»

ni'o «lu ju'o mi na djuno .i ue sai do darxi lo terse'a prenu ne mu'u la uu cpitepygau li'u»

ni'o «lu xu terse'a fa cy —sei la cinfo cu retsku be fau lo nu se spaji bei ca lo nu catlu lo nu dy lafti la cpitepygau gi'e sa'irgau fo lo jamfu fau lo nu seltamgau cy lo drani tarmi

ni'o «lu li'a cy terse'a —sei la .dorotis. ku noi za'o fengu cu spuda— li'u»

ni'o «lu la'e di'u krinu lo nu tai frili vofli —sei la cinfo cu te notci— .i pu spaji mi fa lo nu cy cu tai ru'u carna .i xu lo drata ku ji'a terse'a li'u»

ni'o «lu na go'i —sei la .dorotis. cu cusku— .i ri marji lo tinci li'u» .i dy cu sidju la mudypre lo nu di'a sanli

ni'o «lu la'e di'u krinu lo nu ri na ru'e kilcrigau lo mi jgalu —sei la cinfo cu cusku— .i ca lo nu jy. sraku lo tinci kei lo lenku nundesku cu ri'a fa'a ni'a muvdu fo lo mi trixe .i lo va cmalu danlu poi do tai nelci zei mutce cu mo li'u»

ni'o «lu me la .totos. ku noi gerku me mi moi —sei la .dorotis. cu spusku— li'u»

ni'o «lu pau ty marji lo tinci gi'i terse'a —sei la cinfo cu retsku— li'u»

ni'o «lu na gi'e nai .i ty .y .y .y rectu gerku —sei lo nixli cu cusku— li'u»

ni'o «lu ua sai .i ty cinri danlu gi'e simlu lo ka cmalu mutce kei mi pe ca lo nu nau ba'o catlu ty .i no da po'u na'e bo lo tolvirnu be mu'u mi cu su'o mu'ei pensi lo nu batci lo tai cmalu —sei la cinfo cu di'a badri cusku— li'u»

ni'o «lu ki'u ma do tolvirnu —sei la .dorotis. fau lo nu manci catlu lo barda danlu ki'u lo nu cy cu bradu'i lo cmalu xirma cu retsku— li'u»

ni'o «lu na ka'e te djuno —sei la cinfo cu spusku— .i ru'a mi tai jbena .i ro lo drata danlu pe lo ricfoi cu li'a kanpe lo nu mi virnu kei ki'u lo nu lo cinfo bu'u ro da cu jai se jinvi fai lo ka me la noltru be lo danlu .i mi pu cilre lo du'u ca lo nu mi cladu mutce cmoni kei ro lo jmive cu terpa gi'e to'o klama .i ca ro nu mi penmi lo remna kei mi pu mutce lo ka terpa .i ku'i sa'u mi cladu cmoni fa'a ry .i je ry cu ro roi to'o bajra se rai lo ka sutra .i va'o lo nu da'i lo xanto .a lo tirxu .a lo cribe cu su'o roi troci lo ka damba mi zo'u ju'o mi si'a to'o bajra .i mi tai tolvirnu .i ku'i zi sai ca lo nu xai tirna lo nu mi cmoni zo'u ro boi xy cu troci lo ka binxo lo darno be mi .i je li'a mi curmi lo nu xy klama li'u»

ni'o «lu ku'i la'e di'u na drani .i la noltru be lo danlu cu .ei na tolvirnu —sei la cpitepygau cu cusku— li'u»


ni'o «lu mi djuno —sei la cinfo cu spuda be fau lo nu vimcu lo pa se klaku lo kanla se pi'o lo jipno be lo rebla— .i barda se badri gi'e se jalge lo nu mi tolgei lo mi nunjmive .i ku'i ca ro nu ckape kei lo mi risna cu co'a sutra slilu li'u»

ni'o «lu ju'o cu'i do risna bilma —sei la tinci mudypre cu cusku— li'u»

ni'o «lu cumki —sei la cinfo cu cusku— li'u»

ni'o «lu va'o lo nu ja'a co'e kei —sei la tinci mudypre cu di'a co'e— do gleki .ei .i ki'u bo je'urja'o lo du'u do se risna .i mi zo'u mi na se risna .i se ki'u bo mi na ka'e risna bilma li'u»

ni'o «lu ju'o cu'i —sei la cinfo cu pensi cusku— mi va'o lo nu da'i na se risna cu na tolvirnu li'u»

ni'o «lu xu do se besna —sei la cpitepygau cu retsku— li'u»

ni'o «lu ru'a go'i .i mi pu no roi catlu zukte fi lo nu facki —sei la cinfo cu spusku— li'u»

ni'o «lu mi klama la banli .oz. te zu'e lo nu cpedu fi .obu fe lo nu dunda lo besna mi —sei la cpitepygau cu te notci— .i ki'u bo lo mi stedu cu culno lo sudysrasu li'u»

ni'o «lu je mi ba cpedu fi .obu fe lo nu dunda lo risna mi —sei la mudypre cu cusku— li'u»

ni'o «lu je mi ba cpedu fi .obu fe lo nu xrugau benji .i je la .totos. la .kanzas. —sei la .dorotis. cu jmina cusku— li'u»

ni'o «lu xu do sruma lo du'u la .oz. cu ka'e dunda lo kamvirnu mi —sei la tolvirnu cinfo cu retsku— li'u»

ni'o «lu frili dunli lo nu da'i .obu dunda lo besna mi —sei la cpitepygau cu cusku— li'u»

ni'o «lu si'a lo nu da'i dunda lo risna mi —sei la tinci mudypre cu cusku— li'u»

ni'o «lu si'a lo nu da'i xrugau benji mi la .kanzas. —sei la .dorotis. cu cusku— li'u»

ni'o «lu va'o ku mi va'o lo nu do na se nabmi cu klama kansa do —sei la cinfo cu cusku— .i ki'u bo lo mi nunjmive cu sa'u na ka'e se jdari se cau lo nu virnu milxe do'a nai li'u»

ni'o «lu da'i do zankansa —sei la .dorotis. cu spusku— .i ki'u bo do ba sidju fi lo nu dargau lo drata cilce bo danlu .i dy simlu fi mi fe lo ka ce'u do zmadu lo ka tolvirnu kei gi'a nai tepygau zei curmi fau lo nu do tai se frili li'u»

ni'o «lu dy ca'a co'e —sei la cinfo cu cusku— .i ku'i la'e di'u na gasnu lo nu mi zenba lo ka virnu kei lo cmarai .i je mi ze'a lo nu mi djuno lo du'u mi tolvirnu cu ju'o tolgei li'u»

ni'o ja'e bo lo cmalu bende cu za'u re'u co'a litru .i la cinfo cu barda stapa cadzu ne'a la .dorotis. .i la .totos. ca lo nuncfa cu na zanru lo bi'u nai cnino kansa .i ki'u bo ty na ka'e tolmo'i lo du'u ty pu na ru'e se marxa fi'o se jbini lo barda xance be la cinfo .i ku'i ba za lo temci ty zenba lo ka kufra .i je ca ku la .totos. jo'u la tolvirnu cinfo ba'o binxo lo xamgu pedysi'u

ni'o ze'a lo djedi se vimcu cu fasnu fa no se jmina ckape poi zunti lo nu panpi pe lo ra nu litru .i pa roi ku je'u la tinci mudypre cu stapa lo cakcinki poi cpare lo klaji ku'o gi'e catra lo uu cmalu .i la'e di'u gasnu lo nu la tinci mudypre cu badri mutce .i ki'u bo my cu ro roi kurji jundi lo nu na crogau su'o jmive .i je fau lo nu cadzu cu klaku lo so'i kakydirgo pe lo ka badri .e lo ka xenru .i lo bi'u nai kakydirgo cu masno nitmu'u fo lo flira gi'e nitmu'u fo lo cidyterjo'e pe lo xedja noi bu'u ke'a ky furtirfarvi .i ca lo ca nu la .dorotis. cu retsku da ty my kei la tinci mudypre na kakne lo ka kargau lo ri moklu .i ri'a bo lo ra xedja cu simxu lo ka kluza snipa ri'a tu'a lo furtirse .i ty my mutce lo ka terpa la'e di'u kei gi'e muvgau lo birka fa'a la .dorotis. tai so'i da te zu'e lo nu sinxa lo du'u .ei la .dorotis. cu sidju .i ku'i dy na jimpe .i la cinfo ku ji'a se cfipu lo du'u ma kau ca'o malfau .i ku'i la cpitepygau cu lebna lo ctile lante lo lanka pe la .dorotis. gi'e ctilypu'i lo xedja be la mudypre ja'e lo nu ba za lo so'u mokca my di'a kakne lo ka tavla

ni'o «lu ja'o pu nunctu fi mi —sei ty my cusku— lo du'u .ei mi jundi lo du'u mi ma kau stapa .i ki'u bo mi va'o lo nu da'i mi catra lo ziljmina cinki cu ju'o ba za'u re'u fantynalka'e lo nu klaku .i je lo nu klaku cu rinka lo nu lo mi xedja cu furtirfarvi ja'e lo nu mi na ka'e tavla li'u»

ni'o ba bo ty my cadzu se kai lo ka capyju'i mutce kei fau lo nu lo kanla cu catlu lo dargu .i je ca ro nu ty my viska lo cmalu manti poi camgu'a cpare lampagre cu ravystapa te zu'e lo nu na xrani my .i la tinci mudypre cu ja'a djuno lo du'u na se risna kei gi'e se ki'u bo kurji zei mutce lo nu no roi kusru da

ni'o «lu do no'u lo prenu poi se risna —sei my cusku— cu tolcau da poi gidva do ku'o gi'e no roi nitcu lo ka srera .i ku'i mi na se risna .i se ki'u bo mi bilga lo ka jundi mutce .i ca lo nu la .oz. ba'o dunda lo risna mi zo'u: li'a na sarcu fa la'e di'u li'u»

 






lo se mànci te màkfa pe la .oz.
ni'o ni'o ze mo'o
lo nu litru se ka'a la banli .oz.

ni'o lo ro da cu bilga lo ka ginka bu'u lo bartu ca lo ca nicte ni'a lo barda tricu poi nenri lo ricfoi .i ki'u bo no dinju cu jibni .i lo troci cu xamgu ke rotsu gacri co bandu fi lo lunsa .i je la tinci mudypre cu katna fi lo barda derxi se pi'o lo ka'amru .i je la .dorotis. cu zbasu lo banli fagri poi glagau dy gi'e se jalge lo nu dy jdika lo ka seicni .i dy jo'u la .totos. cu citka lo ro moi be lo vo'a nanba .i je ca ku dy na djuno lo du'u lo re mei ba mo kau te zu'e tu'a lo cersai li'u»

ni'o «lu va'o lo nu do djica zo'u —sei la cinfo cu cusku— mi ba nerkla lo ricfoi gi'e catra lo mirli se va'u do .i do ka'e jukpa se pi'o lo fagri (to mukti fa lo nu do zmanei lo se glajukpa cidja toi) gi'e ba bo tolcau lo xamgu mutce cersai li'u»


ni'o «lu .e'o ko na co'e pe'u do'u —sei la mudypre cu cpedu— .i ju'o mi klaku fi lo nu da'i do catra lo uu mirli .i je ba bo lo mi xedja cu za'u re'u furtirfavri li'u»

ni'o ku'i la cinfo cu cliva klama lo nenri be lo ricfoi gi'e tolcri lo sevzi vacysai .i je no da ca su'o da cu djuno lo du'u vy mo kau .i ki'u bo cy na tavla fi ri .i je la cpitepygau cu tolcri lo tricu poi culno lo narge ku'o gi'e clugau lo lanka pe la .dorotis. ny te zu'e lo nu dy ze'u na xagji .i dy jinvi lo du'u la'e di'u zo'u: la cpitepygau cu mutce lo ka xendo gi'e xagypei .i ku'i dy carmi cmila ri'a lo juxre nu cy. lafti lo narge .i lo kicne xance cu tai juxre .i je lo narge cu tai cmalu .i ja'e bo ny poi cy ke'a falcru cu ja'a ru'e se zmamei ny poi cy ke'a punji lo lanka .i ku'i la cpitepygau na se nabmi gi'e na se vajni lo du'u ma kau ditcu lo nu clugau lo lanka .i ki'u bo cumri'a lo nu cy cu stali lo darno be lo fagri .i je cy cu xanka lo nu lo fagyka'u cu zvabi'o lo cy. sudysrasu gi'e jelgau cy .i se mu'i bo stali lo darno be lo fagri gi'e klama lo jibni ca lo po'o pa nu la .dorotis. cu vrebi'o te zu'e lo nu sipna kei kei te zu'e lo nu selgaigau dy lo sudga pezli .i py gasnu lo nu dy. glare je tagji kufra .i je dy. condi sipna co'u lo cerni

ni'o ca lo donri lo nixli cu jirgau lo ri flira lo cmalu ke se cinje cmari'e .i je ba za bo lo ro da cu co'a litru fa'a la ri'ojme tcadu

ni'o lo litru pu'o lifri lo djedi poi ca ke'a so'i da fasnu .i ly ja'a ru'e ba'o cadzu ze'a lo cacra .i ca bo ly. viska lo crane be ly. be'o poi barda fenra poi pagre lo dargu gi'e fendi lo ricfoi bu'u ro lo re mlana .i ganra mutce fenra .i je ca lo nu parkla lo korbi gi'e catlu lo cnita cu viska lo nu mutce lo ka condi ji'a .e lo nu so'i barda je kilselkoi rokci cu zvati lo loldi .i lo re mlana cu tai nitsalpo ja'e lo nu no lo litru ka'e cnita cpare .i ze'a lo mokca cu simlu lo ka nu lo nunli'u cu na ka'e na tolcfa

ni'o «lu .ei ma'a mo —sei la .dorotis. cu tolpacna cusku— li'u»

ni'o «lu mi na te sidbo fi lo cmarai —sei la tinci mudypre cu cusku be fau lo nu la cinfo cu desygau lo ri kalsa ne'okre gi'e pensi simlu— li'u»

ni'o ku'i la cpitepygau cu cusku «lu mi'o na ka'e vofli .i la'e di'u se birti .i ji'a na ka'e cpare fa'a ni'a lo vi barda fenra .i se ki'u bo mi'o ga nai na ka'e ragve plipe gi .ei sisti bu'u lo ca se zvati be mi'o li'u»

ni'o «lu pe'i mi ka'e ragve plipe —sei la tolvirnu cinfo ba lo nu ralci menli bo merli lo nildarno cu cusku li'u»

ni'o «lu va'o ku mi'o na se nabmi —sei la cpitepygau cu spuda— .i ki'u bo do ka'e bevri ro mi'a lo ragve ca pa drata li'u»

ni'o «lu .i'a .i mi ba troci —sei la cinfo cu cusku— .i ma pa moi li'u»

ni'o «lu mi —sei la cpitepygau cu jdice— .i ki'u bo va'o lo nu do facki lo du'u na snada zei kakne lo ka ragve plipe zo'u: la .dorotis. cu mrobi'o .i fa'u la tinci mudypre cu mabla selkevbi'o ri'a tu'a lo ni'a rokci .i ku'i va'o lo nu mi cpana lo do trixe cu na tai nabmi .i ki'u bo lo nu farlu cu na sai crori'a mi li'u»

ni'o «lu mi ji'a mutce lo ka terpa lo nu farlu —sei la tolvirnu cinfo cu cusku— .i ku'i ru'a sarcu fa lo nu troci .i ja'o ko tsebi'o lo mi trixe .i ba ku mi'o troci li'u»

ni'o la cpitepygau cu tsebi'o lo trixe be la cinfo .i je lo barda danlu cu cadzu klama lo korbi be lo brafe'a gi'e dzibi'o

ni'o «lu ki'u ma na ku do bajra gi joi plipe —sei la cpitepygau cu retsku— li'u»

ni'o «lu ki'u lo nu la'e di'u na se tarti mi'a noi cinfo ku'o lo tamsmi —sei spuda— li'u» .i ba bo la cinfo fau lo nu banli plipe cu cecla vofli pagre lo vacri gi'e snura zvabi'o lo ragve .i lo drata cu mutce lo ka gleki lo nu viska lo nu tai frili la cinfo .i je cy ca lo nu la cpitepygau ba'o co'u zutse lo trixe cu za'u re'u plipe lo ragve be lo brafe'a

ni'o la .dorotis. cu jdice lo nu re moi .i se ki'u bo birka jgari la .totos. gi'e cpare lo trixe be la cinfo fau lo nu tagji jgari lo ne'okre lo pa xance .i ca lo bavla'i mokca cu simlu lo ka nu la .dorotis. cu vofli pa'o lo vacri .i je ba zi bo dy pu lo nu ka'e pensi lo fasnu cu snura tolcliva lo ragve .i la cinfo cu ci re'u xruti gi'e lebna la tinci mudypre .i je lo ro da tsebi'o ze'a lo temci te zu'e lo nu la cinfo ka'e surla .i ki'u bo lo barda nunplipe pe cy cu rinka lo nu tolcondi vasxu gi'e ta'irva'u tai tu'a lo barda gerku poi ba'o bajra ze'a lo dukse

ni'o lo gunma cu facki lo du'u lo ricfoi bu'u lo vi mlana cu denmi mutce gi'e manku je badri se jvinu .i ca lo nu la cinfo ba'o surla kei gy co'a litru ve ka'a lo pelxu kitybli dargu fau lo nu smaji kucli lo du'u xu kau ca da tolcliva lo fanmo be lo ricfoi gi'e di'a zvati lo carmi solgu'i .i zengau lo litru lo kamtolkufra fa lo ba za nu tirna lo cizra savru be ra'i lo condi ricfoi .i je la cinfo fi lo drata cu laurblesku lo se du'u lo vi gugde pagbu cu jai bu'u xabju fai la .kalidas.

ni'o «lu la .kalidas. cu mo —sei lo nixli cu retsku— li'u»

ni'o «lu ky cu xlali malda'u .i se xadni lo cribe simsa xadni gi'e se stedu lo tirxu simsa stedu —sei la cinfo cu spusku— gi'e se jgalu da poi tai clani gi'e kinli vau ja'e lo nu ka'e vlika'a mi lo re mei fi'o frili dunli lo nu da'i mi ka'e catra la .totos .i mi mutce lo ka terpa la .kalidas. li'u»

ni'o «lu mi na se spaji lo du'u do go'i —sei la .dorotis. cu spuda— .i ju'o ru'a ky mabla danlu li'u»

ni'o la cinfo cu pu'o spusku ca lo nu suksa fa lo nu tolcliva lo drata brafe'a be lo dargu .i ku'i lo vi brafe'a cu tai ganra gi'e condi vau ja'e lo nu la cinfo cu ba zi sai djuno lo du'u na ka'e plipe lo ragve

ni'o se ki'u bo lo gunma cu tsebi'o te zu'e lo nu pensi lo nu .ei mo kau .i je ba lo junri nu pensi kei la cpitepygau cu cusku

ni'o «lu vi barda tricu gi'e jibni lo brafe'a .i mi'o va'o lo nu la tinci mudypre ka'e katna lo tricu ja'e lo nu farlu lo ragve cu ka'e se frili lo nu ve ka'a cadzu li'u»

ni'o «lu la'e di'u klesi pa moi sidbo —sei la cinfo cu cusku— .i da'i da na ru'e sruma lo du'u nenri lo do stedu fa lo besna .e nai lo sudysrasu li'u»

ni'o la mudypre cu ba zi co'a gunka .i je ka'amru cu tai kinli ja'e lo nu lo tricu cu ba zi jibni lo ka se katna .i ba bo la cinfo cu punji lo ri tsali ke crane tuple lo tricu gi'e catke se rai lo ka vlipa .i lo tricu cu masno lo ka salpo binxo kei gi'e farlu fi'o sance lo lautce lo se ragve fau lo nu lo galraipau jimca cu cpana lo ragve

ni'o lo litru cu co'a ragve klama lo vi cizra cripu ca lo nu lo kinli selcmo cu gasnu lo nu vo'a fa'a ga'u catlu .i je se ri'a lo nu terpa carmi cu viska lo nu lo re barda danlu poi cribe se xadni gi'e tirxu se stedu cu fa'a bajra

ni'o «lu .kalidas. —sei la tolvirnu cinfo fau lo nu co'a tepydesku cu cusku— li'u»

ni'o «lu ko sutra —sei la cpitepygau cu krixa— .i je'u mi'o ragve klama li'u»


ni'o ja'e bo la .dorotis. cu pa moi lo klama fau lo nu birka jgari la .totos .i la tinci mudypre cu se lidne .i la cinfo to'e ki'u nai lo nu je'a terpa cu carna te zu'e lo nu fapro la .kalidas. kei gi'e ba bo cmoni lo tai cladu je mabla ja'e lo nu la .dorotis. cu krixa .e lo nu la cpitepygau cu trixe carna farlu .e lo nu lo ji'a sai tsali malda'u cu klasti gi'e se spaji catlu la cinfo

ni'o ku'i la .kalidas. se ja'e lo nu ge viska lo nu bramau la cinfo gi morji lo du'u ge re mei fa vo'a gi pa mei fa la cinfo cu di'a fa'a bajra .i je la cinfo cu klama lo drata fanmo be lo tricu gi'e carna te zu'e lo nu viska lo nu ky ba zi mo kau .i lo ji'a tsali malda'u se cau lo nu klasti ze'i lo mokca cu co'a co'e ve ka'a lo tricu .i je la cinfo fi la .dorotis. cu cusku:

ni'o «lu mi'o se maldimna .i ki'u bo ju'o ta ba vlika'a mi'o se pi'o lo ra kinli jgalu .i ku'i ko sanli ne'a ti'a mi .i je mi ta ba damba ze'a lo nu mi jmive li'u»

ni'o «lu ko ze'i denpa —sei la cpitepygau cu cladu cusku— li'u» .i cy pu ca'o pensi lo du'u ma kau se zukte xagrai .i ca cpedu fi lo mudypre fe lo nu katna vimcu lo tricu fanmo poi cpana lo vo'a ragve be lo brafe'a .i la tinci mudypre ba zi co'a pilno ri ka'amru .i je ca sai lo nu la .kalidas. cu na ru'e ba'o tolcliva lo tricu fanmo kei lo tricu cu farcu fi'o sance lo lautce fo lo brafe'a fau lo nu bevri lo tolmle je fe'ucmo malda'u .i je ro lo re da cu vlile se marxa bu'u lo kinli rokci be bu'u lo lolraipau

ni'o «lu ja'o —sei la tolvirnu cinfo fau lo nu clani ke co'urdu'u vasxu cu cusku— .i za'a mi'o ba za'o jmive ze'a lo se jmina .i je mi la'e di'u je'a gleki .i ki'u bo ju'o ru'a mutce lo ka to'e se kufra kei fa lo nu na jmive .i lo va danlu mi pu tai tepygau zei mutce ja'e lo nu lo mi risna cu za'o slilu sutra li'u»

ni'o «lu ui nai —sei la tinci mudypre cu badri cusku— .i .au mi se risna lo ka'e slilu li'u»

ni'o lo pu zi selfri cu se jalge lo nu lo litru se mau ro lo purci cu djica lo ka barbi'o lo ricfoi .i tai sutra lo ka cadzu .i ja'e bo la .dorotis. cu binxo lo ka tatpi kei gi'e nitcu lo ka se marce bu'u lo trixe be la cinfo .i mutce lo ka se gleki ly kei fa lo nu lo tricu cu jdika lo ka denmi kei pa'a lo nu ly. zenba lo ka klama ze'a ma kau .i je ca lo dormijba'i cu suksa fa lo nu tolyli'a lo ganra rirxe noi sutra flecu ne'a ca'u ly .i viska lo nu bi'u lo ragve be lo rirxe lo pelxu kitybli dargu cu pagre lo melbi nurma ne lo crino sastu'a poi se barna lo sorskari xrula ku'o fau lo nu pi ro lo dargu cu se korbi lo tricu poi mulno se dandu lo kukte grute .i ly mutce lo ka selpu'a lo ka viska lo bi'u nai kukte gugde noi crane

ni'o «lu ta'i ma mi'o ravykla lo rirxe —sei la .dorotis. cu retsku— li'u»

ni'o «lu frili se zukte —sei la cpitepygau cu spuda— .i la tinci mudypre cu bilga lo ka zbasu lo pinblo se va'u ma'a ja'e lo nu ma'a kakne lo ka fulta se ka'a lo ragve li'u»

ni'o ja'e bo la mudypre cu lebna lo ri ka'amru gi'e co'a katna lo cmalu tricu te zu'e lo nu zbasu lo pinblo .i ca lo nu my ca'o gunka kei la cpitepygau cu tolcri fi lo rirxe korbi fe lo tricu poi culno lo xamgu grute .i la'e di'u pluka la .dorotis. ku noi pu ze'a pi ro lo djedi cu citka no na'e bo lo narge zi'e noi ca jukpa lo banli sanmi lo makcu grute

ni'o ku'i lo nu da zbasu lo pinblo cu se ditcu va'o ji'a sai lo nu da to'e lazni gi'e na'e ta'irbi'o vau du'i tu'a la tinci mudypre .i ca lo nu co'a nicte zo'u: lo nu gunka na mulno .i se ki'u bo tolcri lo se kufra stuzi be ni'a lo tricu be'o noi bu'u ke'a co'u lo cerni cu sipna .i la .dorotis. cu senva la ri'ojme tcadu jo'u la vrude te makfa .oz. ku noi ba za xrugau benji dy lo zdani be dy

 






lo se mànci te màkfa pe la .oz.
ni'o ni'o bi mo'o
lo mrockape ke makpapi foldi

ni'o lo ma'a cmalu bende be lo litru cu cikybi'o ca lo za'u moi cerni fau lo nu di'a se livla gi'e culno lo ka pacna .i je la .dorotis. cu cersai citka tai tu'a lo noltruti'u lo najysmela jo'u lo zirsmela vu'o pe lo tricu poi jibni lo rirxe .i ti'a lo gunma cu zvati fa lo manku ricfoi poi gy ba'o pagre ke'a gi'e ku'i xlafri lo so'i nu se toldarsygau .i ku'i ca'u ku zvati fa lo melbi je se solgu'i gugde poi simlu lo ka xlura fi tu'a la ri'ojme tcadu

ni'o li'a lo ganra rirxe cu ca se ragve lo gunma lo va melbi gugde .i ku'i lo pinblo cu na ru'e mulno .i je ca lo nu la tinci mudypre cu ba'o katna lo su'o se jmina mudyspi gi'e lasna ri lo drata lo mudri pijne kei lo gunma cu bredi lo nu tolsti .i la .dorotis. cu tsebi'o bu'u lo midju be lo pinblo gi'e jgari la .totos. lo birka .i ca lo nu la tolvirnu cinfo cu stapa lo pinblo kei py cu salpo mutce binxo ki'u lo nu cy cu barda gi'e tilju .i ku'i la cpitepygau jo'u la tinci mudypre cu sanli lo drata fanmo te zu'e lo nu stogau by .i je jgari lo clani grana lo xance te pi'o lo nu catke muvgau lo pinblo fu lo djacu

ni'o lo gunma ca lo nuncfa cu xamgu snada .i ku'i ca lo nu tolcliva lo midju be lo rirxe kei lo sutra flecu cu catke lo pinblo fa'a lo dzifle ja'e lo nu darmau je darmau lo klaji pe lo pelxu kitybli .i je lo djacu cu binxo lo ka tai condi kei ja'e lo nu lo clani grana cu na ka'e lamji lo loldi

ni'o «lu ti xlali —sei la tinci mudypre cu cusku— .i ki'u bo mi'o va'o lo nu na snada lo ka tolcliva lo tumla cu ba se bevri fi lo gugde pe la palci termafyfe'i pe la stici .i je ty ba mafxlu mi'o gi'e gasnu lo nu mi'o ty cu selfu li'u»

ni'o «lu se va'o bo mi na te dunda lo besna —sei la cpitepygau cu cusku— li'u»

ni'o «lu si'a mi na te dunda lo ka virnu —sei la tolvirnu cinfo cu cusku— li'u»

ni'o «lu si'a mi na te dunda lo risna —sei la tinci mudypre cu cusku— li'u»

ni'o «lu si'a mi no roi xruti la .kanzas. —sei la .dorotis. cu cusku— li'u»

ni'o «lu .ei sai mi'o tolcliva la ri'ojme tcadu va'o lo nu kakne —sei la cpitepygau cu di'a co'e— li'u» .i catke se kai lo tai ka tsali kei ja'e lo nu lo clani grana cu selvicyjdari fi lo derpesxu pe lo rirxe loldi .i ba bo pu lo nu cy ka'e lacpu vimcu gi'a toljgari kei lo pinblo cu vlile se bevri to'o .i je la uu cpitepygau cu stali fau lo nu jgari lo grana kei lo midju be lo rirxe

ni'o «lu co'o li'u» se krixa cy fa'a lo drata noi mutce lo ka kecti fi lo nu cliva cy .i je'u la tinci mudypre cu co'a klaku gi'e ku'i fu'au morji lo du'u ka'e furtirse kei ja'e lo nu sudgau lo se klaku se pi'o lo jisystota'u pe la .dorotis.

ni'o li'a la'e de'u xlali la cpitepygau

ni'o «lu mi ca selxlamau mi pe lo nu pa re'u penmi la .dorotis. —sei cy pensi— .i pu jorne lo grana be bu'u lo gurni foldi noi bu'u ke'a mi kakne lo ka tepygau lo korvo kei do'a nai .i ku'i ju'o no da prali fi lo nu lo cpitepygau cu jorne lo grana be bu'u lo midju be lo rirxe .i ui nai ba'a mi ro mai ba no roi se besna li'u»

ni'o lo pinblo cu muvdu fa'a lo dzifle .i je la cpitepygau uu cu darno mutce binxo .i ba bo la cinfo cu cusku:


ni'o «lu .ei sai da se zukte fi lo nu nurgau mi'o .i pe'i mi kakne lo ka limna se ka'a lo rirxe korbi gi'e lacpu lo pinblo kei lo nu do tagji jgari lo jipno be lo mi rebla li'u»

ni'o ja'e bo cy cu plipe lo djacu .i je la tinci mudypre cu tagji jgari lo ra rebla .i ba bo la cinfo cu co'a limna klama se rai lo kamvlipa fa'a lo rirxe korbi .i nandu se gunka to'e ki'u nai lo du'u cy tai barda .i ku'i ba za se lacri to'o ne'i lo flecu .i je ba bo la .dorotis. cu jgari lo clani grana pe la tinci mudypre gi'e sidju fi lo nu catke lo pinblo fa'a lo tumla

ni'o lo ro da mutce lo ka tatpi kei ca lo nu tolcliva lo rirxe korbi gi'e te ka'a stapa lo melbi ke crino srasu .i je djuno lo ji'a du'u lo flecu pu bevri vo'a ve'a lo clani lo darno be lo pelxu kitybli dargu noi pluta la ri'ojme tcadu

ni'o «lu .ei mi'o ca mo —sei la tinci mudypre cu retsku be ca lo nu la cinfo cu tsebi'o lo srasu te zu'e lo nu curmi lo nu lo solgu'i cy sudgau— li'u»

ni'o «lu mi'o nitcu lo nu xruti lo dargu ta'i da —sei la .dorotis. cu cusku— li'u»

ni'o «lu xagrai lo se platu fa lo nu cadzu re'o lo rirxe korbi co'u lo nu mi'o di'a zvati lo dargu —sei la cinfo cu te notci— li'u»
 

ni'o ca lo nu lo gunma ba'o mo'u surla zo'u: la .dorotis. cu lebna lo ri lanka .i je gy co'a co'e re'o lo srasu ri'erkoi fa'a lo dargu poi lo rirxe pu bevri gy ke'a .i melbi gugde .i tolcau lo so'i xrula .e lo so'i grute tricu .e lo so'i solgu'i vu'o poi gekyzengau .i je lo litru va'o lo nu da'i na tai kecti la cpitepygau cu ka'e gleki mutce

ni'o ly cadzu se rai lo kamsutra fau lo nu la .dorotis. cu pa po'o roi klasti te zu'e lo nu crepu lo pa melbi xrula .i je ba lo temci la tinci mudypre cu krixa «lu ko catlu li'u»
 

ni'o ba ku lo ro da cu catlu lo rirxe gi'e viska lo nu la cpitepygau cu zvati lo ri grana bu'u lo midju be lo djacu fau lo nu simlu lo ka seicni je badri mutce

ni'o «lu ta'i ma mi'o ta ka'e sidju —sei la .dorotis. cu retsku— li'u»

ni'o la cinfo .e la mudypre cu stedu desygau ki'u lo nu na djuno .i se ki'u bo tsebi'o lo ri'erkoi gi'e caucni catlu la cpitepygau co'u lo nu vofli jbibi'o fa lo kiknoia poi ca lo nu viska vo'a cu klasti lo djacu korbi te zu'e lo nu surla

ni'o «lu do me ma gi ju'e klama ma —sei la kiknoia cu retsku— li'u»

ni'o «lu mi'e .dorotis. —sei lo nixli cu spuda— .i je ti mi pendo .i la tinci mudypre .i la tolvirnu cinfo .i mi'a klama la ri'ojme tcadu li'u»

ni'o «lu ti na drani dargu —sei la kiknoia cu cusku be fau lo nu se torni lo ri clani cnebo gi'e kinli catlu lo cizra bende

ni'o «lu mi djuno —sei la .dorotis. cu xrugau— .i ku'i mi'a pu cirko la cpitepygau gi'e kucli lo nu ta'i ma kau cpacu cy li'u»

ni'o «lu cy ma zvati —sei la kiknoia cu retsku— li'u»

ni'o «lu lo va rirxe —sei lo cmalu nixli cu spusku— li'u»

ni'o «lu mi va'o lo nu cy na tai ge barda gi tilju cu cpacu cy se va'u do —sei la kiknoia cu te notci— li'u»

ni'o «lu cy na sai tilju —sei la .dorotis. cu djica cusku— .i ki'u bo cy cu te setca lo sudysrasu .i je va'o lo nu do bevri cy mi'a zo'u: mi'a do ze'e ba tai ckire zei mutce li'u»

ni'o «lu .i'a mi ba troci —sei la kiknoia cu cusku— .i ku'i mi va'o lo nu facki lo du'u tilju dukse cu ba falcru cy lo rirxe li'u»

ni'o ja'e bo lo barda cipni cu mo'i ga'u vofli gi'e voikla ga'u lo djacu lo jai bu'u grana jorne be fai la cpitepygau .i ba bo la kiknoia fi lo ri barda jgalu cu co'a jgari la cpitepygau lo birka gi'e bevri cy lo ga'u vacri je ba bo lo ri'erkoi noi bu'u ke'a la .dorotis. .e la cinfo .e la tinci mudypre .e la .totos. cu zutse

ni'o la cpitepygau ca lo nu sanji lo nu di'a zvati lo ri pendo cu tai gleki ja'e lo nu pamjai ro boi py (to ji'a sai la cinfo .e la .totos. toi) .i je ca lo nu cadzu cu sanga «lu .tolderide'os. li'u» ca ro nu stapa .i tai geicni

ni'o «lu mi pu tai terpa lo nu bi'ai ro roi stali lo rirxe —sei la cpitepygau cu cusku— .i ku'i lo xendo kiknoia mi nurgau .i je mi va'o lo nu ca da mi se besna cu .ai tolcri lo bi'u nai kiknoia gi'e dunda fi cy fe lo nu mi xendo cy li'u»

ni'o «lu na sarcu —sei la kiknoia ku noi vofli jibni kansa cu cusku— .i mi ro roi gleki lo nu sidju lo se raktu .i ku'i nitcu lo nu cliva ca .i ki'u bo lo mi cifnu mi denpa bu'u lo cpizda .i mi pacna lo nu ge do ba tolcri la ri'ojme tcadu gi la .oz. do ba sidju li'u»

ni'o «lu ki'e do —sei la .dorotis. cu spuda— li'u» .i je ba bo la xendo kiknoia cu mo'i ga'u vofli gi'e ba zi bo co'u se viska

ni'o lo gunma cu ca'o cadzu fau lo nu tinju'i lo se sanga be la sorska cipni gi'e catlu lo melbi xrula noi fe'e ca binxo lo tai rotsu ja'e lo nu lo loldi cu se gacri xy .i zvati fa lo barda ke pelxu fa'u blanu fa'u zirpu xrula je ji'a lo barda girzu co fagri xunre makpapi noi tai carmi skari ja'e lo nu na ru'e visnalka'e fa lo kanla be la .dorotis.

ni'o «lu xu ta na melbi —sei lo nixli cu retsku be fau lo nu vasxu lo cpina panci be lo carmi xrula— li'u»

ni'o «lu ru'a ja'a go'i —sei la cpitepygau cu spusku— .i mi ca lo nu se besna cu nelci zenba la'a li'u»

ni'o «lu mi va'o lo .au nu se risna cu prami ta —sei la tinci mudypre cu jmina cusku— li'u»

ni'o «lu mi pu ro roi nelxi lo xrula —sei la cinfo cu cusku— .i xy simlu lo ka tai seldjucau je ruble .i ku'i no lo xrula pe lo ricfoi cu carmi dunli ta li'u»

ni'o lo gunma co'a lampagre lo se jmina je se jmina ke barda makpapi jo'u lo memyme'a zenba be lo drata xrula .i je ba zi zvati lo midju be lo barda makpapi bo foldi .i ka'u misno fatci fa lo du'u va'o lo nu lo tai xrula cu tai so'i mei kei lo panci cu tai tsali ja'e lo nu ro da poi vasxu py cu sipybi'o .i je lo sipna va'o lo nu na to'o se bevri cu ze'e be sipna .i ku'i la .dorotis. na djuno la'e di'u .i je nai dy ka'e darbi'o lo carmi je xunre xrula noi fe'e ro roi ru'u zvati .i ja'e bo lo kanla be dy cu ca'o tilju binxo .i je dy cinmo lo ka nitcu lo nu tsebi'o te zu'e lo nu surla gi'e sipna

ni'o ku'i la tinci mudypre cu na curmi la'e di'u
 

ni'o «lu .ei mi'o sutra ja'e lo nu xruti lo pelxu kitybli dargu pu lo nu manku —sei ty my cusku— li'u» .i je la cpitepygau cu tugni .i ja'e bo ca'o cadzu co'u lo nu la .dorotis. na za'o ka'e sanli .i lo ri kanla cu ga'orbi'o to'e ki'u nai tu'a dy .i je dy cu tolmo'i lo du'u zvati ma kau kei gi'e farlu lo jbini be lo makpapi fau lo nu condi sipna

ni'o «lu .ei mi'o mo —sei la tinci mudypre cu retsku— li'u»

ni'o «lu va'o lo nu mi stacru ta ti kei ta ba mrobi'o —sei la cinfo cu cusku— .i lo panci be lo xrula cu catra ro mi'o .i mi ja'a ru'e ka'e stogau lo kanla lo ka kalri .i je lo gerku cu xa'o sipna li'u»

ni'o jetnu .i la .totos. pu farlu ne'a lo ri cmalu jitro .i ku'i la cpitepygau .e la tinci mudypre vu'o noi na marji lo rectu cu na se raktu tu'a lo panci be lo xrula

 
ni'o «lu ko bajra sutra —sei la cpitepygau fi la cinfo cu cusku— gi'e barkla lo vi mrori'a ke xlura foldi se rai lo kamsutra .i mi'o ba bevri lo cmalu nixli .i ku'i va'o lo nu da'i do sipybi'o zo'u: do dukse lo ka barda kei lo nu se bevri li'u»

ni'o ja'e bo la cinfo cu sa'irbi'o gi'e crane bajra se rai lo kamsutra .i ba lo mokca cu co'u se viska
 

ni'o «lu .e'u mi'o zbasu lo stizu lo mi'o xance gi'e bevri ta —sei la cpitepygau cu cusku— li'u» .i ja'e bo lafti la .totos. gi'e punji lo gerku lo tsetupyzbe be la .dorotis. gi'e ba bo zbasu lo stizu lo vo'a xance poi stizu ku'o jo'u lo vo'a birka poi stizu birka ku'o gi'e bevri lo sipna nixli pa'o lo xrula

ni'o cadzu joi cadzu .i je lo barda lolgai co mrori'a xrula poi sruri cu simlu lo ka se fanmo no da .i lo litru cu jersi lo kruvi be lo rirxe gi'e ro mai penmi lo vo'a pendo no'u la cinfo zi'e noi condi sipna vreta lo jbini be lo makpapi .i lo xrula pu dukse lo ka tsali kei tu'a lo barda mutce danlu .i je dy pu randa ca lo fanmo gi'e farlu lo loldi vi lo cmalu ki lo korbi be lo makpapi foldi be'o noi fe'e co'a ke'a lo kukte srasu cu pre.a lo melbi ke crino foldi ca'u lo litru


ni'o «lu —sei la tinci mudypre cu badri cusku— .i ki'u bo dukse lo ka tilju kei lo nu se lafti .i mi'o nitcu lo nu stagau ta ti ja'e lo nu ze'e sipna gi'e ju'o cu'i senva lo nu ba'o tolcri lo ka virnu ro mai li'u»

ni'o «lu mi kecti —sei la cpitepygau cu cusku— .i la cinfo pu xamgu mutce pendo ma'i lo tai tolvirnu .i ku'i .e'u mi'o di'a klama li'u»

ni'o bevri lo sipna nixli lo melbi stuzi poi jibni lo rirxe zi'e noi lo ni darno lo makpapi foldi cu banzu lo nu fanta lo nu ny cu vasxu lo se jmina ke vindu pe lo xrula .i je bu'u ku toljursa punji ny lo ranti srasu gi'e denpa lo nu lo blebi'e cu cikygau ny
 

 






lo se mànci te màkfa pe la .oz.
ni'o ni'o so mo'o
la noltrufe'i be lo tumla smacu

ni'o «lu mi'o ca na ka'e darno lo klaji pe lo pelxu kitybli —sei la cpitepygau cu te notci be fau lo nu sanli re'o lo nixli— .i ki'u bo mi'o ba'o na ru'e klama ve'a lo jai ve'a fardukti se bevri be lo rirxe li'u»

ni'o la tinci mudypre cu spuda pu'o lo nu tirna lo dizlo se cmoni .i je my fau lo nu cargau lo stedu kei (to noi melbi se snada va'o tu'a lo cidni toi) cu viska lo nu lo fange danlu cu plipe bajra lo srasu fa'a xai .i je'u dy du lo pelxu cicmlatu .i je la tinci mudypre cu pensi lo du'u ju'o cy cu jersi da kei ki'u lo nu lo kerlo be cy cu vreta jibni lo stedu kei .e lo nu lo moklu cu ganra kalri fau lo nu jarco lo re tolmle denci linji ca lo nu lo xunre kanla cu carmi tai lo fagri bolci .i ca lo nu ca'o jibni binxo kei la tinci mudypre cu viska lo nu ca'u lo danlu cu bajra fa lo cmalu foldi bo smacu kei gi'e djuno to'e ki'u nai lo nu na se risna kei lo du'u toldra fa la cicmlatu lo ka troci lo ka catra lo tai melbi je tolckape danlu
 

ni'o se ki'u bo la mudypre cu lafti lo ri ka'amru .i je ca lo nu la cicmlatu cu jibni binxo cu sligau sutra darxi cy se ri'a lo nu lo stedu be lo danlu cu klina katna se vimcu fi lo xadni .i je dy cu ganro bu'u lo jamfu be my ja'e lo re spisa

ni'o lo tumla smacu mu'i lo nu ca ba'o se nurgau fi tu'a lo bradi cu klasti .i je fau lo nu klama zei masno la mudypre cu cusku se pi'o lo galto'a ke cmalu voksa di'e

ni'o «lu .i'o ki'e do'u .i ki'e sai .i do nurgau lo mi nunjmive li'u»

ni'o «lu .e'o ko na tavla fi la'e di'u —sei la mudypre cu spusku— .i mi na se besna .i se ki'u bo mi racli jundi lo ro nu da'i da nitcu lo pendo .i ju sai lo da'i pendo cu smacu !po'o li'u»

ni'o «lu le'o smacu po'o —sei lo cmalu danlu cu se fanza krixa— .i je'u mi noltrufe'i .i noltrufe'i lo ro tumla smacu li'u»

ni'o «lu ua je'e —sei la mudypre cu cusku be fau lo nu krorinsa— li'u»


ni'o «lu ki'u ku do ba'o zukte lo banli je ji'a lo se virnu ta'i lo nu nurgau lo mi nunjmive —sei la noltrufe'i cu jmina cusku— li'u»

ni'o ca bo lo so'o smacu cu ca'o fa'a bajra se rai lo sutra se jimte be lo nu lo tuple ka'e bevri sy .i je ca lo nu viska la noltrufe'i cu cladu cusku di'e

ni'o «lu doi ga'i nai noltru mi'a pu jinvi lo du'u do ba se catra .i ta'i ma do snada lo ka renvi tu'a la barda cicmlatu li'u» .i ro lo smacu cu tai dizlo krobi'o fa'a lo cmalu noltrufe'i ja'e lo nu sy na ru'e sanli fi lo stedu

ni'o «lu lo vi xajmi tinci bo nanmu —sei ny spusku— pu catra la cicmlatu gi'e nurgau lo mi nunjmive .i se ki'u bo co'a lo cabna lo ro do cu selfu .ei gi'e tinbe lo cmarai ku ji'a sai li'u»

ni'o «lu mi'a ja'a co'e —sei lo ro smacu cu galto'a krixa kansi'u .i ba bo sy cu preja fa'a ro da .i ki'u bo la .totos. pu ba'o cikybi'o gi'e ca gleki gercmo mu'i lo nu viska lo vi so'i smacu kei gi'e plipe lo midju be lo gunma .i la .totos. pu ro roi prami lo ka jersi lo smacu kei ca lo nu xabju la .kanzas. kei gi'e jinvi lo du'u na nabmi

ni'o ku'i la tinci mudypre cu kavbu lo gerku lo ra birka gi'e tagji jgari ze'a lo nu lausku fi lo smacu fe «lu ko xruti .i ko xruti .i la .totos. do na ba crogau li'u»

ni'o fau ku la smacu noltruni'u cu bargau lo ri stedu lo cnita be lo srasu girzu gi'e retsku se pi'o lo toldarsi voksa «lu xu do birti lo du'u ty mi'a na ba batci li'u»

ni'o «lu mi ba na curmi —sei la mudypre cu cusku— .i se ki'u bo ko na terpa li'u»

ni'o lo smacu cu porci ke cpare xruti .i je la .totos. cu na za'u re'u gercmo .i to'e ki'u nai bo ty cu troci lo ka cliva lo birka be la mudypre kei gi'e bacti da'i my va'o lo nu na drani djuno lo du'u my tinci .i ro mai pa lo brarai be lo smacu cu cusku

ni'o «lu pau mi'a ma do ka'e pleji —sei sy retsku— lo nu do nurgau lo nunji'e be lo mi'a noltruni'u li'u»

ni'o «lu no da poi mi djuno fi ke'a —sei la mudypre cu spusku— li'u» .i ku'i la cpitepygau ku noi pu ca'o pensi troci gi'e ku'i na'e snada ki'u lo nu lo ri stedu cu te setca lo sudysrasu cu cusku zei sutra «lu ua ie se'i .i do ka'e nurgau lo mi'a pendo no'u la tolvirnu cinfo zi'e noi ca'o sipna ne'i lo makpapi ckana li'u»

ni'o «lu ue ii lo cinfo —sei lo cmalu noltruni'u cu krixa— .i ju'o ba'a cy ro mi'a ba citka li'u»

ni'o «lu ie nai —sei la cpitepygau cu jdice cusku— .i lo bi'u nai cinfo cu tolvirnu li'u»

ni'o «lu je'u pei —sei la smacu cu retsku— li'u»

ni'o «lu cy cu xusra la'e di'u —sei la cpitepygau cu spusku— .i je ju'o cy no roi crogau da poi pendo mi'a .i va'o lo nu do mi'a sidju lo nu nurgau cy zo'u: nu'e do cy do ba xendo zei mutce li'u»

ni'o «lu .i'a je'e —sei la noltruni'u cu cusku— .i mi'a do lacri .i ku'i .ei mi'a mo li'u»

ni'o «lu xu zasti fa lo so'i tai smacu poi ke'a do tercme zo noltruni'u gi'e djica lo nu tinbe fi do li'u»

ni'o «lu go'i .i zasti fa lo su'o ki'o mei —sei ny spusku— li'u»

ni'o «lu ko va'o minde lo ro da lo nu klama ti se rai lo kamsutra kei gi'e gasnu lo nu ro vo'e bevri lo clani ke cilta spisa li'u»

ni'o la noltruni'u cu selfarbi'o lo smacu poi jbizva ny gi'e ba zi minde sy lo nu klacpe ro lo drata smacu .i zi sai ba lo nu tirna lo nu minde cu to'o bajra se rai lo kamsutra fa'a ro da

ni'o «lu ca ku zo'u: —sei la cpitepygau fi la tinci mudypre cu cusku— .ei do klama lo tricu be ne'a lo rirxe korbi gi'e zbasu lo marce poi ba bevri la cinfo li'u»

ni'o la mudypre cu ba zi klama lo tricu gi'e co'a gunka .i je ba za zbasu lo marce lo jimca be lo tricu be'o noi vo'a fi ke'a cu katna vimcu ro lo pezli je ro lo jimca jimca .i simla'a lo ro mei lo mudri pijne gi'e zbasu lo vo xislu lo tordu spisa be lo barda ke tricu stani .i tai sutra je xamgu gunka ja'e lo nu ca lo nu lo smacu co'a tolyli'a cu mulno bredi ri fa lo marce

ni'o sy klama fi ro lo se farna .i je so'i ki'o mei fa sy .i lo barda smacu .e lo cmalu smacu .e lo nutli smacu .i je ro boi sy bevri lo spisa be lo cinlysko se pi'o lo moklu .i ca la'e di'u la .dorotis. cu cikybi'o fi'o se sisti lo ka ze'u sipna gi'e kargau lo kanla .i dy mutce lo ka se spaji lo nu dy. vreta lo srasu fau lo nu so'i ki'o smacu cu ne'a sanli gi'e toldarsi catlu dy .i ku'i la cpitepygau cu jungau dy ro da gi'e cusku fau lo nu selfarbi'o lo se sinma ke cmalu me la smacu kei:

ni'o «lu ko curmi lo nu mi do selsaugau la io ga'i nai noltruni'u li'u»

ni'o la .dorotis. cu junri tu'ifru .i je la noltruni'u cu tupkrogau gi'e ba bo binxo lo mutce be lo ka xendo lo cmalu nixli

ni'o la cpitepygau .e la mudypre cu ca co'a lasna lo smacu lo marce lo cilta poi sy pu bevri .i pa lo fanmo be lo cilta cu se jongau fi lo smacu lo cnebo .i je lo drata fanmo cu go'i fi lo marce .i li'a lo marce cu bramau ro lo smacu poi pu'o lacpu my ku'o fo lo pilji be li ki'o .i ku'i lo smacu ca lo nu ro vo'a ba'o se jongau cu se frili lo nu lacpu my .i ca lo nu ji'a sai la cpitepygau jo'u la tinci mudypre cu zutse my kei my se lacpu zei sutra lo cizra ke cmalu xirma fa'a lo jai bu'u sipna be fai la cinfo

ni'o ba lo barda je nandu nu gunka (to ki'u lo nu la cinfo cu tilju toi) cu snada lo ka cpanygau cy lo marce .i ba bo la noltruni'u cu sutra lo ka minde lo ri smacu lo nu tolsti .i ki'u bo ny cu xanka lo nu lo smacu va'o lo nu ze'a lo dukse cu stali lo jbini be lo makpapi cu sipybi'o

ni'o ca lo nuncfa lo cmalu danlu to'e ki'u nai lo nu so'i mei cu ja'a ru'e ka'e lacpu lo tilju se cpana marce .i ku'i la mudypre joi la cpitepygau cu catke fi lo trixe .i je snada zenba .i ba za bo gurgau muvgau la cinfo lo bartu be lo makpapi foldi be'o no'u lo crino foldi noi bu'u ke'a cy ka'e za'u re'u vasxu lo titla je vifne vacri .e nai lo vindu panci be lo xrula

ni'o la .dorotis. cu jbikla te zu'e lo nu penmi kei gi'e xendo kirsku lo smacu lo nu nurgau lo vo'a pendo lo nu mrobi'o .i dy pu binxo lo tai nelci be la cinfo ja'e lo nu gleki lo nu cy ba'o se nurgau

ni'o ba bo lo smacu cu se toljongau fi lo marce gi'e preja klama pa'o lo srasu lo zdani .i la smacu noltruni'u cu ro moi lo cliva

ni'o «lu va'o lo nu ca da do mi'a za'u re'u nitcu zo'u: —sei ny cusku— ko klama lo foldi gi'e krixa .i se va'o bo mi'a do ba tirna gi'e sidju .i co'o li'u»

ni'o «lu co'o —sei lo ro da cu spuda— li'u» .i je la noltruni'u cu to'o bajra .i ca bo la .dorotis. cu tagji jgari la .totos. se va'o nai lo nu ty cu bajri jersi gi'e tepygau ny

ni'o ba ku lo ro da cu tsebi'o ne'a la cinfo co'u lo nu cy cu cikybi'o .i je la cpitepygau fi la .dorotis. cu bevri lo grute pe lo ne'a tricu ge'u noi dy citka ke'a poi vacysai

 







lo se mànci te màkfa pe la .oz.
ni'o ni'o pa no mo'o
lo badypre pe lo bravrogai

ni'o lo naltordu cu temci fi lo nu la tolvirnu cinfo cu cikybi'o .i ri'a bo cy pu ze'u vreta ne'i lo makpapi fau lo nu vasxu lo mrori'a panci .i ku'i cy ca lo nu ca'a kargau lo kanla gi'e gunro te ka'a lo marce cu mutce lo ka gleki lo nu za'o jmive

ni'o «lu mi pu bajra se rai lo kamsutra —sei cy fau lo nu zutse gi'e ta'irva'u cu cusku— .i ku'i lo xrula pu dukse lo ka tsali kei mi .i ta'i ma do snada lo ka vimcu mi li'u»


ni'o ba bo lo drata cu te lisri lo tumla smacu .e lo nu sy cu xendo nurgau cy lo nunmro .i je la tolvirnu cinfo cu cmila gi'e cusku:

ni'o «lu mi pu ro roi jinvi lo du'u mi barda gi'e tsali .i to'e se ki'u bai bo lo tai cmalu dacti be mu'u lo xrula mi na ru'e mrogau .i je lo tai cmalu danlu be mu'u lo smacu cu nurgau lo mi nunji'e .i cizra mutce .i ku'i doi pendo mi'o ca mo .ei li'u»

ni'o «lu .ei mi'o litru co'u lo nu tolcri lo pelxu kitybli dargu —sei la .dorotis. cu cusku— .i je ba bo mi'o ka'e klama la ri'ojme tcadu li'u»

ni'o lo gunma fau lo nu la cinfo cu di'a kanro mulno gi'e di'a cinmo lo ka sevzi cu co'a litru fau lo nu se pluka zei mutce lo nu cadzu lo ranti je crino srasu .i je ba za lo na clani cu tolcliva lo pelxu kitybli dargu gi'e zazu re'u se farna la ri'ojme tcadu ku noi la banli .oz. cu xabju li'u»

ni'o lo dargu cu xutla gi'e xamgu ke bliku se gacri .i je lo gugde cu melbi .i ja'e bo lo litru cu se pluka lo nu cliva lo ricfoi .e lo ri ckape poi ly ke'a pu lifri bu'u lo ra manku ctino .i za'u re'u ku ly viska lo se zbasu bitmu poi se jbini lo dargu .i ku'i by pe vi cu crino se cintypu'i .i je lo zdani poi lo litru cu lampagre zi'e noi za'a lo te cange cu xabju ku ji'a crino se cintypu'i .i ly lampagre lo so'o tai zdani ze'a lo lecydo'i .i je su'o roi ku lo prenu cu klama lo vorme gi'e catlu ly tai lo nu djica lo nu retsku .i ku'i no boi py cu jbibi'o gi'a tavla vau ly .i ki'u bo la cinfo cu duksu lo ka jai se terpa py .i ro lo prenu cu dasni lo kukte ri'ojme crino taxfu .e lo konju mapku noi simsa lo me la maxpre moi

ni'o «lu ja'o ti gugde la .oz. —sei la .dorotis. cu cusku— .i je ju'o mi'o binxo lo jibni be la ri'ojme tcadu li'u»

ni'o «lu ie —sei la cpitepygau cu spuda .i vi ku ro da crino .i ku'i bu'u lo gugde be la maxpre lo blanu cu traji skari .i ku'i lo vi prenu na simlu lo ka xendo dunli la maxpre .i je mi xanka lo nu mi'o ba na tolcri lo stuzi poi mi'o ka'e sipna ze'a lo nicte li'u»

ni'o «lu .au mi citka na'e bo lo grute —sei lo nixli cu cusku— .i je mi birti lo du'u la .totos. cu na ru'e ba'o djacaumro .i je'u mi'o klasti lo se li'erla'i zdani gi'e tavla lo prenu li'u»

ni'o ja'e bo ca lo nu tolcliva lo na'e cmalu cange bo zdani kei la .dorotis. cu virnu klama lo vorme gi'e darxi

ni'o lo ninmu cu kargau vy .i lo ni kalri cu ja'a ru'e banzu lo nu catlu lo bartu .i ny cusku «lu do ma djica doi verba .i je ki'u ma lo va cinfo do kansa li'u»

ni'o «lu mi djica lo nu stali do ze'a lo nicte va'o lo nu do curmi —sei la .dorotis. cu spusku— .i je lo cinfo cu pendo mi gi'e na crogau do va'o lo nu ji'a sai lo mulno munje cu se pleji li'u»

ni'o «lu xu ta tolcilce —sei lo ninmu cu retsku be fau lo nu gasnu lo nu lo vorme cu kalri zenba milxe— li'u»

ni'o «lu ja'a go'i —sei lo nixli cu cusku— .i je ji'a cy banli lo ka tolvirnu .i cy do ba terpa se mau lo nu do cy cu no'a li'u»

ni'o «lu ja'o —sei lo ninmu ba lo nu pensi gi'e za'u re'u catlu la cinfo cu cusku— va'o lo nu jetnu zo'u: .e'a do nerkla .i je mi ba dunda lo vacysai .e lo sipna stuzi li'u»

ni'o ja'e bo lo ro da nerkla lo zdani noi se xabju lo po'o nai ninmu .e lo re verba .e lo nanmu .i lo nanmu pu se crori'a fi lo tuple gi'e ca vreta lo sfofa be bu'u lo kojna .i lo lanzu cu simlu lo ka mutce lo ka se spaji lo nu viska lo tai cizra kansi'u .i je ca lo nu lo ninmu cu ca'o tolcando lo nu bregau lo jubme zo'u: lo nanmu cu retsku:

ni'o «lu ro do ma klama li'u»

ni'o «lu la ri'ojme tcadu —sei la .dorotis. cu cusku— te zu'e lo nu penmi la banli .oz. li'u»

ni'o «lu ua sai —sei lo nanmu cu cladu cusku— .i xu do birti lo du'u la .oz. ba curmi li'u»

ni'o «lu da'i ki'u ma na co'e —sei dy spuda— li'u»

ni'o «lu ti'e .obu cu no roi curmi lo nu da .obu penmi .i mi pu zvati la ri'ojme tcadu so'i roi .i melbi je se manci stuzi .i ku'i mi no roi jai se curmi fai lo ka viska la banli .oz .i je nai mi se slabu su'o jmive prenu poi pu viska .obu li'u»

ni'o «lu xu .obu cu no roi barkla —sei la cpitepygau cu retsku— li'u»

ni'o «lu no roi .i .obu zutse ca ro djedi ne'i lo barda ke nolstizu kumfa pe lo noldi'u .i je lo ji'a sai selfu be .obu bei lo nu bevri lo sanmi .obu cu na viska .obu li'u»

ni'o «lu .obu mo prenu —sei lo nixli cu retsku— li'u»

ni'o «lu nandu fa lo nu djuno la'e di'u —sei lo nanmu cu pensi cusku— .i sa'u nai la .oz. cu banli te makfa gi'e kakne lo ka se tarmi ro se djica .i ja'e bo su'o prenu cu xusra lo du'u .obu vinsmi lo cipni .i je su'o prenu cu xusra lo du'u vinsmi lo xanto .i je su'o prenu cu xusra lo du'u vinsmi lo mlatu .i ga'a su'o drata .obu vinsmi lo melbi crida .a lo burnanba .a lo drata poi .obu se pluka .i ku'i lo du'u ma kau jetnu tarmi la .oz. ca lo nu se tarmi lo sevzi zo'u: no jmive prenu ka'e djuno li'u»

ni'o «lu la'e di'u mutce lo ka cizra —sei la .dorotis. cu cusku— .i ku'i mi'a nitcu lo nu troci ta'i da lo nu viska .obu kei kei se va'o nai lo nu mi'a ba ba'o litru fi'o prali no da li'u»

ni'o «lu mu'i ma do djica lo nu penmi la xlali .oz. —sei lo nanmu cu retsku— li'u»

ni'o «lumi djica lo nu .obu dunda lo besna mi —sei la cpitepygau cu pacna cusku— li'u»

ni'o «lu .o'u .i da'i la .oz. cu se frili —sei lo nanmu cu xusra— .i .obu ponse lo besna se mau lo se nitcu li'u»

ni'o si'a mi djica lo nu .obu dunda lo risna mi —sei la tinci mudypre cu cusku— li'u»

ni'o «lu .obu ba na se raktu —sei lo nanmu cu di'a co'e— .i ki'u bo .obu ponse lo so'i risna pe lo ro nilbra .e lo ro tarmi li'u»

ni'o «lu si'a mi djica lo nu .obu dunda lo kamvirnu mi —sei la tolvirnu cinfo cu cusku— li'u»

ni'o «lu la .oz. cu ralte lo barda patxu pe lo kamvirnu zi'e pe bu'u la nolstizu kumfa —sei lo nanmu cu cusku— zi'e poi se gacri lo solji palta te zu'e lo nu fanta lo nu se tisna .i .obu ba gleki lo nu dunda lo su'o si'e do li'u»

ni'o «lu si'a mi djica lo nu .obu mi xrugau benji la .kanzas. —sei la .dorotis. cu cusku— li'u»

ni'o «lu ma stuzi la .kanzas. —sei lo nanmu cu se spaji retsku— li'u»

ni'o «lu mi na djuno —sei la .dorotis. cu xanka spuda— .i ku'i zdani mi .i je mi birti lo du'u da stuzi ky li'u»

ni'o «lu lakne mutce .i sa'u la .oz. cu kakne ro da .i se ki'u bo ru'a .obu ba tolcri la .kanzas. se va'u do .i ku'i pa mai do nitcu lo nu snada lo ka penmi .obu .i ba nandu .i ki'u bo la banli te makfa cu na djica lo nu penmi su'o da .i .obu ta'e zukte lo se djica be .obu .i ku'i ba'e do ma djica —sei di'a co'e be fau lo nu tavla la .totos. — li'u» .i la .totos. cu po'o desygau lo rebla .i ki'u bo .u'e ty na kakne lo ka tavla

ni'o lo ninmu ca jungau lo drata lo du'u lo vacysai cu bredi .i ja'e bo jmaji lo sruri be lo jubme .i je la .dorotis. cu citka lo kukte mavypesxu .e lo sanmi be lo se jicla sovda .e lo melbi ke blabi nanba gi'e selpu'a lo ka citka .i la cinfo cu citka lo su'o si'e be lo mavypesxu gi'e ku'i nelci na'e mutce fau lo nu cusku lo se du'u marji lo mavji kei .e lo du'u lo mavji cu cidja lo xirma .e nai lo cinfo .i la cpitepygau .e la tinci mudypre cu citka no sai da .i la .totos. cu citka lo so'u si'e pe ro da gi'e gleki lo ka za'u re'u te dunda lo xamgu vacysai

ni'o lo ninmu ca dunda lo ckana poi ka'e sipna ku'o la .dorotis. .i je la .totos. cu vreta re'o dy ze'a lo nu la cinfo cu bandu lo vorme lo nu da'i da dicra dy .i je la cpitepygau .e la tinci mudypre cu sanli bu'u lo kojna gi'e smaji ze'a pi ro lo nicte .i ku'i li'a lo go'i na ka'e sipna

ni'o ca lo bavla'i cerni co'a lo mu'e lo solri cu ba'o galze'a cu co'a litru gi'e ba za bo viska lo melbi ke crino blegu'i pe bu'u lo tsani zi'e poi crane lo litru

ni'o «lu ju'o ru'a tu me la ri'ojme tcadu —sei la .dorotis. cu cusku— li'u»

ni'o ze'a lo nu ca'o fa'a cadzu kei lo crino blegu'i cu zenba je zenba lo ka carmi .i je si'au lo litru cu ro mai jbibi'o lo ka mulno lo ka litru .i to'e ki'u nai bo lerdo'i pu lo nu tolcliva lo barda bitmu poi sruri la tcadu .i by galtu gi'e rotsu gi'e carmi crino skari

ni'o ca'u lo litru bu'u lo fanmo be lo pelxu kitybli dargu cu zvati fa lo barda vrogai noi fe'e ro roi jadni lo ri'ojme poi tai carmi bu'u lo solgu'i ja'e lo nu lo ji'a sai cinta kanla be la cpitepygau ri'a lo nu carmi cu ze'i na ka'e viska

ni'o jibni lo vrogai fa lo janbe .i la .dorotis. cu catke lo batke gi'e tirna lo rijno sance poi se krasi lo nenri .i ba bo lo barda vrogai cu masno lo ka karbi'o slilu .i je lo ro da cu pagre gi'e zvati lo galseldru ke bargu kumfa noi lo ke'a bitmu cu se gacri lo ci'i ri'ojme

ni'o ca'u lo litru cu sanli fa lo cmalu nanmu poi barda dunji'i la maxpre .i dasni zei mulno lo crino fe'e co'a lo stedu fe'e co'u lo jamfu .i je lo ji'a sai pilka cu crino milxe .i zvati lo mlana be ny fa lo barda ke crino tanxe

ni'o ca lo nu ny cu viska la .dorotis. .e lo ri pendo kei lo nanmu cu retsku «lu do djica lo nu mo bu'u la ri'ojme tcadu li'u»

ni'o «lu mi'a pu klama ti te zu'e lo nu penmi la banli .oz. —sei la .dorotis. cu cusku— li'u»

ni'o lo nanmu cu tai se spaji lo di'u te spuda ja'e lo nu tsebi'o te zu'e lo nu pensi

ni'o «lu ba'o nanca li so'i fa lo nu da cpedu lo ka penmi la .oz. —sei ny cusku be fau lo nu se spaji desygau lo stedu— .i .obu tsali gi'e xlatce .i je va'o lo nu do klama te zu'e lo to'e plixau .a lo bebna ja'e lo nu dicra lo prije nunpei be la banli te makfa zo'u: cumki fa lo nu .obu. fengu gi'e daspo ca pa mokca ro do li'u»

ni'o «lu ku'i na bebna selzu'e .i je nai tolprali co'e —sei la cpitepygau cu spusku— .i vajni .i ji'a mi'a ba'o se jungau fi lo du'u la .oz. cu xamgu te makfa li'u»

ni'o «lu .obu ja'a co'e —sei lo crino nanmu cu cusku— .i je .obu prije je xamgu turni la ri'ojme tcadu .i ku'i lo prenu poi na stace gi'a kucli tu'a .obu zo'u: .obu mutce lo ka xlali .i je so'u da ba'o su'o roi darsi lo nu cpedu lo ka viska lo flira be .obu .i .i je la badypre be lo vrogai .i je mi ki'u lo nu do cpedu lo ka penmi la banli .oz. cu bilga lo ka klagi'a do la noldi'u ku pe .obu .i ku'i .ei pa mai do dasybi'o lo vi vistci li'u»

ni'o «lu ki'u ma —sei la .dorotis. cu retsku— li'u»


ni'o «lu ki'u lo nu va'o lo nu da'i do na dasni lo vistci kei lo nu la ri'ojme tcadu cu carmi gi'e banli cu rinka lo nu do na ka'e viska .i lo ji'a sai xabju be la tcadu cu nitcu lo ku dasni lo vistci .i ro boi vy cu se stela ze'a ro nicte je ro donri .i ki'u bo la .oz. pu minde fi la'e di'u ca lo nu la tcadu cu co'a se zbasu .i je mi ponse lo pa ckiku poi ke'a po'o ka'e toltelgau vy li'u»

ni'o kargau lo barda tanxe .i je la .dorotis. cu viska lo nu ty cu culno lo vistci pe ro nilbra je ro tarmi .i ro boi vy vasru lo crino blaci .i la badypre be lo vrogai cu tolcri lo vistci poi da'i prane lo ka mapti la .dorotis. ku'o gi'e punji vy lo kanla be dy .i re solji dasri cu se lasna fi vy gi'e sruri lo trixe be lo stedu be'o noi bu'u ke'a seltelgau se pi'o lo cmalu ckiku poi dandu lo fanmo be lo linsi poi la badypre be lo vrogai cu cnebo dasni .i ca lo nu vy mo'u se lasna kei la .dorotis. va'o lo nu da'i djica lo nu vimcu lo vistci cu na kakne .i ku'i li'a dy na djica lo nu visnalka'e ri'a lo nuncarmi be la ri'ojme tcadu .i se mu'i bo dy cu cusku no da

ni'o ba bo lo crino nanmu cu tolcri lo vistci be se va'u la cpitepygau .e la cinfo je ji'a sai la .totos. ku noi cmalu .i je ro boi vy tagji se telgau se pi'o lo ckiku

ni'o ba bo la badypre be lo vrogai cu dasybi'o lo sevzi vistci gi'e jungau lo drata lo du'u bredi lo nu klagi'a dy la noldi'u .i fau lo nu lebna lo barda ke solji ckiku lo pijne pe lo bitmu cu kargau lo drata vorme .i je lo ro da cu jersi by pa'o lo vorme be lo klaji pe la ri'ojme tcadu

 






lo se mànci te màkfa pe la .oz.
ni'o ni'o pa pa mo'o
lo se manci tcadu pe la .oz.

ni'o to'e ki'u nai lo nu lo kanla cu se bandu tu'a lo crino vistci kei la .dorotis. .e lo ri pendo ca lo cfari cu visnalka'e ri'a lo cargu'i pe lo se manci tcadu .i lo klaji cu jbini lo melbi dinju poi ro ke'a zilzba lo crino marmaro gi'e fe'e ro roi jadni lo carmi ri'ojme .i lo litru cu cadzu lo dagysfe pe lo mintu ke crino marmaro .i je lo se jonsi'u be lo bliku cu se zvati lo linji be lo ri'ojme poi jbisi'u zi'e poi mircai ri'a lo nu lo solri cu carmi .i lo canko kajna cu marji lo crino blaci .i lo ji'a sai tsani be la tcadu cu milxe lo ka crino .i je lo solri gusli'i cu crino

ni'o zvati fa lo so'i prenu (to lo nanmu .e lo ninmu .e lo verba toi) poi ru'u cadzu .i je ro lo go'i cu dasni lo crino taxfu gi'e se pilka lo crino milxe .i catlu la .dorotis. .e lo ri cizra vrici kansa se pi'o lo kucli kanla .i je ro lo verba ca lo nu viska la cinfo cu to'o bajra gi'e mipygau lo sevzi lo trixe be lo mamta .i ku'i no da tavla lo litru .i so'i zarci cu zvati lo klaji .i je la .dorotis. cu viska lo nu ro poi nenri zy cu crino .i lo crino titspi .e lo crino selpo'azmu cu jai se friti fai lo ka vecnu .i je go'i fa ji'a lo crino cutci .e lo crino mapku .e lo crino taxfu pe ro klesi .i bu'u pa stuzi lo nanmu cu vecnu lo crino nimrysodva .i je ca lo nu lo verba cu te vecnu ny kei la .dorotis. cu viska lo nu ny. pleji lo crino sicni

ni'o simlu lo ka no xirma je no danlu pe su'o klesi cu zvati .i lo nanmu cu ru'u bevri lo dacti se pi'o lo cmalu ke crino marce noi ny ke'a catke .i ro lo prenu cu simlu lo ka gleki gi'e se mansa gi'e ricfu


ni'o la badypre pe la balvro cu klagi'a lo litru pa'o lo klaji co'u lo nu tolcliva lo barda dinju poi midju zei prane lo tcadu zi'e no'u lo noldi'u pe la .oz. ku no'u la banli te makfa .i crane lo vorme fa lo pa sonci noi dasni lo crino taxfu zi'e noi se xejykre lo clani je crino

ni'o «lu lo fange ba'o tolyli'a —sei la badypre pe la balvro fi sy cu cusku— .i fy djica lo nu penmi la .oz. li'u»

ni'o «lu ko nerkla —sei lo sonci cu spusku— .i se va'o bo mi ba bevri lo do notci .obu li'u»

ni'o ja'e bo lo litru cu pagre lo noldi'u vorme gi'e se klagi'a lo barda kumfa pe lo crino lolgai .e lo kukte ke crino nilce pe ri'ojme .i lo sonci cu gasnu lo nu lo litru cu jisygau satra lo matci lo cutci pu lo nu nerkla lo bi'u nai kumfa .i je ca lo nu ly cu ba'o stizu tsebi'o kei sy cu clite cusku:

ni'o «lu .e'o do kufra ze'a lo nu mi klama lo vorme be la nolstizu kumfa gi'e jungau la .oz. lo du'u do ti zvati li'u»

ni'o lo litru cu bilga lo ka ze'u denpa pu lo nu lo sonci cu xruti .i ca lo nu ro mai sy xruti kei la .dorotis. cu retsku:

ni'o «lu xu do pu viska la .oz. li'u»

ni'o «lu na go'i —sei lo sonci cu spuda— .i mi .obu pu no roi viska .i ku'i pu tavla .obu fau lo nu ca gi .obu zutse ti'a lo sepybi'u gi mi dunda lo do notci .obu .i .obu cusku lo se du'u ba curmi lo nu do .obu tavla kei va'o lo nu do djica .i ku'i ro do bilga lo ka nonkansa lo nu penmi .obu .i je .obu ba curmi lo nu ca ro djedi pa po'o do cu klama .i se ki'u bo ki'u lo nu do nitcu lo nu stali la noldi'u ze'a lo djedi be li so'o zo'u: mi ba gasnu lo nu da do klagi'a lo kumfa poi do ka'e surla ba lo do nunli'u li'u»

ni'o «lu ki'e —sei lo nixli cu spuda— .i .obu mutce lo ka xendo li'u»

ni'o lo sonci ca bifca'e lo crino siltci .i je ba zi sai bo lo citno nixli noi dasni lo melbi ke crino pastu cu nerkla lo kumfa .i ny se kerfa lo melbi crino gi'e se kanla lo melbi crino .i ny krobi'o fa'a ca'u la .dorotis. gi'e fau bo cusku «lu ko mi jersi .i se va'o bo mi fi do ba jarco lo do kumfa li'u»

ni'o ja'e bo la .dorotis. cu cusku zo co'o ro lo ri pendo po'u na'e bo la .totos. gi'e jersi fau lo nu birka jgari bevri lo gerku kei lo cnino nixli pa'o lo ze vorlu'a je ve ka'a lo ci serti co'u lo nu tolcliva lo kumfa pe lo crane be la noldi'u .i ky traji lo ka kukte gi'e cmalu kei lo ro kumfa pe lo munje kei gi'e vasru lo ranti je se kufra ckana pe lo boxfo co crino silka .e lo crino ke demsilka dorckabo'o .i midju lo kumfa fa lo cmatce je'erjinto poi cecla lo crino pukpanlitki fa'a lo vacri pu lo nu py. xruti farlu lo melbi ke se sraku ke marmaro tansi .i lo melbi ke crino xrula cu sanli bu'u lo canko .i je pa da se zvati lo kajna poi lo linji be lo cmalu ke crino cukta cu sanli ke'a .i la .dorotis. ca lo nu zifre lo ka templi lo ka kargau lo vi cukta cu facki lo du'u cy vasru lo cizra ke crino pixra poi rinka lo nu dy. cmila .i tai xajmi

ni'o lo tafni'e cu vasru lo so'i crino taxfu poi marji lo silka fa'u lo xulbu'u fa'u lo demsilka .i je ro boi ty prane mapti la .dorotis.

ni'o «lu do'a ko kufra prane —sei lo crino nixli cu cusku— .i je va'o lo nu do djica zo'u: ko selsnagau lo janbe .i la .oz. ba minde ca lo bavla'i cerni lo nu da cpacu do li'u»

ni'o ny cliva la .dorotis. gi'e xruti lo drata .i ri ji'a zo'u: ny klagi'a fi lo kumfa .i je ro lo litru cu ro mai zvati lo pluka mutce pagbu be la noldi'u .i li'a no da prali fi lo bi'u nai nu clite tu'a la cpitepygau .i ki'u bo cy ca lo nu nonselkansa lo nu zvati lo ri kumfa cu bebna sanli bu'u lo pa mokca bu'u lo vorme te zu'e lo nu denpa co'u lo cerni .i da'i cy na surla lo ka vreta .i je cy na ka'e ga'orgau lo kanla .i se mu'i bo cy stodi ze'a pi ro lo nicte lo ka catlu lo pa cmalu jukni noi jivbu lo julne tai lo nu da'i lo vi kumfa na cmima lo melrai be lo kumfa pe lo munje .i la tinci mudypre cu vrebi'o lo ri ckana ri'a lo nu tcaci .i ki'u bo my cu morji lo du'u my pu ca lo nu marji lo rectu cu co'e .i ku'i ki'u lo nu na kakne lo ka sipna kei my te zu'e lo nu selbitygau lo du'u lo cidni cu stodi lo ka tolpo'u kei cu xaksu lo nicte ta'i lo nu muvgau cy .i da'i la cinfo cu zmanei tu'a lo ckana poi marji lo sudga pezli zi'e poi zvati lo ricfoi ku'o gi'e na nelci lo ka nenri lo ganlo kumfa .i ku'i cy dukse lo ka tolbebna kei lo ka curmi lo nu la'e di'u raktu cy .i se ki'u bo cy cu plipe lo ckana gi'e bolbi'o tai tu'a lo mlatu gi'e latcmo gasnu lo nu cy ba zi lo mentu cu sipna

ni'o ca lo bavla'i cerni ba tu'a lo vacysai lo crino nixli cu klama te zu'e lo nu cpacu la .dorotis. .i je ny cu dasygau dy lo melbi mutce pastu poi marji lo morna xulbu'u .i la .dorotis. cu dasybi'o lo crino ke silka jisystota'u gi'e lasna lo crino dasri lo cnebo be la .totos. .i je lo ro mei cu co'a klama la nolstizu kumfa pe la banli .oz.

ni'o pa mai tolyli'a lo barda balku'a noi ne'i ke'a lo so'i nolni'u .e lo so'i nolnau vu'o pe lo nolstu zi'e noi ro ke'a dasni lo ricfu taxfu .i lo vi prenu cu zukte no drata be lo ka tavysi'u .i ku'i py ca ro cerni cu klama te zu'e lo nu denpa to'e ne'i la nolstizu kumfa .i to'e ki'u nai bo py no roi jai se curmi fai lo ka viska la .oz. .i ca lo nu la .dorotis. cu nerkla kei py kucli catlu dy .i je pa boi py smasku:

ni'o «lu xu do ja'a ba catlu lo flira be la .oz. no'u la xlatce li'u»

ni'o «lu li'a go'i —sei lo nixli cu spusku— va'o lo nu .obu mi ba klacru li'u»

ni'o «lu .obu ba curmi —sei lo sonci poi pu bevri lo notci pe ny la te makfa cu cusku— .i to'e ki'u bai bo .obu na nelci lo nu lo prenu cu cpedu lo ka viska .obu .i je'u ca lo cfari .obu pu fengu gi'e cusku lo se du'u .ei mi do xrugau benji lo do te klama .i ba bo .obu fi mi retsku lo se du'u ma kau do jvinu .i je ca lo nu mi jungau .obu fo lo do rijno cutci kei .obu mutce lo ka se cinri .i ro mai mi .obu pu jungau fo lo barna be lo do mebri .i je .obu cu jdice lo du'u ba curmi lo nu do .obu vitke li'u»

ni'o ca ku lo janbe cu jabyselsna .i je lo crino nixli cu cusku fi la .dorotis. fe «lu ta snasni .i .ei do nonselkansa klama la nolstizu kumfa li'u»

ni'o ny kargau lo cmalu vorme .i je la .dorotis. cu virnu cadzu pa'o vy gi'e co'a zvati lo se manci stuzi .i sy barda je cukla kumfa .i se drudi lo galtu bargu .i je lo bitmu .e lo drudi .e lo loldi cu se gacri lo barda ri'ojme poi zvajbisi'u .i bu'u lo midju be lo drudi cu gusni fa lo barda noi carmi dunli lo solri zi'e noi rinka lo nu lo ri'ojme cu mircai tai lo se manci

ni'o ku'i traji lo ka cinri la .dorotis. kei fa lo barda nolstizu co crino marmaro poi sanli lo midju be lo kumfa .i tarmi simsa lo stizu gi'e se pagbu lo mircai ri'ojme du'i tu'a ro lo drata .i lo midju be lo stizu cu se zvati lo bratce stedu poi se xadni no da poi ka'e sarji sy zi'e pe no birka .e no tuple .i no kerfa cu cpana lo vi stedu .i ku'i sy se kanla gi'e se nazbi gi'e se moklu .i je sy. mutce lo ka bramau lo stedu be lo brarai be lo brabracrida

ni'o ca lo nu la .dorotis. ca'o catlu la'e di'u fau lo nu manci joi terpa zo'u: lo kanla cu carna masno gi'e kinli je stodi catlu dy .i ba bo lo moklu cu muvdu .i je la .dorotis. cu tirna lo nu lo voksa cu cusku

ni'o «lu mi'e .oz. no'u la banli je xlatce .i do me ma .i je mu'i ma do mi klama li'u»

ni'o lo ni lo voksa be lo barda stedu cu mabla cu mleca lo me lo se kanpe be la .dorotis. moi .i se ki'u bo dy. zu'e darsi gi'e spusku:

ni'o «lu mi'e .dorotis. no'u la cmalu je ruble .i mi klama te zu'e lo nu do mi sidju li'u»

ni'o lo kanla cu pensi catlu dy ze'a lo mulno mentu .i ba bo lo voksa cu cusku

ni'o «lu do pu cpacu lo rijno cutci ma li'u»

ni'o «lu mi pu cpacu cy la palci termafyfe'i pe la stuna ca lo nu lo mi zdani cu farlu ty gi'e jai mrori'a ty —sei dy spusku— li'u»

ni'o «lu do pu cpacu lo barna be lo do mebri ma —sei lo voksa cu di'a co'e— li'u»

ni'o «lu by pu te cinba mi la xamgu termafyfe'i pe la berti ca lo nu ty cu tolrinsa mi gi'e klagau mi do —sei lo nixli cu cusku— li'u»

ni'o za'u re'u ku lo kanla cu kinli catlu ny .i je viska lo nu ny cu jungau fi lo jetnu .i ba bo la .oz. cu retsku «lu do djica lo nu mi mo li'u»

ni'o «lu ko mi xrugau benji la .kanzas. ku noi la fetfamti .em. .e la nakfamti .xenris. cu zvati — la .dorotis. cu junri cusku— .i mi na nelci lo do gugde .i to'e ki'u bai bo gy cu tai melbi .i je mi birti lo du'u la fetfamti .em. cu xanka zei mutce lo mi nu tolzva ze'a lo tai clani li'u»

ni'o lo kanla cu ci roi kalgaisligau gi'e ba bo selfarbi'o lo drudi je ba bo lo cnita loldi gi'e carna tai lo cizra mutce ja'e lo nu ky. simlu lo ka viska ro pagbu be lo kumfa .i ro mai ky. za'u re'u catlu la .dorotis.

ni'o «lu da'i ma mukti lo nu mi zukte la'e di'u se va'u do —sei la .oz. cu retsku— li'u»

ni'o «lu lo nu ge do tsali gi mi ruble .e lo nu ge do banli te makfa gi mi cmalu nixli li'u»

ni'o «lu ku'i lo ni do tsali cu pu banzu lo nu catra la palci termafyfe'i pe la stuna —sei la .oz. cu cusku— li'u»

ni'o «lu sa'u pu fasnu —sei la .dorotis. cu sampu spuda— .i mi na fuzme li'u»

ni'o «lu ja'o —sei la stedu cu cusku— .i mi ba spuda .i do na se krali lo nu kanpe lo nu mi do ba benji la .kanzas. kei va'o lo nu na ku do da poi xamgu mi cu zukte fi'o se canja .i bu'u lo vi gugde ro prenu cu bilga lo ka pleji fo ro se dunda be vo'a .i do va'o lo nu djica lo nu mi pilno lo mi makfa lo nu xrugau benji do lo zdani cu pa mai bilga da pe se va'u mi .i ko mi sidju .i se va'o bo mi do ba sidju li'u»

ni'o «lu ma mi se bilga —sei lo nixli cu retsku— li'u»

ni'o «lu ko catra la palci termafyfe'i pe la stici —sei la .oz. cu spusku— li'u»

ni'o «lu ue sai .i ku'i mi na kakne —sei la .dorotis. cu krixa be fau lo nu mutce lo ka se spaji— li'u»

ni'o «lu do pu catra la palci termafyfe'i pe la stuna .i je do dasni lo rijno cutci noi vasru lo tsali makfa .i ca ku bu'u lo mulno gugde cu zasti fa pa po'o la palci termafyfe'i .i je ca lo nu do mi jungau lo du'u ty cu morsi zo'u: mi do ba xrugau benji la .kanzas .i ku'i pu ku na co'e li'u»

ni'o lo cmalu nixli cu co'a klaku .i ny tai mutce lo ka nalfaudri .i je lo kanla cu za'u re'u ... gi'e xanka catlu ny tai lo nu da'i la banli .oz. cu jinvi lo du'u ny ka'e sidju va'o lo nu da'i troci

ni'o «lu mi pu no roi catra da se zu'e lo nu no'a —sei ny klakycmo— .i va'o lo ji'a sai nu da'i mi djica zo'u: mi ta'i ma ka'e catra la palci termafyfe'i .i va'o lo nu do no'u la banli je xlatce na ka'e catra ty zo'u: do kanpe ma poi nu mi ja'a ca'a co'e li'u»

ni'o «lu mi na djuno —sei la stedu cu cusku— .i ku'i de'u se spusku mi .i je ze'a lo nu la palci termafyfe'i cu jmive kei do na za'u re'u viska lo do nakfamti .e lo do fetfamti .i ko morji lo du'u la termafyfe'i cu palci (to tcetce lo ka palci toi) gi'e .ei se catra .i nau ku ko cliva .i je ko ze'a lo nu do na ba'o zukte lo do selgu'a cu na cpedu lo ka za'u re'u viska mi li'u»

ni'o la .dorotis. fau lo nu badri cu cliva la nolstizu kumfa gi'e xruti lo jai bu'u denpa be fai la cinfo .e la cpitepygau .e la tinci mudypre bei lo nu tirna lo nu la .oz. cu cusku ma kau dy .i «lu ui nai li no te pacna fi mi —sei dy badri cusku— .i ki'u bo la .oz. co'u lo nu mi ba'o catra la palci termafyfe'i pe la stici cu na benji mi lo zdani .i je mi no roi ka'e co'e la'e di'u li'u»

ni'o lo pendo be dy cu kecti gi'e ku'i na ka'e zukte da lo nu sidju dy .i se ki'u bo la .dorotis. cu klama lo ri kumfa gi'e vrebi'o lo ckana gi'e klaku sipybi'o

ni'o ca lo bavla'i cerni lo sonci pe lo crino zbikre cu klama la cpitepygau gi'e cusku:

ni'o «lu ko mi jersi .i la .oz. pu minde lo nu do se cpacu li'u»

ni'o ja'e bo la cpitepygau cu jersi gi'e jai se curmi fai lo ka nerkla la barda ke nolstizu kumfa ku noi bu'u ke'a cy viska lo kukte mutce nolni'u poi zutse lo ri'ojme nolstizu .i ny dasni lo crino ke silka se jivbu .i je cpana lo gapru be lo ny. flecu ke crino kerfa fa lo nolmapku co jemna .i lo birjanco cu se jimca lo nalci poi meltce skari gi'e tai linto ja'e lo nu ny. va'o lo nu lo rubrai be lo brife cu tolyli'a ny. cu slilu

ni'o ca lo nu la cpitepygau ba'o krobi'o se rai lo ka melbi poi lo se setca sudysrasu cu curmi kei ca'u lo vi melbi jmive kei jy. xendo catlu cy gi'e cusku:

ni'o «lu mi'e .oz. no'u la banli je xlatce .i do du ma .i je mu'i ma do mi klama li'u»

ni'o ca ku la cpitepygau ku noi pu kanpe lo nu viska lo mintu ke barda stedu poi la .dorotis. pu jungau cy tu'a ke'a cu mutce lo ka se spaji .i ku'i cy cu virnu spuda

ni'o «lu mi cpitepygau po'o .i terse'a lo sudysrasu .i se ki'u bo mi na se besna .i je bo mi klama do fau lo nu mi pikci do lo ka setca lo besna lo mi stedu ja'e lo nu mi binxo lo ka dunli lo do drata se gugde lo ka remna li'u»

ni'o «lu da'i mu'i ma mi zukte la'e di'u se va'u do —sei la ninmu cu retsku— li'u»

ni'o «lu lo nu do prije gi'e tsali gi'e lo nu no drata mi ka'e sidju —sei la cpitepygau cu spusku— li'u»

ni'o «lu mi no roi curmi lo se cpedu va'o lo nu no da se pleji —sei la .oz. cu cusku— .i ku'i mi la'e di'e ba nupre .i va'o lo nu do catra se va'u mi la palci termafyfe'i pe la stici kei mi baldu'a fi do fe lo so'i besna poi tai xamgu ja'e lo nu do ba pijrai lo ro remna pe lo gugde pe la .oz. li'u»

ni'o «lu mi pu jinvi lo du'u do fi la .dorotis. cu cpedu lo ka catra la termafyfe'i —sei la cpitepygau cu se spaji cusku— li'u»

ni'o «lu mi ja'a co'e .i mi na se vajni lo nu ma kau catra ty .i ku'i co'u lo nu ty cu morsi zo'u: mi na curmi lo se djica be do .i ca ku ko cliva .i je ko co'u lo nu do ba'o jerna lo besna poi do tai mutce lo ka djica tu'a ke'a cu na za'u re'u klama mi li'u»

ni'o la cpitepygau cu badri xruti lo ri pendo gi'e jungau py lo du'u la .oz. pu cusku ma kau .i je la .dorotis. cu se spaji lo nu la banli te makfa cu ckaji ge nai lo ka stedu noi dy pu viska tu'a ke'a gi ja'ai lo ka kukte ninmu

ni'o «lu to'e ki'u nai ku —sei la cpitepygau cu cusku— lo ninmu du'i tu'a la tinci mudypre cu nitcu tu'a lo risna li'u»

ni'o ca lo bavla'i cerni lo sonci pe lo crino zbikre cu klama la tinci mudypre gi'e cusku:

ni'o «lu la .oz. cu cpedu lo ka do klama .i ko mi jersi li'u»

ni'o ja'e bo la tinci mudypre cu jersi sy gi'e tolcliva la barda ke nolstizu kumfa .i ty my na djuno lo du'u la .oz. cu kukte ninmu gi'i kau stedu .i ku'i ty my pacna lo nu kukte nolni'u .i «lu .i ki'u bo —sei ty my lo sevzi cu cusku— ga nai .obu stedu gi mi birti lo du'u mi ba na te dunda lo risna .i ki'u bo lo stedu ku ji'a na se risna gi'e se ki'u bo na ka'e kecti mi .i ku'i ga nai .obu kukte nolni'u gi mi ba carmi cpedu tu'a lo risna .i ki'u bo ka'u ro nolni'u cu xendo se risna li'u»

ni'o ku'i la mudypre ca lo nu nerkla la barda ke nolstizu kumfa cu viska ge nai la stedu gi nai la nolni'u .i ki'u bo la .oz. pu seltambi'o lo selte'a mutce danlu .i dy milxe lo ka cmame'a lo xanto .i je lo crino nolstizu cu simlu lo ka lo ni ce'u tsali cu ja'a ru'e banzu lo nu sarji lo junta be dy .i la danlu cu se stedu da poi simsa lo me lo zbiseljirna moi .i frica fi po'o lo ka mu da kanla lo stedu be ce'u .i mu clani birka cu jorne lo xadni .i je si'a mu da clani je cinla tuple .i lo rotsu je sunla kerfa cu gacri ro pagbu be dy .i je na cumki fa lo nu se xanri lo tolpukmau se jvinu monstra .i zanfu'a fa lo nu la tinci mudypre ca lo ca mokca na se risna .i ki'u bo da'i ry cladu je sutra slilu ri'a lo nu terpa .i ku'i ki'u lo nu marji lo tinci ku po'o kei la mudypre cu na sai terpa gi'e ku'i mutce lo ka nalfaudri

ni'o «lu mi'e .oz. no'u la banli je xlatce —sei la danlu se pi'o lo voksa po'u lo pa barda selcmo cu cusku— .i do du ma .i mu'i ma do mi klama li'u»

ni'o «lu mi mudypre gi'e marji lo tinci .i se ki'u bo mi na se risna gi'e na ka'e prami .i mi do pikci lo nu dunda lo risna mi ja'e lo nu mi dunli lo drata prenu li'u»

ni'o «lu da'i mi mu'i ma zukte la'e di'u —sei la malda'u cu te preti— li'u»

ni'o «lu ki'u lo nu mi cpedu .e lo nu do po'o kakne lo ka gasnu lo mi se cpedu —sei la mudypre cu spusku— li'u»

ni'o la .oz. spuda lo nu cmoni kei la'e di'u gi'e ku'i rufsu cusku «lu va'o lo nu do je'a djica tu'a lo risna kei do bilga lo ka jerna li'u»

ni'o «lu ta'i ma —sei la mudypre cu retsku— li'u»

ni'o «lu ko sidju la .dorotis. lo ka catra la palci termafyfe'i pe la stici —sei la danlu cu spusku— .i ca lo nu la termafyfe'i cu morsi kei ko mi klama .i se va'o bo mi do ba dunda lo brarai je xedrai je pamrai ke'e be lo ro risna pe lo mulno gugde pe la .oz. li'u»

ni'o ja'e bo la tinci mudypre cu jai se bapli fai lo ka badri xruti lo ri pendo gi'e jungau py fo lo xlatce danlu poi my ke'a pu viska .i ro boi py mutce lo ka manci lo so'i tarmi poi la banli te makfa cu ka'e seltambi'o ke'a .i je la cinfo cu cusku:

ni'o «lu va'o lo nu .obu danlu ca lo nu mi klama te zu'e lo nu viska zo'u: mi ba cladyrai cmoni gi'e tepygau .obu ja'e lo nu .obu curmi ro lo se cpedu be mi .i va'o lo nu .obu kukte nolni'u zo'u: mi ba jifkritrazu'e lo ka plipe .obu kei te zu'e lo nu bapli lo nu .obu gasnu lo mi se cpedu .i va'o lo nu .obu barda stedu zo'u: .obu jai jalge fai lo ka xu kau mi fraxu ce'u .i ki'u bo mi ba co'u lo nu .obu nupre lo ka dunda mi'o lo jai se djica be mi'a cu gurgau lo stedu be .obu vi'u pi ro lo kumfa .i ja'o ko gleki doi pendo .i ki'u bo ro da ba xamgu li'u»

ni'o ca lo bavla'i cerni lo sonci pe lo crino zbikre cu klagi'a la cinfo la barda ke nolstizu kumfa gi'e minde cy lo ka nerkla lo me la .oz. moi

ni'o la cinfo cu ba zi pagre lo vorme gi'e viska fau lo nu ru'u catlu kei fau lo nu spaji kei lo nu ca'u lo nolstizu cu zvati fa lo bolci be lo fagri poi ke'a tai tsali gi'e tai gusycai vau ja'e lo nu cy. ja'a ru'e ka'e jdari lo ka catlu ke'a .i pa moi lo sidbo be cy fa lo du'u la .oz. cu se snuti lo ka co'a se fagri gi'e jenca .i ku'i ca lo nu cy. troci lo ka jbibi'o kei lo glanejni cu tai carmi ja'e lo nu lo zbikre be cy cu jenca milxe .i je cy. cu desku ke cpare xruti lo mokca poi jbimau lo vorme

ni'o ba bo lo dizlo je lauble voksa cu se sance lo bolci be lo fagri .i di'e se cusku be fy. valsi:

ni'o «lu mi'e .oz. no'u la banli je xlatce .i do du ma .i je mu'i ma do mi klama li'u»

ni'o la cinfo cu spusku «lu mi tolvirnu cinfo gi'e terpa ro da .i mi do pu klama te zu'e lo nu cpedu lo ka do dunda lo kamvirnu mi ja'e lo nu mi ka'e binxo lo noltru be lo danlu be'o noi lo remna mi te cmene li'u»

ni'o «lu da'i mi mu'i ma dunda lo kamvirnu do —sei la .oz. cu te preti— li'u»

ni'o «lu ki'u lo nu ge lo ro te makfa cu se balrai do gi do po'o vlipa lo ka curmi lo mi se cpedu —sei la cinfo cu spusku— li'u»

ni'o lo bolci be lo fagri cu ze'a tsali jelca .i je lo voksa cu cusku «lu ko je'urja'o fi mi fe lo du'u la palci termafyfe'i cu morsi .i ca lo nu do go'i kei mi dunda lo kamvirnu do .i ku'i ze'a lo nu la termafyfe'i cu jmive kei do na ka'e na stodi lo ka tolvirnu li'u»

ni'o la cinfo cu fengu lo di'u nunsku gi'e ku'i na ka'e spusku da .i je ze'a lo nu cy cu sanli fau lo nu smaji catlu lo bolci be lo fagri kei kei by tai carmi glare binxo ja'e lo nu cy cu carna gi'e bajra cliva lo kumfa .i cy gleki lo nu lo cy. pendo cu denpa cy kei gi'e jungau py fo lo xlatce nu tavla la te makfa

ni'o «lu .ei mi'o ca mo —sei la .dorotis. cu badri retsku— li'u»

ni'o «lu ro pa mei lo ka'e se zukte be mi'o fa lo ka klama lo gugde be la .uinkis. gi'e sisku la palci termafyfe'i gi'e daspo ri li'u»

ni'o «lu ku'i mo va'o lo nu na kakne —sei lo nixli cu cusku— li'u»

ni'o «lu va'o ku mi ba no roi virnu —sei la cinfo cu xusra— li'u»

ni'o «lu si'a mi ba no roi se besna —sei la cpitepygau cu jmina— li'u»

ni'o «lu si'a mi ba no roi se risna —sei la tinci mudypre cu cusku— li'u»

ni'o «lu si'a mi ba no roi viska la fetfamti .em. .e la nakfamti .xenris. —sei la .dorotis. fau lo nu co'a klaku cu cusku— li'u»

ni'o «lu .o'i sai —sei lo crino nixli cu krixa— .i lo se klaku ba farlu lo do crino ke silka pastu gi'e selba'agau py li'u»

ni'o ja'e bo la .dorotis. cu sudgau lo kanla gi'e cusku «lu ru'a mi'o nitcu lo ka troci .i ku'i mi birti lo du'u mi na djica lo nu catra da kei lo ji'a sai nu za'u re'u viska la fetfamti .em. li'u»

ni'o «lu mi do ba klakansa .i ku'i mi dukse lo ka tolvirnu kei lo nu catra la termafyfe'i —sei la cinfo cu cusku— li'u»

ni'o «lu mi ji'a ba klama —sei la cpitepygau cu jdice— .i ku'i mi ba na mutce lo ka plixau do .i mi tai bebna li'u»

ni'o «lu mi na ponse lo risna poi lo termafyfe'i ku ji'a sai zo'u: ke'a ka'e xrani ty —sei la tinci mudypre cu te notci— .i ku'i va'o lo nu do klama cu klama fa mi ji'a li'u»

ni'o ki'u ku lo se bende cu jdice lo du'u co'a litru ca lo bavla'i cerni .i je la tinci mudypre cu kilgau lo ri ka'amru se pi'o lo crino kilgauro'i gi'e ba'o ctilypu'i lo cidni .i la cpitepygau cu culgau lo sevzi lo vifne sudysrasu .i je la .dorotis. cu punji lo cnino cinta lo cy. kanla te zu'e lo nu cy. xagmau kakne lo ka viska .i lo crino nixli noi mutce lo ka xendo cu culgau lo lanka be la .dorotis. lo jai xamgu be fai lo ka citka gi'e lasna lo cmalu janbe lo cnebo be la .totos. lo crino dasri

ni'o clira fa lo nu lo se bende cu klama lo ckana .i je condi sipna co'u tu'a lo dorgu'i lu'u noi ca ke'a se cikri'a lo nu lo crino nakyjipci poi xabju lo trixe bimselsru pe la noldi'u kei .e lo nu cmoni fa lo fetyjipci poi ba'o punji lo crino sovda

 






lo se mànci te màkfa pe la .oz.
ni'o ni'o pa re mo'o
lo nu sisku la palci termafyfe'i

ni'o lo sonci pe lo crino zbikre cu klagi'a pa'o lo klaji pe la ri'ojme tcadu co'u lo nu tolcliva lo kumfa poi la badypre pe lo vrogai cu xabju .i lo di'u catni cu toltelgau lo vistci te zu'e lo nu xrugau vy lo barda tanxe kei gi'e ba bo clite kargau lo vorme se va'u lo mi'o pendo

ni'o «lu ma dargu la palci termafyfe'i pe la stici —sei la .dorotis. cu retsku— li'u»

ni'o «lu no da dargu —sei la badypre pe lo vrogai cu spusku— .i no da su'o roi djica lo nu klama fa'a ku li'u»

ni'o «lu va'o ku mi'a ta'i ma ka'e tolcri ty —sei lo nixli cu te preti— li'u»

ni'o «lu ba frili —sei lo nanmu cu spusku— .i ki'u bo ty ca lo nu djuno lo du'u do zvati lo gugde pe la .uinkis. cu tolcri do gi'e sefygau do li'u»

ni'o «lu ju'o cu'i na go'i —sei la cpitepygau cu cusku— .i ki'u bo mi'a djica lo nu daspo ty li'u»


ni'o «lu ua .i la'e di'u frica —sei la badypre pe lo vrogai cu cusku— .i no da pu su'o roi daspo ty .i se ki'u bo li'a mi pu jinvi lo du'u da'i ty do sefygau du'i lo nu no'a ro lo drata .i ku'i ko capyju'i .i ki'u bo ty cu palci gi'e tsali gi'e ju'o cu'i ba na curmi lo nu do daspo ty .i ko stodi lo ka klama fa la berti ku noi lo solri cu galjdika bu'u ke'a .i se va'o bo do na ka'e fliba lo nu tolcri ty li'u»

ni'o lo litru cu kirsku lo sonci gi'e tolrinsa sy gi'e selfarbi'o la berti fau lo nu cadzu lo foldi be lo ranti srasu noi fe'e ru'i nai se barna lo xrulrxasteraka .e lo xrulnranunkulu .i la .dorotis. cu za'o dasni lo melbi ke silka pastu poi pu dasybi'o ke'a bu'u lo noldi'u .i ku'i ca ku fau lo nu spaji dy kei dy facki lo du'u na za'o crino gi'e ku'i curve blabi .i lo ji'a dasri pe ru'u lo cnebo be la .totos. cu cirko lo ka crino kei gi'e ca blabi du'i tu'a lo pastu pe la .dorotis.

ni'o la ri'ojme tcadu cu ba za darno mutce trixe .i ca lo nu lo litru cu ca'o cramu'u kei lo loldi cu fe'e ca'o rufsu je cmana zenba .i ki'u bo zvati lo vi gugde pe la stici fa no cange je no zdani .i je lo loldi cu kunti lo se zbasu

ni'o ca lo lecydo'i lo solri cu glare te gusni lo flira .i ri'a bo zvati fa no tricu poi ka'e se va'u se ctino .i ja'e bo pu lo nicte la .dorotis. .e la .totos. .e la cinfo cu tatpi gi'e vrebi'o lo srasu gi'e co'a sipna fau lo nu la mudypre .e la cpitepygau cu snura zgana

ni'o la palci termafyfe'i pe la stici cu se kanla lo pa po'o mei .i ku'i lo kanla cu vlipa du'i tu'a lo darvistci gi'e kakne lo ka viska ro da .i ja'e bo ty. fau lo nu zutse lo vorme pe lo ri badydi'u cu ru'u catlu gi'e viska lo nu la .dorotis. cu sipna vreta fau lo nu lo ri pendo cu sruri .i darno mutce .i ku'i la palci termafyfe'i cu fengu lo nu zvati lo ri gugde .i ja'e bo ty. bifca'e lo rijno siltci poi sruri dandu lo ri cnebo

ni'o ba zi sai bo fa'a bajra te ka'a ro farna fa lo gunma be lo barda labno .i ro boi ly se tuple lo clani gi'e se kanla lo palci gi'e se denci lo kinli

ni'o «lu ko klama lo vu prenu —sei la termafyfe'i cu cusku— gi'e vilka'a py lo spisa li'u»

ni'o «lu xu do na sefygau py do —sei lo jatna be lo labno cu retsku— li'u»

ni'o «lu na go'i —sei ty spuda— .i pa boi py marji lo tinci .i pa boi py marji lo sudysrasu .i pa boi py nixli .i pa drata cu cinfo .i no boi py kakne lo ka gunka .i se ki'u bo .e'a do vilka'a py lo spisa li'u»

ni'o «lu je'e do'u —sei lo labno cu cusku— li'u» .i ly to'o bajra se rai lo ka sutra kei fau lo nu lo drata labno cu jersi

ni'o zanfu'a fa lo nu la cpitepygau .e la mudypre cu cikna prane gi'e tirna lo nu lo labno cu ca'o klama

ni'o «lu lo ca nunda'a cu me mi moi —sei la mudypre cu cusku— .i se ki'u bo ko mi trixe .i mi ba penmi lo labno ca lo nu ly cu klama li'u»

 

ni'o my lebna lo vo'a ka'amru noi vo'a pu gasnu lo nu ke'a kinli mutce .i je ca lo nu lo jatna be lo labno cu klama kei la tinci mudypre cu sligau lo birka gi'e katna vimcu lo stedu be lo labno lo xadni ja'e lo nu ba zi sai mrobi'o .i co'a lo nu my cu ka'e lafti lo ka'amru kei lo drata labno cu klama .i je ri ji'a farlu gau lo kinli korbi be lo xarci pe la tinci mudypre .i lo labno cu vo no mei .i je vo no roi ku lo labno cu se catra .i ja'e bo ro mai lo ro morsi labno cu derxi vreta lo loldi

ni'o ba bo my cu lolpu'i lo ka'amru gi'e tsebi'o re'o la cpitepygau ku noi cusku «lu pu xamgu nunda'a doi pendo li'u»

ni'o lo re da cu denpa co'u lo nu la .dorotis. cu cikybi'o ca lo bavla'i cerni .i lo cmalu nixli cu terpa mutce ca lo nu viska lo barda derxi be lo kalsa labno .i ku'i la mudypre cu jungau dy boi ro da .i dy kirsku my lo nu nurgau kei gi'e tsebi'o te zu'e lo nu cersai citka noi ba ke'a lo gunma cu za'u re'u co'a litru li'u»

ni'o ca lo mintu cerni la palci termafyfe'i cu klama lo vorme be fo lo badydi'u gi'e catlu se pi'o lo pa kanla poi kakne lo ka viska lo darno .i viska lo nu ro lo labno cu morsi lolvre .e lo nu lo fange cu za'o litru pagre lo vo'a gugde .i la'e di'u gasnu lo nu ty cu fengu se mau lo purci kei ja'e lo nu re roi bifca'e lo siltci

ni'o ba zi bo lo barda gunma be lo cilce korvo cu voikla fa'a ty fi'o se banzu lo nu lo tsani cu manku binxo

ni'o la palci termafyfe'i fi la nolraitru korvo cu cusku «lu ko ba zi voikla lo fange .i ko ... gi'e vilka'a fy lo spisa li'u»

ni'o lo cilre korvo cu voikla se kai lo ka barda gunma kei fa'a la .dorotis. .e lo ri pendo .i ca lo nu lo cmalu nixli cu viska lo nu ky cu klama cu terpa

ni'o ku'i la cpitepygau cu cusku «lu lo ca nunda'a cu me mi moi .i se ki'u bo ko vrebi'o ne'a mi .i se va'o bo do ba na se xrani li'u»

ni'o mu'i ku ro lo litru po'u na'e bo la cpitepygau cu vrebi'o lo loldi .i je cy cu sa'irbi'o gi'e tengau lo birka .i ca lo nu lo korvo cu viska cy kei ky terpa (to tai lo nu lo vi cipni cu ro roi co'e lo cpitepygau toi) gi'e na darsi lo ka jbibi'o .i ku'i la nolraitru korvo cu cusku:

ni'o «lu ii nai tu terse'a nanmu .i mi ba ja'urxe'a ke tunta vimcu lo kanla be ny li'u»

ni'o la nolraitru korvo cu voikla fa'a la cpitepygau ku noi jairbi'o ky fo lo stedu gi'e se torni lo cnebo co'u lo nu mrobi'o .i je ba bo lo drata korvo cu fa'a voikla .i je bo la cpitepygau cu se torni lo ra cnebo ku ji'a .i lo korvo cu vo no mei .i je vo no roi ku la cpitepygau cu se torni lo cnebo .i co'u bo ro mai ro boi ky cu re'o morsi vreta .i ba bo la cpitepygau fi lo ri pendo cu cpedu lo ka sa'irbi'o .i je za'u re'u di'a litru

ni'o la palci termafyfe'i ca lo nu za'u re'u catlu lo bartu gi'e viska lo nu ro lo korvo cu derxi cu binxo lo fengu mutce gi'e ci roi bifca'e lo vo'a rijno siclu

ni'o ba zi bo tirna lo banli zbazaza poi zvati lo vacri .i je lo cinkygunma be lo xekri bifce cu vofli jbibi'o ty

ni'o «lu ko klama lo fange gi'e kilrango catra ri —sei la termafyfe'i cu minde— li'u» .i lo bifce cu carna gi'e sutra vofli co'u lo nu jibni lo jai bu'u cadzu be fai la .dorotis. .e lo ri pendo .i ku'i la mudypre pu viska lo nu by. klama .i je la cpitepygau pu jdice lo ka zukte ma kau

ni'o «lu ko tolse'a lo mi sudysrasu gi'e pejgau sy lo cmalu nixli .e lo gerku .e la cinfo —sei fi la mudypre cu cusku— .i se va'o bo lo bifce na ka'e kilrangytunta li'u» .i la mudypre cu zukte la'e di'u .i je la .dorotis. cu vrebi'o lo jibni be la cinfo gi'e jgari la .totos. lo birka fau lo nu lo sudysrasu cu mulno gacri


ni'o lo bifce cu klama gi'e tolcri no na'e bo la cpitepygau ku poi ka'e se kilrangytunta .i se mu'i bo voikla fa'a cy gi'e lifri lo ka lo kilrango be ce'u cu porpi ri'a tu'a lo tinci se cau lo nu ja'a ru'e ji'a sai crogau la mudypre .i je ki'u lo du'u lo bifce ca lo nu lo kilrango cu ba'o porpi na ka'e jmive zo'u: la'e di'u fanmo lo xekri bifce .i je by. rotsu senta cpana la mudypre tai tu'a lo cmalu derxi be lo tolrufsu kolme

ni'o ba bo la .dorotis. .e la cinfo cu sa'irbi'o .i je lo nixli cu sidju la tinci mudypre lo nu xrugau lo sudysrasu lo nenri be la cpitepygau co'u lo nu cy cu cnici du'i lo nu no'a ca lo purci .i ja'e bo lo ro da cu za'u re'u co'a litru

ni'o la palci termafyfe'i cu tai fengu ca lo nu viska lo nu lo ri xekri bifce cu se derxi lo cmalu tai tu'a lo kolme kei kei ja'e lo nu jalgau lo jamfu lo loldi gi'e lacpu lo kerfa gi'e danre lo denci .i je ba bo klacpe lo pa re mei be lo selfu noi me la .uinkis. ku'o gi'e dunda lo kilga'a sy fau lo nu minde sy lo nu klama lo fange gi'e daspo fy

ni'o la .uinkis. na virnu selnai gi'e ku'i bilga lo te minde .i se ki'u bo cadzu co'u lo nu jibni la .dorotis. .i ba bo la cinfo cu cladu cmoni gi'e bajra fa'a uy .i je la uu .uinkis. cu tai terpa ja'e lo nu to'o bajra se rai lo ka sutra

ni'o ca lo nu ba'o xruti lo badydi'u kei la palci termafyfe'i cu so'i roi darxi uy lo dasri gi'e xrumi'e uy lo nu gunka kei gi'e ba bo tsebi'o te zu'e lo nu pensi lo nu .ei ba mo kau .i na kakne lo ka jimpe lo du'u se ja'e ma kau ro lo se platu be fi lo nu daspo lo va fange cu pu zilfli .i ku'i vlipa termafyfe'i gi'e palci co'e .i je ba za bo jdice lo du'u ba mo kau

ni'o zvati lo nenri be lo kajnyta'e fa lo solji mapku noi se sruri lo tabjme jo'u lo zirxunjme .i lo bi'u nai solji mapku cu vasru lo makfa .i lo ponse be lo go'i cu ka'e ci roi klacpe la selna'i smani ku noi tinbe ro lo se minde .i ku'i no prenu ka'e minde lo bi'u nai cizra danlu za'u ci roi ku .i xa'o ba'o re roi ku la palci termafyfe'i cu pilno lo makfa pe la mapku .i pu pa roi go'i ca lo nu sefygau la .uinkis. gi'e bixygau lo sevzi lo ka turni lo gugde be uy .i la selna'i smani pu sidju ty la'e di'u .i re re'u go'i ca lo nu damba la banli .oz. gi'e li'argau .obu lo gugde pe la stici .i la selna'i smani pu sidju ty la'e di'u ji'a .i ca lo pa po'o se jmina ty ka'e pilno lo bi'u nai solji mapku .i se mu'i bo na'e djica lo nu ca'a go'i kei co'u lo nu ro lo drata se vlipa cu ba'o se pilno .i ku'i ca fau lo nu lo tsali labno .e lo cilce korvo .e lo kinli bifce cu ba'o canci .e lo nu lo ro lo selfu cu ba'o se tepli'agau la tolvirnu cinfo cu sajbi'o lo du'u ca pa po'o mei fa lo tadji be lo nu daspo la .dorotis. .e lo ri pendo

ni'o se mu'i bo la palci termafyfe'i cu lebna la solji mapku lo kajnyta'e gi'e punji my lo stedu .i ba bo co'a sanli lo zunle jamfu gi'e masno lo ka cusku:

ni'o zoi «lu. Ep-pe, pep-pe, kak-ke! .lu»

ni'o bavla'i fa lo nu co'a sanli lo pritu jamfu gi'e cusku:

ni'o zoi «lu. Hil-lo, hol-lo, hel-lo! .lu»

ni'o ba bo co'a sanli lo jamfu re mei gi'e cladu voksa krixa:

ni'o zoi «lu. Ziz-zy, zuz-zy, zik! .lu»

ni'o ca ku lo makfa cu co'a rinka .i lo tsani cu manku zenba .i je lo dizlo rumbalu poi zvati lo vacri cu se tirna .i sance fa lo carcaca be lo so'i nalci be'o .e lo cladu nu tavysi'u gi jo'u cmila .i je lo solri cu co'a te gusni lo tcini ja'e lo nu ka'e viska lo nu la palci termafyfe'i cu se sruri lo gunma be lo smani noi ro ke'a se nalci lo banli je tsali re mei poi zvati lo birjanco

ni'o pa boi sy noi bramau zei mutce lo drata cu simlu lo ka jatna sy .i voikla lo jibni be la termafyfe'i gi'e cusku «lu do ba'o klacpe mi'a ci .e ro re'u .i do mi'a ma minde li'u»

ni'o «lu ko klama lo fange poi zvati lo mi gugde ku'o gi'e daspo ro boi fy po'u na'e bo la cinfo —sei la palci termafyfe'i cu cusku— .i ko zvagau lo bi'u nai danlu mi .i mu'i bo mi platu lo nu jitro cy tai tu'a lo xirma gi'e gasnu lo nu cy cu gunka li'u»


ni'o «lu .ai lo do te minde cu se tinbe —sei lo jatna cu cusku— li'u» .i ba ku fau lo cladu nu tavla bacru kei je nu savru kei la selna'i smani cu to'o voikla lo jai bu'u cadzu be fai la .dorotis. .e lo ri pendo

ni'o lo su'o la smani cu jairbi'o la tinci mudypre gi'e bevri my pa'o lo vacri co'u lo nu gapru lo gugde poi rotsu se gacri lo kinli rokci .i bu'u ku sy cu falcru la uu mudypre ku noi farlu ve'a lo barda lo rokci noi bu'u ke'a my vreta fau lo nu tai se kevna je selxai vau ja'e lo nu na ka'e ga muvdu gi cmoni

ni'o lo su'o drata smani cu kavbu la cpitepygau .i je se pi'o lo ra clani degji cu lacpu pi ro lo sudysrasu lo se dasni .e lo stedu .i gasnu lo nu lo mapku .e lo cutci .e lo taxfu cu cmalu derxi kei gi'e renro dy lo galrai jimca be lo rajycla tricu

ni'o lo drata smani cu renro lo spisa be lo rotsu skori ja'e lo nu sruri la cinfo kei gi'e srugau so'i djine lo xadni .e lo stedu .e lo tuple vu'o pe cy .i ja'e bo la cinfo na ka'e ga batci gi sraku gi'a damba tai su'o da .i ba bo sy sy lafti cy gi'e to'o voikla to'e se cau cy lo noldi'u pe la termafyfe'i ge'u noi bu'u ke'a punji cy lo cmalu selsrustu poi lo galtu ke tirse bitmu cu sruri ke'a ja'e lo nu no da ka'e rivbi barkla

ni'o ku'i la .dorotis. zo'u: sy sy na sai xrani dy .i dy sanli fau lo nu zvati lo vo'a birka fa la .totos. kei .e lo nu zgana lo se badri dimna be lo vo'a pendo gi'e jinvi lo du'u ba zi se li'erla'i fa vo'a .i lo jatna be la selna'i smani cu voikla dy fau lo nu lo ri clani je se kerfa birka cu se tengau .e lo nu lo to'e melbi flira cu mabla cisma .i ku'i jy viska lo barna be lo mebri be dy gi'e klasti fau lo nu xanja'o jungau lo drata lo du'u .ei na pencu dy

ni'o «lu mi'o na darsi lo ka xrani lo vi cmalu nixli —sei jy fi lo drata cu cusku— .i ki'u bo ny se bandu la kamvlipa co vrude .i je ri balmau la kamvlipa co palci .i ro pa mei lo mi'a ka'e se zukte fa lo ka bevri ny lo noldi'u pe la palci termafyfe'i gi'e stacru li'u»

ni'o ja'e bo racyju'i joi toljursa lafti fa sy sy la .dorotis. fi'o te jgari lo birka gi'e sutra bevri dy pa'o lo vacri co'u lo nu tolyli'a lo noldi'u noi bu'u ke'a punji dy lo serti pe lo crane vorme .i ba bo lo jatna fi la termafyfe'i cu cusku:

ni'o «lu mi'a ba'o tinbe fi do fi'o se jimte lo ni mi'a kakne .i la tinci mudypre .e la cpitepygau cu ba'o se daspo .i je la cinfo cu skojo'e bu'u lo do bimselsru .i lo cmalu nixli zo'u: mi'a na darsi lo nu xrani ny .a lo gerku poi ny ke'a birka bevri .i lo nu do vlipa lo ka jitro lo mi'a bende cu ca tolcfa .i je do ba no roi za'u re'u viska mi'a li'u»

ni'o ba bo ro la selna'i smani fau lo nu cmila je tavla je selsna mutce cu voikla fa'a ne'i lo vacri gi'e ba za bo cu'u se viska

ni'o la palci termafyfe'i cu ge se spaji gi xanka vau ca lo nu viska lo barna be lo mebri ba la .dorotis. .i ki'u bo je'a djuno lo du'u ge nai la selna'i smani gi nai vo'a darsi lo ka crogau lo nixli tai su'o da .i fa'a ni'a catlu lo jamfu be la .dorotis. .i je ca lo nu viska lo rijno cutci cu co'a desku ri'a lo nu terpa .i ki'u bo ty. djuno lo du'u lo tsali makfa cu jinzi cy .i ca lo cfari la termafyfe'i cu se xlura fi lo ka bajra to'o la .dorotis. .i ku'i fasnu fa lo nu ty. catlu lo kanla be lo nixli gi'e visyga'e lo du'u sampu mutce fa lo ruxse'i poi trixe ky kei .e lo du'u lo cmalu nixli cu na djuno fi lo se manci kamvlipa poi la rijno cutci cu dunda ny .i ja'e bo la palci termafyfe'i cu mipri cmila gi'e pensi «lu mi za'o ka'e gasnu lo nu ny mi selfu .i ki'u bo ny na djuno lo du'u ta'i ma kau pilno lo kamvlipa li'u» .i ba bo ty. jursa je rufsu cusku fi la .dorotis.:

ni'o «lu ko klakansa mi .i je ko tinbe ro da poi mi do ke'a minde .i ki'u bo va'o lo nu do na go'i kei mi ba tolcfagau do tai lo nu mi pu no'a la tinci mudypre .e la cpitepygau li'u»

ni'o la .dorotis. cu jersi ty pa'o so'i lo melbi kumfa be fo lo vo'e badydi'u co'u lo nu tolcliva lo jupku'a noi bu'u ke'a la termafyfe'i cu minde dy lo ka lumci lo patxu gi'e brulu'i lo loldi gi'e stogau lo fagri lo ka da cidja ce'u

ni'o la .dorotis. co'a gunka co filseltro fau lo nu ba'o zu'edji lo ka gunka se rai lo ka kakne .i mu'i bo dy. gleki lo nu la palci termafyfe'i pu zu'ejdi lo ka na catra dy

ni'o fau lo nu la .dorotis. cu ca'o carmi gunka kei la termafyfe'i cu pensi lo nu ri ba klama lo selsrustu gi'e jitro la tolvirnu cinfo tai tu'a lo xirma .i da'i zdile ty (to ty birti toi) fa lo ka gasnu lo nu cy. lacpu lo ty. carce se ka'a ro da poi ty djica lo nu ty. klama ke'a .i ku'i ca lo nu ty. kargau lo vorme kei la cinfo cu cladu camcmo gi'e tai tsali plipe ty ja'e lo nu la termafyfe'i cu terpa gi'e barbajra gi'e gasnu lo nu lo vorme cu di'a ganlo

ni'o «lu va'o lo nu mi na ka'e jitro do zo'u: —sei la termafyfe'i fi la cinfo cu cusku be fau lo nu tavla pa'o lo grana be lo vrogai se'u— mi ka'e djacaumrogau do .i jai do co'u lo nu do zukte lo mi se djica cu na citka da li'u»

ni'o ba la'e di'u ty bevri no cidja lo pinfu cinfo .i ku'i ca ro djedi cu klama lo vrogai ca lo dormidju gi'e retsku «lu xu do bredi lo nu se jitro tai tu'a lo xirma li'u»

ni'o .e la cinfo cu spusku «lu na go'i .i va'o lo nu do nerkla lo vi bimselsru kei mi do ba batci li'u»

ni'o krinu lo nu la cinfo cu na bilga lo ka zukte jai se djica be la termafyfe'i kei kei fa lo nu ca ro nicte ca lo nu lo ninmu cu sipna kei la .dorotis. cu bevri lo cidja cy lo kajnyta'e .i di'i ku ba lo nu cy. citka kei cy. vrebi'o lo cy. ckana be lo sudysrasu .i je la .dorotis. cu vrebi'o lo jibni be cy. gi'e punji lo stedu be dy. lo cy. ranti je rotsu ne'okre .i je ca bo lo re mei cu ca'o casnu lo ri raktu selfri gi'e troci lo ka platu tu'a da poi tadji lo nu rivbi .i ku'i lo re mei na snada lo ka facki fi lo tadji be lo nu barkla lo noldi'u .i ki'u bo ri ro roi se bandu lo pelxu .uinkis. ku noi selfu la palci termafyfe'i gi'e dukse lo ka terpa ty kei lo ka na zukte lo te minde be uy bei ty

ni'o lo nixli cu bilga lo ka carmi gunka ze'a lo donri .i je so'i roi ku la termafyfe'i cu capnu'e lo nu darxi ny lo tolci'o santa poi ro roi xance bevri ke'a .i ku'i je'u ty na'e darsi lo nu darxi la .dorotis. kei ki'u tu'a lo barna be lo mebri .i lo verba cu na djuno la'e di'u gi'e jai ni vy. terpa lo dimna me vy .e la .totos. moi kei fa li ro .i pa roi ku la termafyfe'i cu darxi la .totos. se pi'o lo ty. santa .i je lo virnu ke cmalu gerku cu vofli plipe ty gi'e venfu fo lo ka batci lo tuple be ty .i la termafyfe'i zo'u: na blucri fa lo mokca poi se batci .i ki'u bo ty cu tai palci ja'e lo nu lo ciblu be ne'i ty pu za lo nanca be li so'i ba'o sudbi'o

ni'o lo nunji'e pe la .dorotis. cu se badri mutce binxo ca lo nu dy cu co'a jimpe lo du'u lo nu xruti la .kanzas. ju'e la fetfamti .em. cu nadmau ro lo purci .i su'o roi ku la .dorotis. cu klaku ze'a lo cacra be li so'i fau lo nu la .totos. cu zutse re'o lo jamfu be dy gi'e catlu lo flira be dy fau lo nu pante tonga ke klaku cmoni te zu'e lo nu jarco lo ka kecti lo cmalu jitro be ty .i la .totos. cu no'e se vajni lo du'u ty zvati la .kanzas. ji kau lo gugde pa la .oz. kei va'o lo nu la .dorotis. cu kansa ty .i ku'i ty djuno lo du'u lo cmalu nixli cu tolgei .i je la'e di'u se jalge lo nu tolgei fa ty ji'a

ni'o la palci termafyfe'i cu mutce lo ka djica lo nu ponse la rijno cutci ku noi lo nixli cu ro roi dasni .i lo bifce .e lo korvo .e lo labno vu'o pe ty cu derxi vreta gi'e sudbi'o .i je ty cu ba'o xaksu pi ro lo makfa pe la solji mapku .i ku'i va'o lo nu da'i snada lo ka cpacu la rijno cutci kei cy dunda lo ty lo ka vlipa poi zmadu ke'a pe ro lo drata dacti poi pu cirko .i ty jundi catlu la .dorotis. te zu'e lo nu facki lo du'u xu kau dy su'o roi toldasybi'o lo cutci kei fau lo nu jinvi lo du'u da'i ty kakne lo ka zerle'a cy .i ku'i lo verba cu tai jgira tu'a lo melbi cutci ja'e lo nu vy toldasybi'o cy ca no da po'u na'e lo nicte noi ca ke'a vy jirli'u vy .i la termafyfe'i cu dukse lo ka terpa lo manku kei lo nu darsi lo nu nerkla lo kumfa pe la .dorotis. ca lo nicte te zu'e lo nu lebna lo cutci .i je lo ni ty cu terpa tu'a lo djacu cu zmadu lo ni ty cu terpa lo manku .i se ki'u bo ty cu no roi klama lo jibni ca lo nu la .dorotis. cu djacu jinru .i je'u lo tolci'o me la termafyfe'i cu no roi pencu lo djacu .i je nai ty curmi lo nu lo djacu cu pencu ty tai su'o da

ni'o ku'i lo bi'u nai palci danlu cu mutce lo ka mencre kei gi'e ro mai te sidbo fi da poi ju'o ba se jalge lo nu vo'a cpacu lo jai se djica .i punji lo tirse grana lo midju be lo jupku'a loldi gi'e ba bo gasnu se pi'o lo vo'a makfa larcu lo nu lo tirse cu nonselji'u lo remna kanla .i ja'e bo la .dorotis. ca lo nu cadzu lo loldi cu snuti stapa lo grana ki'u lo nu na kakne lo ka viska gy kei gi'e farlu .i na mutce lo ka se xrani .i ku'i ca lo nu farlu kei pa la rijno cutci cu co'u jorne .i je pu lo nu dy ka'e cpacu cy kei la termafyfe'i cu lebna cy gi'e jongau cy lo cinla jamfu be lo ty. sevzi

ni'o lo palci ninmu cu mutce lo ka gleki lo nu ba'o snada lo ka tcica .i ki'u bo ze'a lo nu ponse pa lo cutci cu ponse lo xadba be lo makfa .i je la .dorotis. na ka'e pilno my to'e se va'u ty va'o lo ji'a sai nu da'i dy djuno lo du'u ta'i ma kau ja'a ca'a co'e

ni'o lo cmalu nixli fau lo nu viska lo nu ba'o cirko pa lo vo'a melbi cutci cu binxo lo fengu gi'e cusku fi la termafyfe'i fe «lu ko xrugau lo mi cutci mi li'u»

ni'o «lu mi ba na go'i —sei la termafyfe'i cu spuda— .i mu'i bo cy ca me mi moi gi'e nai me do moi li'u»

ni'o «lu do palci maldanlu —sei la .dorotis. cu krixa— .i do na se krali lo ka lebna lo cutci mi li'u»

ni'o «lu .ai mi to'e ki'u nai ralte —sei la termafyfe'i fau lo nu cmila fa'a dy cu cusku— .i je ca pa djedi mi cpacu lo ji'a drata do li'u»

ni'o la'e di'u se jalge lo nu la .dorotis. cu tai fengu ja'e lo nu lafti lo baktu be lo djacu be'o poi vi zvati ku'o gi'e gasnu lo nu by toltisna ga'u la termafyfe'i ja'e lo nu fy binxo lo ka fe'e co'a lo stedu fe'e co'u lo jamfu cu cilmo

ni'o ba zi sai ku lo palci ninmu cu cladu ke terpa krixa .i je ba bo fau lo nu la .dorotis. cu manci catlu ny kei la termafyfe'i co'a ge cmaze'a gi runta

ni'o «lu ko catlu lo nu do ba'o mo kau —sei ty krixa— .i zi lo mentu mi ba runme li'u»

ni'o «lu mi xenru mutce ja'a ku —sei la .dorotis. ku noi je'u terpa lo nu da'i nai la termafyfe'i cu ca'o runme tai tu'a lo bunre sakta ca'u je'a bo lo kanla be dy cu cusku— li'u»

ni'o «lu xu do pu na djuno lo du'u lo djacu cu fanmo mi —sei la termafyfe'i cu pante je tolpa'a tonga retsku— li'u»

ni'o «lu li'a na go'i —sei la .dorotis. cu spusku— .i da'i ma pu ve djuno li'u»

ni'o «lu ba zi lo mentu be li su'o mi mo'u runme .i je do po'o ba ponse lo badydi'u .i mi pu palci ze'a lo mi nunji'e .i ku'i mi pu no roi jinvi lo du'u lo cmalu nixli be mu'u do cu su'o roi ka'e rumgau mi gi'e tolcfagau lo mi palci nunzukte .i .o'i mi co'a co'e li'u»

ni'o fau tu'a lo di'u valsi cu farlu lo loldi fa la termafyfe'i ku poi bunre je runme be ba'o je nonseltai pesxu zi'e noi preja lo jinsa tanbo pe lo jupku'a loldi .i la .dorotis. fau lo nu viska lo nu ty ja'a ba'o runme ja'e lo no da cu cpacu lo drata baktu be lo djacu gi'e renro lo nenri lo tolcnici .i ba bo brulu'i catke pa'o lo vorme .i ba lo nu lebna lo pa rijno cutci noi ro pa mei lo vilvi'u be fo lo tolci'o ninmu ku'o la .dorotis. cu lumci cy se pi'o lo bukpu gi'e seldasygau cy lo jamfu .i ba ku dy fau lo nu ro mai zifre lo ka zukte lo se cuxna cu bajra barkla fi lo selsrustu te zu'e lo nu jungau la cinfo lo du'u la palci termafyfe'i pe la stici cu ba'o tolcfa .e lo du'u lo re mei cu co'u pinfu bu'u lo fange gugde

 






lo se mànci te màkfa pe la .oz.
ni'o ni'o pa ci mo'o
lo nu nurgau

ni'o la tolvirnu cinfo cu mutce lo ka se pluka lo ka junbi'o lo du'u la palci termafyfe'i ba'o se rumgau se pi'o lo baktu be lo djacu .i je la .dorotis. cu ba zi sai toltelgau lo vrogai pe lo pifku'a pe cy gi'e zifygau cy .i lo re mei cu kansi'u lo ka nerkla lo badydi'u noi bu'u ke'a pa moi lo se zukte be la .dorotis. fa lo ka klacpe ro la .uinkis. gi'e jungau uy lo du'u uy co'u selfu

ni'o carmi gleki fa lo pelxu .uinkis. .i ki'u bo uy pu jai se gasnu fai lo ka nanca li so'i fa lo nu ce'u carmi gunka se va'u la palci termafyfe'i ku noi ke'a pu ro roi fartra uy lo ka kusru .i uy jdice lo du'u lo ca se detri cu sladei ca je ze'e kei gi'e jai xaksu lo temci fai lo ka sorcti gi jo'u dansu

ni'o «lu .o'e nai va'o lo nu lo mi'o pendo no'u la cpitepygau .e la tinci mudypre cu kansa mi'o zo'u: —sei la cinfo cu cusku— mi gleki mutce li'u»

ni'o «lu ru'a pei mi'o ka'e nurgau lo re mei —sei lo nixli cu xanka retsku— li'u»

ni'o «lu mi'o ka'e troci —sei la cinfo cu spusku— li'u»

ni'o ja'e bo klacpe la pelxu .uinkis. gi'e retsku fi uy fe lo se du'u xu kau uy djica lo ka sidju fi lo ka nurgau lo pendo .i je la .uinkis. cu cusku lo se du'u da'i uy gleki lo ka zukte ro lo se kakne se va'u la .dorotis. ku noi pu gasnu lo nu uy co'u selfu .i ja'e bo dy cuxna lo su'o .uinkis. poi simlu fi dy fe lo ka traji lo ka djuno xo kau da .i je lo ro da cu tolsti lo ka klama .i litru ca lo ca djedi je ze'a pi su'o lo bavla'i djedi gi'e klasti ca lo nu tolcliva lo jai bu'u vreta be fai la tinci mudypre ku noi vreta co se daspo je korcu mutce .i lo ka'amru pe my cu zvajbi .i ku'i lo balre cu furtirse .i je lo batke cu porpi

ni'o la .uinkis. cu toljursa lafti ty my se pi'o lo birka gi'e xrubei ty my la pelxu badydi'u fau lo nu la .dorotis. cu klaku so'o kakydirgo lo se viska betri pe lo dirba pendo kei .e lo nu la cinfo cu mutce lo ka kecti .i ca lo nu lo ro da cu tolcliva la badydi'u kei la .dorotis. cu cusku fi la .uinkis.:

ni'o «lu xu su'o lo do se gugde cu tincyzba li'u»

ni'o «lu go'i .i su'o mi'a certu mutce tincyzba —sei uy fi dy jungau— li'u»

ni'o «lu ja'o ko klagi'a ty mi —sei dy cusku— li'u» .i ca lo nu lo tincyzba cu klama fau lo nu bevri ro lo tutci pe ty kei dy retsku «lu xu do kakne lo ka vimcu lo kevna la tinci mudypre gi'e krogau ri ja'e lo nu di'a drani se tarmi kei gi'e jinjongau lo spofu pagbu li'u»

ni'o lo tincyzba cu mutce merli la mudypre gi'e ba bo spusku lo se du'u ty jinvi lo du'u ty kakne lo ka cikre my ja'e lo nu tcini du'i lo nu no'a ca lo purci .i ja'e bo ty co'a gunka bu'u pa lo barda ke pelxu kumfa be lo badydi'u gi'e gunka ze'a lo ci donri jo'u lo vo nicte fau lo nu mrupli gi'e tongau gi'e krogau gi'e jinjongau gi'e spali gi'e darxi vau lo tuple .e lo xadni .e lo stedu be la tinci mudypre co'u lo nu ca lo fanmo ge ty my sirji du'i lo nu pu no'a gi lo cidni cu di'a prane tolpo'u .i ju'o so'i da vabyficfoi ty my .i ku'i lo tincyzba pu xamgu gunka .i je la mudypre ki'u lo nu ri na sezyjgi cu na sai se nabmi lo vabyficfoi

ni'o ca lo nu ro mai my nerdzukla lo kumfa pe la .dorotis. gi'e kirsku dy lo ka nurgau my .i my tai gleki gi'e ja'e bo klaku lo gleki kakydirgo .i je la .dorotis. cu bilga lo ka te zu'e lo nu lo cidni na furtirbi'o cu racyju'i vimcu ro lo kakydirgo lo flira .i ca lo mintu lo dy. sevzi kakydirgo cu rotsu je sutra farlu ri'a lo nu gleki lo nu za'u re'u penmi lo slabu pendo .i je lo vi kakydirgo cu na jai se nitcu fai lo ka vimcu .i la cinfo zo'u: cy tai so'i roi satre lo kanla be cy. se pi'o lo jipno be lo rebla ja'e lo nu binxo lo ka cilmo mutce kei .e lo nu cy. bilga lo ka bartu klama lo selsrustu gi'e zvagau ry lo solgu'i co'u lo nu sudbi'o

ni'o «lu .o'e nai va'o lo nu da'i mi'o di'a tolcau la cpitepygau kei —sei la tinci mudypre cu cusku be ca lo nu la .dorotis. ba'o mo'u jungau my fo ro lo ba'o fasnu— mi mutce lo ka gleki li'u»

ni'o «lu mi'o bilga lo ka tolcri cy —sei lo nixli cu cusku— li'u»

ni'o ja'e bo ny cu klacpe la .uinkis. gi'e cpedu lo ka sidju ny .i lo ro mei cu cadzu ze'a pi ro lo ca djedi su'i pi su'o lo bavla'i .i co'u bo tolcliva lo bi'u nai galtu tricu poi la selna'i smani pu renro lo taxfu pe la cpitepygau lo jimca be ke'a

ni'o galtu mutce tricu .i je lo stani cu tai xutla ja'e lo nu no da ka'e cpare .i ku'i la mudypre cu cusku «lu mi ta ba katna .i ja ba bo mi'o ka'e cpacu lo taxfu pe la cpitepygau li'u»

ni'o pu ca lo nu lo tincyzba cu ca'o gunka lo ka cikre lo du be la mudypre kei kei pa drata .uinkis. noi slozba cu zbasu lo ka'amru jaitci poi sligu lo solji ku'o gi'e matygau fi lo ka'amru pe la mudypre fe jy noi basti lo laldo ke spofu jaitci .i su'o drata cu spali lo balre co'u lo nu ro lo furtirse cu ba'o se vimcu .e lo nu camgu'i tai tu'a lo se spali rijno

ni'o ca sai lo nu ty my mo'u tavla kei la tinci mudypre cu tolsti lo ka katna .i je ba za lo cmalu lo tricu cu farlu fau lo nu cladu savru noi ba ke'a lo taxfu pe la cpitepygau cu farlu fi lo jimca gi'e gunro lo loldi

ni'o la .dorotis. cu lafti ty gi'e gasnu lo nu la .uinkis. cu xrugau bevri ty lo noldi'u noi bu'u ke'a ty terse'a lo zabna je jinsa sudysrasu .i je ua za'a zvati fa la cpitepygau fau lo nu simsa lo purci tarmi gi'e za'u re'u je za'u re'u kirsku fi lo ka nurgau cy

ni'o ca ku fau lo nu refkansi'u kei la .dorotis. .e lo ri pendo cu xaksu lo so'o gleki djedi bu'u la pelxu badydi'u ku noi bu'u ke'a tolcri ro da poi nitcu ke'a lo ka kufra

ni'o ku'i ca pa lo djedi lo nixli cu pensi la fetfamti .em. gi'e cusku «lu mi'o nitcu lo ka xruti la .oz. gi'e cpacu lo mi'o se nupre li'u»

ni'o «lu go'i —sei la mudypre cu cusku— .i uo mi ba cpacu lo mi risna li'u»

ni'o «lu si'a mi ba cpacu lo mi besna —sei la cpitepygau cu gleki jmina— li'u»

ni'o «lu si'a mi ba cpacu lo mi kamvirnu —sei la cinfo cu pensi cusku— li'u»

ni'o «lu si'a mi ba xruti la .kanzas. —sei la .dorotis. cu krixa be fau lo nu jalsimgau lo xance— .i .e'e mi'o ca lo bavlamdei cu tolsti lo ka co'e fa'a la ri'ojme tcadu li'u»

ni'o la'e di'u jai se jdice fai lo ka zukte .i ca lo bavla'i djedi cu klacpe la .uinkis. gi'e tolrinsa uy .i la .uinkis. cu badri lo nu lo drata cu cliva .i je uy pu binxo lo ka tai nelci la tinci mudypre kei ja'e lo nu pikci ty my lo ka stali gi'e turni uy .e la pelxu gugde pe la stici .i la .uinkis. ca lo nu sajbi'o lo du'u lo drata cu djitsa lo ka cliva cu dunda .i je la .totos. gi la cinfo pa solji djine .i je fi la .dorotis. cu dunda fa uy lo melbi birja'i poi cpana fa lo tabjme .i je fi la cpitepygau cu dunda lo solji jipno ke cadzu grana te zu'e lo nu fanta lo nu cy. farlu .i je fi la tinci mudypre cu friti lo rijno ctilylante noi lo solji cu pagbu zi'e poi lo dirba jemna cu cpana

ni'o ro lo litru se va'u la .uinkis. cu cusku lo melbi .i je lo ro mei cu xanjaisi'u co'u lo nu cortu lo birka

ni'o la .dorotis. cu klama lo kajnyta'e pe la termafyfe'i te zu'e lo nu clugau lo lanka lo cidja te zu'e tu'a lo nunli'u .i je ca ku dy viska lo solji mapku .i dy. troci lo ka stedu dasni my kei gi'e facki lo du'u prane mapti .i dy na djuno su'o da pe lo makfa pe la solji mapku .i ku'i dy. viska lo nu my. melbi .i ja'e bo dy. zu'ejdi lo ka dasni my gi'e bevri lo solmapku fau lo nu ri nenri lo lanka pe dy

ni'o ba ku fau lo nu bredi tu'a lo nunli'u kei lo ro mei cu tolsti tu'a la ri'ojme tcadu .i je la .uinkis. cu ci roi tolrinsa gi'e cusku so'i jai te xendo poi lo go'i ka'e pensi ke'a ca lo nu litru

 






lo se mànci te màkfa pe la .oz.
ni'o ni'o pa vo mo'o
la selna'i smani

ni'o ju'o do morji lo du'u zasti fa no klaji (to je nai ji'a sai lo cadzu pluta toi) bu'u lo badydi'u pe la palci termafyfe'i ge'u bi'i la ri'ojme tcadu .i ca lo nu lo vo litru cu ca'o klama co sisku la termafyfe'i kei ty cu viska lo nu ly cu klama kei gi'e ja'e bo minde fi la selna'i smani fe lo ka klama gi'e zvagau ly boi ty .i fi ly nadmau zei mutce fa lo ka facki lo du'u ve ka'a ma kau xrukla pagre lo barda foldi be lo matnyxrula jo'u lo pelxu sparbeli kei kei lo ka se bevri .i ly djuno li'a lo du'u bilga lo ka sirji klama lo stuna fa'a lo galze'a solri .i je ly tolsti fau lo nu klama lo drani farna .i ku'i ca lo dormidju ca lo nu lo solri cu gapru lo stedu be ly kei ly na djuno lo du'u ma kau fa'u ma kau stuna fa'u stici .i je la'e di'u krinu lo nu farcri bu'u lo barda foldi .i ku'i ly stodi lo ka cadzu .i je ca lo nicte lo lunra cu tolcanci gi'e carmi te gusni .i ja'e bo ly zukte vrebi'o lo jbini be lo titla se panci ke pelxu xrula gi'e condi sipna co'u lo cerni .i sa'e go'i fa ro boi ly po'u na'e bo la cpitepygau ja la tinci mudypre


ni'o ca lo bavla'i cerni lo solri cu trixe lo dilnu .i ku'i co'a klama tai lo nu mutce lo ka birti lo du'u klama fa'a ma kau

ni'o «lu va'o lo nu lo jai ve'a cadzu cu banzu zo'u: —sei la .dorotis. cu cusku se'u— ju'o mi'o ca da tolcliva su'o stuzi li'u»

ni'o ku'i so'o djedi cu prubi'o .i je lo bi'u nai litru cu za'o viska no da poi crane ly gi'e na me lo camxu'e foldi .i la cpitepygau cu co'a fegmliba'u milxe

ni'o «lu ju'o mi'o ba'o malkla —sei cy cusku— .i je va'o lo nu na ku lo ni clira fa lo nu mi'o tolcliva la ri'ojme tcadu cu banzu zo'u: mi ba no roi cpacu lo mi besna li'u»

ni'o «lu si'a na ku mi lo mi risna —sei la tinci mudypre cu xusra cusku— .i si'au mi ja'a ru'e ka'e denpa lo nu penmi la .oz. .i je ju'o ru'e do mi tugni lo du'u clani mutce nu litru li'u»

ni'o «lu .oi —sei la tolvirnu cinfo cu patcmo cusku be fau lo nu pa roi crocmo— .i mi na virnu be'au lo nu ze'e cadzu se cau lo nu tolcliva ba'e su'o da li'u»

ni'o ca ku la .dorotis. cu cirko lo ka pacna .i dy tsebi'o lo srasu gi'e catlu lo ra kansa .i je ky cu tsebi'o gi'e catlu dy .i je la .totos. cu cinmo lo ka pa re'u lo ri nunji'e cu dukse lo ka tatpi kei lo nu jersi lo toldi poi ca vofli lampagre lo vo'a stedu .i ja'e bo ty cu bargau lo tanxe gi'e gerva'u gi'e catlu la .dorotis. tai lo nu djica lo nu retsku fi dy fe lo du'u .ei lo ro da ca zukte ma kau

ni'o «lu da'i mi'o klacpe lo tumsmacu —sei dy stidi— .i la'a ty kakne lo ka jungau mi'o lo du'u ma kau pluta la ri'ojme tcadu li'u»

ni'o «lu ju'o sai kakne —sei la cpitepygau cu krixa .i ki'u ma mi'o na pensi la'e di'u pu ku li'u»

ni'o la .dorotis. cu bifca'e lo cmalu siltcu poi dy. pu ro roi dasni fau lo nu dandu lo cnebo kei co'a lo nu la noltruni'u be la smacu pu dunda sy. boi dy. .i ba zi lo mentu be li so'o cu tirna lo tapsata be tu'a lo cmalu jamfu .i je so'i lo cmalu ke grusi smacu cu bajra jbibi'o dy .i me lo go'i fa lo du be la noltruni'u ku noi torbrato'a ke cmalu voksa retsku:

ni'o «lu da'i mi sidju lo mi pendo ta'i ma li'u»

ni'o «lu mi'a pu malkla —sei la .dorotis. cu cusku— .i xu do kakne lo ka jungau mi'a lo du'u ma kau stuzi la ri'ojme tcadu li'u»

ni'o «lu ju'o —sei la noltruni'u cu spusku— .i ku'i darno milxe .i ki'u bo do pu ze'a lo mulno cu se trixe ry ty li'u» .i ba bo my cu sajbi'o la solji mapku ku pe la .dorotis. gi'e cusku «lu mu'i ma na ku do pilno lo makfa pe la mapku gi'e klacpe la selna'i smani .i da'i sy sy do bevri la tcadu pe la .oz. ze'a lo cacra be li me'i pa li'u»

ni'o «lu mi pu na djuno lo du'u makfa —sei la .dorotis. fau lo nu se spaji cu spusku— .i makfa rinka ma li'u»

ni'o «lu se ciska fi lo nenri be la solji mapku —sei la noltruni'u be la smacu cu spusku— .i ku'i va'o lo nu do ba klacpe la selna'i smani kei mi'a nitcu lo nu to'o bajra .i mu'i bo sy sy kusru mutce gi'e jinvi lo du'u zdile fa lo nu kusru mi'a li'u»

ni'o «lu xu sy mi na ba crogau —sei lo nixli cu xanka retsku— li'u»

ni'o na go'i .i sy bilga lo ka tinbe fi lo dasni be la mapku .i co'o li'u» .i je ny cu to'o klama co nalselvi'a binxo fau lo nu ro lo smacu cu jersi

ni'o la .dorotis. cu catlu lo nenri be la solji mapku gi'e viska lo so'u valsi poi se ciska fi lo nenri korbi .i «lu ti —sei dy pensi— cu ru'a makfa rinka valsi li'u» .i mu'i ku dy. racyju'i tcidu lo ctuselsku gi'e punji la mapku lo stedu be dy.

ni'o zoi «lu. Ep-pe, pep-pe, kak-ke! .lu» —sei dy fau lo nu sanli lo zunle jamfu cu cusku—

ni'o «lu do ma pu cusku —sei la cpitepygau ku noi na djuno lo du'u dy mo kau cu retsku li'u»

ni'o zoi «lu. Hil-lo, hol-lo, hel-lo! .lu» —sei la .dorotis. fau lo nu ca lo ca krefu cu sanli lo pritu jamfu cu di'a co'e—

ni'o «lu coi —sei la tinci mudypre cu smacni spuda— li'u»

ni'o zoi «lu Ziz-zy, zuz-zy, zik! .lu» —sei la .dorotis. ku noi ca sanli lo re jamfu cu cusku— .i la'e di'u se fanmo lo makfa selsku .i tirna lo cladu nunta'a je nu nalci muvdu kei fau lo nu lo bende be la selna'i smani cu fa'a ga'u voikla lo drata

ni'o la nolraitru cu dizlo krobi'o ca'u la .dorotis. gi'e retsku «lu do mi'a ma minde li'u»

ni'o «lu mi'a djica lo ka klama la ri'ojme tcadu kei —sei lo verba cu cusku— gi'e farcri li'u»

ni'o «lu mi'a do'o ba bevri —sei la nolraitru cu spusku— li'u» .i ca sai lo nu ny cu mo'u tavla kei je la smani cu jairbi'o la .dorotis. lo birka gi'e to'o vofli to'e se cau dy .i lo drata cu lebna la cpitepygau .e la mudypre .e la cinfo .i je lo pa cmalu me la smani cu jairbi'o la .totos. gi'e vofli jersi lo drata vau to'e ki'u nai lo nu lo gerku cu mutce lo ka troci lo ka batci cy

ni'o la cpitepygau .e la tinci mudypre ca lo cfari cu tcemli lo ka terpa .i ki'u bo morji lo li'i la selna'i smani pu xlali fartra vo'a .i ku'i lo go'i cu ganse lo du'u na djica lo nu xrani kei gi'e ja'e bo gleki mutce tsekla pa'o lo vacri gi'e pukfri lo ka catlu lo melbi purdi .e lo melbi ricfoi vu'o poi darno cnita

ni'o la .dorotis. cu kufra lo ka tsekla bu'u lo jbini be lo re me lo brarai be la smani be'o noi pa ke'a me la nolraitru .i sy pu zbasu lo stizu lo xance be sy. gi'e racyju'i lo ka na crogau dy

ni'o «lu ki'u ma do'o bilga lo ka tinbe fi lo makfa pe la solji mapku —sei dy retsku— li'u»

ni'o «lu clani lisri —sei la nolraitru fau lo nu nalci cmila cu spusku— .i ku'i mi ki'u lo nu ma'a pu'o ze'u litru cu .ai jai xaksu lo temci fai lo ka lisysku la'e di'u (to va'o lo nu do djica toi) li'u»

ni'o «lu da'i mi ba gleki lo ka tirna —sei dy spusku— li'u»

ni'o «lu ni'o pu zu ku —sei lo jatna cu co'a tavla— mi'a zifre prenu gi'e gleki xabju lo barda ricfoi fau lo nu mi'a voikla lo pa tricu lo drata gi'e citka lo narge .e lo grute gi'e zukte fi lo se djica be mi'a se cau lo nu da selse'u mi'a .i ju'o cu'i su'o mi'a su'o roi dukse lo ka ra'utra kei fau lo nu fa'a ni'a vofli te zu'e lo nu lacpu lo rebla be lo danlu poi na se nalci kei .e lo nu jersi lo cipni .e lo nu renro lo narge lo prenu poi cadzu ne'i lo ricfoi .i ku'i mi'a nonselra'u gi'e gleki gi'e mulno lo ka selzdi kei gi'e selpu'a ro mentu pe lo djedi .i la'e di'u cabyseltei lo nanca be li so'i gi'e seltei lo barda lo nu la .oz. cu barkla lo dilnu te zu'e lo nu turni lo vi gugde

ni'o pu zu vi ku xabju lo darno berti fa lo melbi noltruti'u noi ke'a ke ji'a vlipa te makfa .i ro lo ri makfa cu se pilno fi lo ka sidju lo prenu .i je ra no roi jai se djuno fai lo ka xrani da poi vrude .i cmene ra fa zo .geilet. .i xabju lo melbi noldi'u poi zilzba lo barda bliku be lo zirxunjme .i ro da prami gy .i ku'i traji lo ka gy. badri ce'u kei fa lo nu gy. ki'u lo nu ro lo nanmu cu dukse lo ka bebna gi'e to'emle kei lo ka gletu lo ninmu poi tai melbi gi'e tai prije cu na kakne lo ka tolcri su'o da poi gy. ke'a ka'e prami .i ro mai ku'i gy. tolcri lo nanla poi ke'a melbi je nanmu je prije zmadu lo na'azma be ke'a .i la .geilet. cu jdice lo du'u gy. ca lo nu ny. ma'urnau cu gasnu lo nu ny. speni gy .i ja'e bo gy. zvagau ny lo gy. noldi'u gi'e pilno ro lo makfa se kakne lo ka gasnu lo nu ny. tsali gi'e vrude gi'e kukte ja'e lo nu da'i no ninmu ka'e djica lo zmadu .i ca lo nu banro lo makcu kei la .kuelalas. noi bi'u cmene ke'a cu jai se jinvi fai lo ka xagrai je pijrai nanmu te rai lo ro se gugde .i je lo ni ky. nanmu melbi cu tai barda ja'e lo nu la .geilet. cu se dirba prami ky gi'e sutyzu'e lo ka gasnu lo nu ro da bredi tu'a lo specfari'i

ni'o lo mi rirpa'u cu nolraitru la selna'i smani ku noi xabju lo ricfoi poi jibni lo noldi'u pe la .geilet. .i je lo bi'u nai tolci'o cu zmanei lo xamgu xamselsku lo xamgu vacysai .i ca pa djedi zi pu lo specfari'i lo mi rirpa'u cu vofli litru fi'o kansa lo bende .i ca bo ry. viska lo nu la .kuelalas. cu cadzu re'o lo rirxe .i ky dasni lo ricfu taxfu co xunblabi joi zirpu demsilka .i je lo mi rirpa'u cu zukpei lo ka troci da .i co'a tu'a lo valsi pe ry lo bende cu fa'a ni'a vofli gi'e jairbi'o la .kuelalas. gi'e bevri ri lo birka co'u lo nu zvati lo gapru be lo midju be lo rirxe kei gi'e falgau ky lo djacu

ni'o «lu ko limkla lo bartu doi pe mi xamgu nanmu —sei lo mi rirpa'u cu krixa— gi'e facki lo du'u xu kau lo djacu cu jai rinka lo nu lo do taxfu cu se barna li'u» .i la .kuelalas. cu dukse lo ka prije kei lo ka na limna .i je lo nu ky. ricfu cu na sai se jalge lo nu ky. na'e vrude .i ky. cmila ca lo nu tolyli'a lo gapru be lo djacu kei gi'e limkla lo ri'erkoi .i ku'i la .geilet. ca lo nu klama lo bartu ju'e ky cu facki lo du'u ro lo silka je ro lo dimsilka pu se daspo lo rirxe

ni'o lo noltruti'u cu fengu .i je ri djuno li'a lo du'u ma kau pu gasnu .i ny gasnu lo nu ro la selna'i smani cu zvati lo crane be ny .i je ny. pa moi cusku lo se du'u djica lo nu lo nalci be sy sy cu se ciljonsimgau .e lo nu sy se fartra du'i lo nu sy pu no'a la .kuelalas. kei gi'e se falgau fi lo rirxe .i ku'i lo mi rirpa'u cu mutce lo ka pikci .i ki'u bo ry. djuno lo du'u la smani va'o lo nu lo nalci cu ciljonsi'u cu jaurvasmro ne'i lo rirxe .i je ji'a la .kuelalas. cu cusku da poi xendo sy .i ja'e bo la .geilet. cu ro mai curmi lo nu sy na se xrani kei lo nu ba ku la smani cu bilga lo ka ci roi tinbe lo se minde be lo dasni be la solji mapku .i lo bi'u nai mapku pu se zbasu te zu'e lo nu my. specfari'i seldu'a fi la .kuelalas. .i je my jai se krici fai lo ka se jdima lo xadba be lo noltutra .i li'a lo mi rirpa'u je ro lo drata smani cu ba zi sai tugni fi lo se bilga .i je la'e di'u se jalge lo nu ro da poi ponse la solji mapku zo'u: mi'a ci roi selfu da .i ju da mo kau li'u»

ni'o «lu ma jalge tu'a lo re mei —sei la .dorotis. ku noi pu mutce lo ka se cinri lo lisri cu retsku— li'u»

ni'o «lu la .kuelalas. ki'u lo nu ri pa moi lo ponse be lo solji mapku —sei la smani cu spusku— cu pa moi lo minde be mi'a bei lo se djica be ky .i ky ki'u lo nu lo speni be ky cu na kakne lo ka jdari lo jvinu be mi'a cu klami'e mi'a ky noi zvati lo ricfoi kei ba lo nu spebi'o kei gi'e minde mi'a lo ka ro roi zvati da poi lo speni be ky na ka'e viska su'o la selna'i smani kei noi mi'a pu gleki lo ka tinbe ke'a kei ki'u lo nu ro mi'a pu terpa sy

ni'o la'e di'u ro mei lo mi'a se bilga co'u lo nu la solji mapku cu jai fasnu fai lo ka zvabi'o lo xance be la palci termafyfe'i pe la stici ku noi gasnu lo nu mi'a sefygau la .uinkis. gi'e ba bo li'argau lo du be la .oz. la gugde pe la stici .i ca ku la solji mapku cu me do moi .i je ci roi ku do se krali lo ka gasnu lo nu mi'a tinbe lo se djica be do li'u»

ni'o ca lo nu la smani nolraitru cu mo'u lisysku kei la .dorotis. cu fa'a ni'a catlu gi'e viska lo crino je gusycai bitmu pe la ri'ojme tcadu ku noi crane .i dy se spaji lo sutra nu vofli pe la smani gi'e ku'i gleki lo nu lo nunli'u cu mulno .i lo cizra danlu cu toljursa punji lo litru lo crane be lo balvro pe la tcadu .i je la nolraitru cu dizlo krobi'o fa'a la .dorotis. gi'e ba bo to'o sutra vofli fau lo nu pi ro lo ri bende cu jersi

ni'o «lu xamgu nu tsekla —sei lo cmalu nixli cu cusku— li'u»

ni'o «lu ie .i ji'a sutra tadji lo nu rivbi lo mi'o raktu —sei la cinfo cu spusku— .i zanfu'a mutce fa lo nu do pu lebna lo va se manci mapku li'u»

 

 







lo se mànci te màkfa pe la .oz.
ni'o ni'o pa mu mo'o
lo nu facki fi la .oz. no'u la xlatce

ni'o lo vo litru cu cadzu klama lo barda vrogai pe la ri'ojme tcadu gi'e selsnagau lo janbe .i ba lo nu so'i roi selsnagau cu se kargau lo mintu badypre pe lo vrogai be'o poi ly ke'a pu pa roi penmi

ni'o «lu ue sai .i xu do ba'o xruti —sei by fau lo nu se spaji cu retsku— li'u»

ni'o «lu xu do mi'a na viska —sei la cpitepygau cu spusku— li'u»

ni'o «lu ku'i mi pu jinvi lo du'u do pu klama gi'e vitke la palci termafyfe'i pe la stici li'u»

ni'o «lu mi'a ty pu ja'a vitke —sei la cpitepygau cu cusku— li'u»

ni'o «lu .i je ty pu curmi lo nu do cliva xu —sei lo nanmu cu manci retsku— li'u»

ni'o «lu ty pu na ka'e fanta .i ki'u bo ty cu rumne —sei la cpitepygau cu ciksi— li'u»

ni'o «lu rumne ue .i la'e di'u xamgu nuzba ja'a ku —sei lo nanmu cu cusku—.i ma ty pu rumgau li'u»

ni'o «lu la .dorotis. cu go'i —sei la cinfo cu junri cusku— li'u»

ni'o «lu ue sai —sei lo nanmu cu krixa— li'u» .i je ny cu dizlo mutce krobi'o ca'u dy

ni'o ba bo ny lo drata cu klagi'a lo vo'a cmalu kumfa gi'e stela jongau lo vistci lo kanla pe ro lo drata du'i lo nu ny cu no'a ca lo prula'i .i ba bo lo vo da pagre lo vorme be la ri'ojme tcadu .i ca lo nu lo prenu cu se jungau la badypre be lo vrogai lo du'u la .dorotis. pu rumgau la palci termafyfe'i pe la stici kei ro boi py jmaji lo sruri be lo litru gi'e jersi ly fau lo nu barda pregunma kei fa'a la noldi'u pe la .oz.

ni'o lo sonci pe lo crino zbikre cu za'o bandu sanli ca'u lo vorme .i ku'i sy ba zi nerklacru ly .i e ly cu za'u re'u se penmi lo melbi ke crino nixli noi ba zi klagi'a ro boi ly lo kumfa pe ly te zu'e lo nu ly cu ka'e surla co'u lo nu la banli .oz. cu bredi lo nu se penmi ly

ni'o lo sonci cu gasnu lo nu la .oz. cu ba zi se jungau fi lo nuzba poi du'u la .dorotis. .e lo drata litru pu xruti ba lo nu daspo la palci termafyfe'i .i ku'i la .oz. spuda fi no da .i ly kanpe lo nu la banli te makfa cu ba zi cpagau ly .i ku'i .obu na co'e .i ly te cusku no valsi pe la .oz. ca lo bavla'i djedi .a lo bavla'i .a lo bavla'i .i lo nu denpa cu ta'inri'a gi'e tolzdi .i je ro mai ly binxo lo ka fengu lo du'u la .oz. ba lo nu .obu gasnu lo nu ly. lifri lo nadytcini .e lo ka selfu cu tai xlali fartra ly .i se ki'u bo la cpitepygau cu ro mai cpedu fi lo crino nixli fe lo ka bevri fi la .oz. fe lo drata notci poi se du'u ly. va'o lo nu .obu na ba zi sai curmi lo nu ly. nerkla gi'e viska .obu cu klami'e la selna'i smani gi'e minde sy lo ka sidju ly kei gi'e facki lo du'u xu kau .obu gasnu lo se nupre .i la te makfa ca lo nu te dunda lo bi'u nai notci cu tai terpa ja'e lo nu .obu notybe'i fi ly fe lo se du'u .e'a klama la nolstizu kumfa ca lo bavla'i cerni ti'u li so pi'e vo .i .obu pu pa roi penmi la selna'i smani bu'u la gugde pe la stici .i je .obu na djica lo nu za'u re'u penmi

ni'o lo vo litru cu lifri lo nunsipna claxu nicte fau lo nu ro da pensi lo seldu'a poi la .oz. pu nupre lo nu dunda ke'a da .i la .dorotis. pu sipybi'o pa po'o roi .i je dy ca la'e di'u cu senva lo nu dy cu zvati la .kanzas. ku noi bu'u ke'a la fetfamti .em. dy jungau lo du'u tai ma kau gleki lo nu lo .ebu cmalu nixli cu di'a zdazva

ni'o ca lo se tcika be li so ca lo bavla'i cerni lo crino se zbikre sonci cu klama ly .i je ba za lo mentu be li vo lo ro da nerkla la nolstizu kumfa pe la .oz.

ni'o li'a ro boi ly kanpe lo nu viska la .oz. ku pe lo tarmi poi .obu ke'a pu pa re'u se tarmi .i je ro boi ly mutce lo ka se spaji kei ca lo nu ru'u catlu gi'e viska no sai prenu poi nenri lo kumfa .i stali lo jibni be lo vorme gi'e simxu lo ka zmadu jibni .i mu'i bo lo nunsmaji pe lo kunti kumfa cu zmadu ro lo tarmi be la .oz. lo ka mabla

ni'o ca'o ku lo vitke cu tirna lo salci tonga voksa noi simlu lo ka se krasi lo jibni be lo galraipau be lo barda kumfa zi'e noi cusku

ni'o «lu mi'e .oz. no'u la banli je xlatce .i mu'i ma do mi sisku li'u»

ni'o lo litru cu za'u re'u sisku catlu ro pagbu be lo kumfa .i je ba bo la .dorotis. fau lo nu viska no prenu cu retsku «lu do ma zvati li'u»


ni'o «lu mi ro da zvati —sei la voksa cu spusku— .i ku'i mi nonselji'u lo kanla be lo fadni mroka'e .i mi ca ba tsebi'o lo mi nolstizu te zu'e lo nu do mi ka'e tavla li'u» .i je'u la voksa cu simlu lo ka ca se krasi lo nolstizu .i se mu'i bo lo drata cu cadzu fa'a ny .i ca bo la .dorotis. cu cusku

ni'o «lu mi'a pu klama te zu'e lo nu do gasnu lo mi'a se nupre be do doi .oz. li'u»

ni'o «lu ma se nupre —sei la .oz. cu retsku— li'u»

ni'o «lu do pu nupre lo nu benji mi la .kanzas. ca lo nu la palci termafyfe'i ba'o se daspo —sei lo nixli cu cusku— li'u»

ni'o «lu ji'a do pu nupre lo nu dunda lo besna mi —sei la cpitepygau cu cusku— li'u»

ni'o «lu ji'a do pu nupre lo nu dunda lo risna mi —sei la tinci mudypre cu cusku— li'u»

ni'o «lu ji'a do pu nupre lo nu dunda lo kamvirnu mi —sei la tolvirnu cinfo cu cusku— li'u»

ni'o «lu xu la palci termafyfe'i cu ja'a ba'o se daspo —sei la voksa cu retsku— li'u» .i je la .dorotis. cu te simlu fi vy fe lo ka desku milxe

ni'o «lu go'i —sei dy spusku— .i mi ty pu rumgau se pi'o lo baktu be lo djacu li'u»

ni'o «lu ue sai —sei la voksa cu cusku— .i suksa mutce .i .i'a ko mi klama ca lo bavlamdei .i ki'u bo mi nitcu lo temci lo nu pensi li'u»

ni'o «lu do ba'o kakne lo ka ze'u pensi —sei la tinci mudypre cu fengu cu cusku— li'u»

ni'o «lu .ai mi'a na denpa ze'a lo se jmina djedi —sei la cpitepygau cu cusku— li'u»

ni'o «lu do bilga lo ka gasnu lo do se nupre be fi mi'a —sei la .dorotis. cu basna cusku— li'u»

ni'o la cinfo cu jinvi lo du'u xamgu fa lo nu fepygau la te makfa .i se mu'i bo cy cu cmoni lo barda je cladu selcmo noi tai tsali je mabla ku'o ja'e lo nu la .totos. cu to'o plipe fau lo nu terpa carmi kei gi'e falgau lo sepybi'u poi zvati pa lo kojna .i ca lo nu by farlu fau lo nu maxyvru kei kei lo ro da cu fa'a catlu .i je ca lo bavla'i mokca ro lo ro da cu mulno lo ka manci .i ki'u bo viska lo nu zvati je'a lo mokca poi lo sepybi'u pu mipri ke'a ku'o fa lo cmalu ke tolci'o nanmu noi sedykrecau zi'e noi lo flira be ke'a cu se cinje zi'e noi simlu lo ka dunli lo drata lo ka ma kau ni ce'u se spaji .i la tinci mudypre fau lo nu galgau lo ri ka'amru cu bajra fa'a lo cmalu nanmu gi'e krixa «lu do du ma li'u»

ni'o «lu mi'e .oz. no'u la banli je xlatce —sei lo cmalu nanmu cu desku voksa cusku— .i ku'i ko mi na darxi .i .e'o do na go'i .i se va'o bo mi ba zukte ro lo do se djica li'u»

ni'o lo ma'a pendo cu catlu ny fau lo nu se spaji gi'e xanka

ni'o «lu mi pu jinvi lo du'u la .oz. cu barda stedu —sei la .dorotis. cu cusku— li'u»

ni'o «lu si'a mi pu jinvi lo du'u la .oz. cu kukte ninmu —sei la cpitepygau cu cusku— li'u»

ni'o «lu si'a mi pu jinvi lo du'u la .oz. cu xlatce danlu —sei la tinci mudypre cu cusku— li'u»

ni'o «lu si'a mi pu jinvi lo du'u la .oz. cu bolci lo fagri —sei la cinfo cu cusku— li'u»

ni'o «lu na go'i .i ro do toldra —sei lo cmalu nanmu cu ruble cusku— .i mi pu tcica li'u»

ni'o «lu ue tcica —sei la .dorotis. cu krixa— .i xu do na banli te makfa li'u»

ni'o «lu .e'o do smaji doi dirba —sei .obu cusku— .i ko na tai cladu cusku .i se va'o nai bo lo drata do ba tirna .i je mi ba se maldimna .i .ei mi banli te makfa li'u»

ni'o «lu xu do na go'i —sei la .dorotis. cu retsku— li'u»

ni'o «lu na sai go'i doi dirba .i sa'u mi fadni prenu li'u»

ni'o «lu do xlamau lo fadni —sei cpitepygau cu badri tonga cusku— .i do ticpre li'u»

ni'o «lu ie sai —sei lo cmalu nanmu fau lo nu termosysimgau lo xance tai lo nu la'e di'u ny pluka cu cusku— .i mi ticpre li'u»

ni'o «lu ku'i la'e di'u xlatce —sei la tinci mudypre cu cusku .i ta'i ma mi ba cpacu lo mi risna li'u»

ni'o «lu si'a mi go'i lo mi kamvirnu —sei la cinfo cu retsku— li'u»

ni'o «lu si'a mi go'i lo mi besna —sei la cpitepygau fau lo nu vimcu lo se klaku lo kanla se pi'o lo kosta birtu'u cu cusku— li'u»

ni'o «lu doi pe mi dirba pendo —sei la .oz. cu cusku— mi fi do cpedu lo ka na casnu lo tai nalvai .i ko pensi mi .e lo xlatce raktu poi nu mi te facki li'u»

ni'o «lu xu no drata cu djuno lo du'u do ticpre —sei la .dorotis. cu retsku— li'u»

ni'o «lu no da po'u na'e bo lo vo do ja! mi cu djuno —sei la .oz. cu spusku— .i mi pu tcica ro lo prenu ze'a lo tai clani ja'e lo nu mi pu jinvi lo du'u mi ba no roi te facki .i pu barda se srera mi fa lo nu curmi lo nu do nerkla la nolstizu kumfa .i ta'e ku mi na viska lo ji'a sai mi selfu .i je se ki'u bo sy cu jinvi lo du'u mi xlatce li'u»

ni'o «lu ku'i mi na jimpe —sei la .dorotis. cu se cfipu cusku— .i ki'u ma mi do te jvinu lo barda stedu li'u»

ni'o «lu mi pu tcica —sei la .oz. cu spuda— .i .e'o klama fa'a ta .i se va'o bo mi fi do ba ciksi li'u»

ni'o .obu gidva klama lo cmalu kumfa be ti'a la nolstizu kumfa .i je lo drata .obu jersi .i .obu jarco lo pa kojna noi lo barda stedu noi zilzba lo so'i pelji senta gi'e co'e lo ralci se finti ke cinta flira cu lolcpana

ni'o «lu ta zo'u: mi pu dadgau fi lo drudi lo skori —sei la .oz. cu cusku— .i mi pu sanli ti'a lo sepybi'u! gi'e lacpu lo cilta te zu'e lo nu gasnu lo nu lo kanla cu muvdu .e lo nu lo moklu cu kalri li'u»

ni'o «lu ku'i lo voska zo'u mo —sei la .dorotis. cu te preti— li'u»

ni'o «lu mi befta'a —sei lo cmalu nanmu cu cusku— .i mi kakne lo ka renro lo sance pe lo mi voksa ro lo mi se djica stuzi .i ja'e bo do pu jinvi lo du'u lo voksa cu se sance lo stedu .i ti drata se pilno mi lo nu tcica do li'u» .i .obu fi la cpitepygau cu jarco lo taxfu .e lo firgai vu'o poi .obu ke'a pu dasni ca lo nu .obu simlu lo ka kukte ninmu .i je la tinci mudypre cu viska lo nu lo ri mabla danlu cu ckaji lo po'o ka gunma lo so'i skapi poi se fenso zi'e poi lo pinta mudri bo spisa cu sarji .i lo bolci be lo fagri zo'u: lo jitfa te makfa pu dadgau by ji'a lo drudi .i je'u by bolci lo mapni .i ku'i ca lo nu rincypu'i lo ctile kei lo bolci cu tsali jenca

ni'o «lu je'u —sei la cpitepygau cu cusku— .ei do ckeji lo ka tai ticpre li'u»

ni'o «lu mi co'e .i ju'o mi ja'a co'e —sei lo cmalu nanmu cu xenru cusku— .i ku'i no drata mi pu ka'e se zukte .i .e'o do tsebi'o .i lo stizu cu so'i mei .i mi fo do ba to'ai lisri lo me mi moi li'u»

ni'o ja'e bo tsebi'o gi'e tinju'i ze'a lo nu .obu te lisri lo di'e lisri

ni'o «lu mi jbena fo la .oma'as. li'u»

ni'o lu ue .i na darno zei mutce la .kanzas. —sei la .dorotis. cu krixa— li'u»

ni'o «lu go'i .i ku'i darmau ti —sei .obu fau lo nu badri desygau lo stedu fa'a dy cu cusku— .i mi ca lo nu ma'urbi'o cu binxo lo befyba'u .i je mi pu xamgu mutce se ctuca fi lo ka befyba'u kei fe lo banli balcre .i ro da klesi lo cipni .a lo danlu zo'u: mi kakne lo ka monfu'igau da li'u» .i ca ku .obu latcmo tai tu'a lo citmlatu ja'e lo nu la .totos. cu sirgau lo kerlo gi'e catlu te zu'e lo nu viska lo nu my ma kau zvati kei kei ro da .i «lu ba za lo temci —sei la .oz. cu di'a co'e— mi binxo lo ka tatpi la'e di'u kei gi'e binxo lo vartisyboi prenu li'u»

ni'o «lu ri mo —sei la .dorotis. cu retsku— li'u»

ni'o «lu prenu gi'e galbi'o ne'i lo vartisyboi ca lo tsirkuso djedi te zu'e lo nu lo remgunma cu jmaji .e lo nu ry. pleji fo lo ka viska lo tsirkuso se tigni —sei .obu ciksi— li'u»

ni'o «lu ua —sei dy cusku— .i mi djuno li'u»

ni'o «lu ni'o pu ku mi ca pa djedi cu galze'a ne'i lo vartisyboi .i je lo skori cu binxo lo ka se torni kei ja'e lo nu mi na ka'e di'a dizlo .i vy galze'a ja'e lo nu gapru lo dilnu .i tai darno ja'e lo nu lo flecu be lo vacri cu janli vy gi'e bevri vy ve'a lo minli be li so'i so'i .i ze'a lo donri su'i lo nicte mi litru pa'o lo vacri .i je ca lo cerni pe lo re moi be lo djedi mi cikybi'o gi'e viska lo nu lo vartisyboi cu fulta ga'u lo fange je melbi gugde

ni'o vy masno zenba lo ka dizlo .i je mi na sai se xrani .i ku'i mi zvati lo midju be lo fange prenu noi ca lo nu ke'a viska lo nu mi klama fi lo dilnu cu jinvi lo du'u mi banli te makfa .i li'a mi curmi lo nu py. jinvi la'e di'u kei ki'u lo nu py. terpa mi gi'e nupre lo ka zukte ro da poi mi djica lo nu vy ke'a zukte

ni'o «lu mi te zu'e sa'u lo nu mi se zdile .e lo nu lo xamgu prenu cu tolcando cu pu minde py lo ka zbasu lo vi tcadu .e lo mi noldi'u .i je py djica je xamgu zukte ro la'e di'u .i ba bo mi jinvi lo du'u mi lo gugde noi tai crino gi'e tai melbi cu te cmene «lu ri'ojme tcadu li'u» .i je te zu'e lo nu lo cmene cu zmadu mapti kei mi punji lo crino vistci ro lo prenu ja'e lo nu ro da poi se viska cu crino li'u»

ni'o «lu ku'i xu vi na ku ro da crino —sei la .dorotis. cu retsku— li'u»

ni'o «lu na zmadu su'o drata tcadu —sei la .oz. cu spusku— .i ku'i da ca lo nu da dasni lo crino vistci zo'u: li'a ro da poi se viska da cu skari lo ka crino kei da .i la ri'ojme tcadu cu se zbasu pu za lo nanca be li so'i sai .i ki'u bo mi pu citno nanmu ca lo nu lo vartisyboi cu bevri mi ti .i je mi nau tolci'o mutce nanmu .i ku'i lo mi prenu ba'o ze'u kanla dasni lo crino vistci ja'e lo nu so'i boi py jinvi lo du'u ja'a ri'ojme tcadu .i ju'o ry ty melbi stuzi gi'e ricfu lo jemna .e lo kargu jinme je ro xamgu poi se nitcu fi lo nu gleki .i mi ba'o xendo lo prenu .i je py. nelci mi .i ku'i co'a lo nu lo vi noldi'u cu se zbasu kei mi gau mi nenri gi'e viska no boi py li'u»

ni'o «lu pa lo brarai be lo se terpa be mi cu nu co'e la termafyfe'i .i ki'u bo to'e ki'u nai gi mi na sai kakne su'o makfa gi mi ba za facki lo du'u la termafyfe'i cu ja'a kakne lo se manci .i ty vu vo mei .i je ty. turni lo prenu pi xabju la berti fa'u la snanu fa'u la stuna fa'u la stici .i zanfu'a fa lo nu la termafyfe'i pe la berti fa'u la snanu cu vrude .i je mi pu djuno lo du'u lo re mei mi na xrani .i ku'i la termafyfe'i pe la stuna fa'u la stici cu xlatce palci .i je va'o lo nu da'i lo re mei pu na jinvi lo du'u mi zmadu lo du be ty lo ka vlipa cu ju'o pu daspo mi .i da'i nai mi pu jmive ze'a lo nanca be li so'i fau lo nu morsi terpa tu'a ty .i se ki'u bo do ka'e se xanri lo nu ma kau ni mi gleki ca lo nu mi junbi'o lo du'u lo zdani be do pu farlu la palci termafyfe'i pe la stuna .i mi pu ca lo nu do mi pu klama cu bredi lo ka va'o lo nu do catra lo drata termafyfe'i cu nupre ro da .i ku'i nau ku fau lo nu do ba'o rumgau ty zo'u: mi burna lo ka cusku lo se du'u mi na kakne lo ka gasnu lo se nupre li'u»

ni'o «lu pe'i do xlali mutce nanmu —sei la .dorotis. cu cusku— li'u»

ni'o «lu ie nai doi pe mi dirba .i je'u mi vrude mutce nanmu .i ku'i mi tolcre mutce te makfa .i mi bilga lo ka ra'arji'i li'u»

ni'o «lu xu do na kakne lo ka dunda lo besna mi —sei la cpitepygau cu retsku— li'u»

ni'o «lu do na nitcu by .i do ca ro djedi cu cilre da .i lo cifnu cu se besna .i ku'i cy na djuno so'i da .i lo nu lifri cu ro pa mei lo se jalge be lo nu djuno .i je lo jai ze'a zvati be lo terdi be fai do cu panra lo jai se la'u lifri be fai do li'u»

ni'o «lu cumki fa lo nu ro la'e di'u jetnu —sei la cpitepygau cu cusku— .i ku'i mi va'o lo nu na ku do dunda lo besna mi cu ba tolgei mutce li'u»

ni'o lo jitfa te makfa cu jundi catlu cy


ni'o «lu .y —sei cy fau lo nu patyva'u cu cusku— .i mi no'e te makfa .i ku'i va'o lo nu do ca lo bavlamdei cerni cu klama mi zo'u: mi ba setca lo besna lo do stedu .i ku'i mi na ka'e jungau do lo du'u ta'i ma kau pilno by .i do nitcu lo ka facki zu'e do po'o li'u»

ni'o «lu ki'e do ki'e do —sei la cpitepygau cu krixa— .i mi ba facki fi lo tadji be lo nu pilno .i ko na xanka li'u»

ni'o «lu ku'i lo mi kamvirnu zo'u: mo —sei la cinfo cu xanka retsku— li'u»

ni'o «lu lo ni do virnu cu barda .i mi birti —sei la .oz. cu spusku— .i ro se nitcu be do cu ka lacri lo sevzi .i na zasti fa su'o jmive poi na'e terpa ca lo nu penmi lo ckape .i jetnu nu virnu kei fa lo nu farzu'e lo ckape ca lo nu terpa .i je lo tai kamvirnu zo'u: lo ni do ckaji cu banzu li'u»

ni'o «lu cumki fa lo nu go'i .i ku'i mi to'e ki'u nai terpa —sei la cinfo cu cusku— .i mi va'o lo nu na ku do dunda lo klesi be lo kamvirnu be'o poi gasnu lo nu tolmo'i lo du'u terpa li'u»

ni'o «lu .i'a .i mi ca lo bavlamdei cu dunda lo tai kamvirnu do —sei la .oz. cu spuda— li'u»

ni'o «lu lo mi risna zo'u: mo —sei la tinci mudypre cu retsku— li'u»

ni'o «lu .y ri zo'u: —sei la .oz. cu spusku— mi jinvi lo du'u do toldra lo ka djica tu'a lo risna .i ry tolgeigau so'e prenu .i ja'o do djuno .i do se zanfu'a lo nu do na se risna li'u»

ni'o «lu ju'o lo du'u ma kau se jinvi cu manri —sei la tinci mudypre cu cusku— .i mi zo'u: mi va'o lo nu do dunda lo risna mi cu ba jarfri ro li'i nalgei kei se cau lo nu pante li'u»

ni'o «lu .i'a —sei la .oz. cu ruble spuda— .i ko klama mi ca lo bavlamdei .i jai do ba cpacu lo risna .i mi pu ze'u lo nanca be li so'i cu sezmlugau lo ka te makfa .i se ki'u .e'a se'i mi ra'irgau la'e di'u lo cmalu ziljmina li'u»


ni'o «lu .i je —sei la .dorotis. cu cusku— ta'i ma mi xruti la .kanzas. li'u»

ni'o «lu .ai mi pensi la'e di'u —sei lo cmalu nanmu cu spusku— .i ko curmi lo nu mi pensi lo tcini ze'a lo djedi be li re ji'i ci .i se va'o bo mi troci lo ka facki fi lo tadji be lo nu bevri do lo ragve be lo cantu'a .i ze'a lo tersei do'o se fartra .ai tai tu'a lo vitke be mi .i je ze'a lo nu do'o xabju la noldi'u kei lo mi prenu cu selfu do'o gi'e tinbe ro lo se djica be do'o .i pa po'o da zo'u: mi cpedu lo ka da se pleji fo lo nu mi sidju .i do bilga lo ka na jungau su'o da lo se mipri be mi be'o noi du'u mi ticpre li'u»

ni'o lo ro mei cu tugni fi lo du'u ba jungau no da lo se cilre kei gi'e xruti lo vo'a kumfa fau lo nu zancni .i la .dorotis. ku ji'a sai cu pacna fi li pi za'u no fe lo nu la'e «lu banli je xlatce ticpre li'u» noi dy tercme .obu ke'a cu facki fi lo tadji be lo nu xrugau benji dy la .kanzas. .i je da'i dy va'o lo nu .obu ja'a co'e cu bredi lo ka fraxu .obu ro da

 






lo se mànci te màkfa pe la .oz.
ni'o ni'o pa xa mo'o
lo makfa larcu pe la banli ticpre

ni'o ca lo bavla'i cerni la cpitepygau cu cusku fi lo ri pendo

ni'o «lu ui sai mi klama la .oz. te zu'e lo nu ro mai cpacu lo mi besna .i mi ca lo nu xruti cu dunli lo drata remna li'u»

ni'o «lu mi pu ro roi nelci do poi do du —sei la .dorotis. cu sampu cusku— li'u»

ni'o «lu do xendo fi lo nu nelci lo cpitepygau —sei cy spusku— .i ku'i ju'o do ba jinvi lo xagmau mi ca lo nu do zgana lo xautce se pensi poi lo mi cnino besna cu cupra li'u» .i ba bo cusku zo co'o se pi'o lo gleki voksa gi'e klama lo nolstizu kumfa noi bu'u ke'a darxi lo vrogai

ni'o «lu ko nerkla —sei la .oz. cu cusku— li'u»

ni'o la cpitepygau cu nerkla gi'e tolcri lo cmalu nanmu poi zutse ne'a lo canko fau lo nu condi pensi

ni'o «lu mi klama te zu'e tu'a lo mi besna —sei la cpitepygau cu te notci be fau lo nu xanka milxe— li'u»

ni'o «lu je'e .i'a .i ko zutse lo va stizu pe'u do'u —sei la .oz. cu spusku— .i ko mi fraxu lo nu mi vimcu lo do stedu .i ku'i mi nitcu la'e di'u lo nu setca lo do besna lo drani stuzi li'u»

ni'o «lu na sai nabmi —sei la cpitepygau cu cusku— .i do ja'a sai jai se curmi fai lo ka vimcu lo mi stedu .i va'o bo sy cu xagmau ca lo nu do ba'o jongau sy li'u»

ni'o ja'e bo lo te makfa cu tolyla'a lo stedu gi'e vimcu lo sudysrasu .i je ba bo nerkla lo trixe kumfa gi'e lebna lo gurni klani noi .obu ke'a jmina lo mixre be lo so'i pijne joi lo so'i jesni .i ca lo nu ba'o desygau lo mixre zo'u .obu tisygau lo galpau be lo stedu be la cpitepygau lo mixre gi'e mulno setca lo sudysrasu lo ve vimcu canlu te zu'e lo nu lo besna cu zvasto

ni'o ca lo nu ba'o lasna lo stedu be la cpitepygau lo xadni cu cusku fi cy fe «lu co'a lo cabna do banli remna .i ki'u bo mi ba'o dunda lo cnino je barda besna li'u»

ni'o la cpitepygau ge gleki gi jgira vau lo nu lo brarai se djica cu binxo lo fatci .i je fau lo nu ba'o kirsku zei carmi la .oz. cu xruti lo vo'a pendo

ni'o la .dorotis. cu kucli catlu cy .i lo stedu be cy cu mutce lo ka se punli lo besna bu'u lo galpau

ni'o «lu do ma cinmo —sei dy te preti— li'u»

ni'o «lu mi cinmo lo ka prije je'u —sei cy stace spusku— .i mi ca lo nu se slabu lo mi besna cu djuno ro da li'u»

ni'o «lu ki'u ma lo va jesni joi pijne cu bartu pagre fo lo do stedu —sei la tinci mudypre cu retsku— li'u»

ni'o «lu la'e di'u je'urja'o lo du'u ta kinli se menli —sei la cinfo cu te notci— li'u»

ni'o «lu .ei mi klama la .oz. te zu'e lo nu te dunda lo mi risna —sei la mudypre cu cusku— li'u» .i my klama lo nolstizu kumfa gi'e darxi lo vrogai

ni'o «lu ko nerkla —sei la .oz. cu cusku— li'u» .i je la mudypre cu nerkla gi'e cusku «lu mi klama te zu'e tu'a lo mi risna li'u»

ni'o «lu xamgu —sei lo cmalu nanmu cu spusku— .i ku'i sarcu fa lo nu mi katna lo do cutne kei lo nu mi ka'e setca punji lo do risna lo drani .i .a'o do na ba cortu li'u»

ni'o «lu .o'u —sei la mudypre cu cusku— .i na ba ganse da li'u»

ni'o la .oz. cu bevri lo re mei be lo tinzba jinci gi'e sraku lo zunle pagbu be lo cutne be la tinci mudypre ja'e lo cmalu ke kurfa kunti .i ba bo fau lo nu klama lo tanxe be lo dacru cu tolse'a lo melbi risna noi mulno marji lo silka gi'e zilse'a lo komka'a pulce

ni'o «lu xu na melbi —sei .obu retsku— li'u»

ni'o «lu ja'a go'i —sei la mudypre noi mutce lo ka se pluka cu spusku— .i ku'i xu xendo risna li'u»

ni'o «lu ja'a sai go'i —sei .obu spuda— li'u» .i .obu setca lo risna lo cutne be la mudypre gi'e selbasygau lo tinci kurfa fau lo nu cnici ranjinjongau ry lo jai bu'u sraku

ni'o «lu uo —sei .obu cusku— .i do ca se risna da poi ro prenu cu jgira da'i tu'a ke'a .i mi xenru lo nu pu nitcu lo ka punji lo kurfa lo do cutne .i ku'i je'u pu sarcu li'u»

ni'o «lu na nabmi fa tu'a lo kurfa —sei la mudypre cu gleki basnysku— .i mi mutce lo ka ckire do kei gi'e no roi tolmo'i lo du'u ma kau ni do xendo li'u»

ni'o «lu ko na tavla fi la'e di'u —sei la .oz. cu spusku— li'u»

ni'o ba bo la tinci mudypre cu xruti lo ri pendo noi zandapsku ty my

ni'o la cinfo cu klama lo nolstizu kumfa gi'e darxi lo vrogai

ni'o «lu ko nerkla —sei la .oz. cu cusku— li'u»

ni'o «lu mi klama te zu'e tu'a lo mi ka virnu —sei la cinfo fau lo nu nerkla lo kumfa cu noisku— li'u»

ni'o «lu je'e do'u —sei lo cmalu nanmu cu spusku— .i mi ba lebna klama se va'u do li'u»


ni'o ny klama lo kajnyta'e gi'e lebna fi lo galtu kajna lo kurfa ke crino botpi noi ny seltisygau lo se vasru be ke'a lo crino joi solji palta noi melbi ke sraku morna .i la te makfa fau lo nu punji py lo crane be la tolvirnu cinfo ku noi sumne py tai lo nu na nelci cu cusku:

ni'o «lu ko pinxe li'u»

ni'o «lu ti mo —sei la cinfo cu retsku— li'u»

ni'o «lu ti zo'u: —sei .obu spusku— va'o lo nu nenri do cu ka virnu .i li'a do djuno lo du'u lo kamvirnu cu ro roi nenri lo prenu .i ja'o .ei ti na'e zilski lo ka kamvirnu kei co'u lo nu do ba'o tunlo vo'a .i se ki'u bo mi stidi lo ka pinxe se rai lo kamsutra li'u»

ni'o la cinfo cu denpa ze'i no ziljmina gi'e pinxe co'u lo nu lo palta cu kunti

ni'o «lu do ma cinmo ca ku —sei la .oz. cu retsku— li'u»

ni'o «lu lo ka culno lo ka virnu —sei la cinfo cu spuda— li'u» .i cy gleki xruti lo ri pendo te zu'e lo nu jungau py fo lo ri zanfu'a

ni'o la .oz. fau lo nu no drata cu zvati cu cisma co pensi lo nu snada lo ka dunda la cpitepygau .e la tinci mudypre .e la cinfo je'a lo se djica se jinvi .i «lu pau nai ta'i ma mi sisti lo ka ticpre kei—sei .obu cusku— va'o lo nu ro lo prenu cu djica lo nu mi gasnu lo fasnu poi ro da djuno lo du'u ke'a na cumki .i pu frili fa lo ka gasnu lo nu la cpitepygau .e la cinfo .e la mudypre cu gleki .i ki'u bo ro lo ci mei pu se xanri lo nu mi kakne ro da .i ku'i lo ka xrugau la .dorotis. la .kanzas. cu ba zmadu fi lo ka nandu .i je mi birti lo du'u mi na djuno lo du'u ta'i ma kau ka'e gasnu li'u»






lo se mànci te màkfa pe la .oz.
ni'o ni'o pa ze mo'o
lo nu lo vartisyboi cu se galze'acru

ni'o ze'a lo djedi be li ci la .dorotis. cu se jungau fi no da la .oz .i djedi co se badri lo cmalu nixli .i ku'i ro lo ri pendo cu mutce lo ka gleki gi'e se mansa .i la cpitepygau cu jungau lo drata lo du'u lo melbi se pensi cu zvati lo stedu be cy .i ku'i cy jungau no da lo du'u ma kau me lo se pensi .i ki'u bo djuno lo du'u no da po'u na'e bo cy ka'e jimpe py .i la tinci mudypre ca lo nu ru'u cadzu cu ganse lo nu lo ri risna cu ru'u muvdu ne'i lo cutne .i je my cu jungau la .dorotis. lo du'u my pu facki lo du'u ry xendo je toljursa zmadu lo risna poi my ke'a se risna ca lo nu my. marji lo rectu .i la cinfo cu xusra lo du'u cy terpa no da pe lo terdi kei gi'e da'i gleki lo nu penmi lo jenmi .a lo pa re mei be lo tsali .kalidas.

ni'o tai ku ro cmima be lo cmalu gunma be'o po'u na'e bo la .dorotis. ku noi mutce lo ka djica lo nu xruti la .kanzas. cu se mansa

ni'o ca lo vo moi be lo djedi ja'e lo nu la .dorotis. cu banli gleki kei la .oz. cu cpedu lo ka dy klama .i je ca lo nu dy. nerkla la nolstizu kumfa kei .obu pluka rinsa dy

ni'o «lu ko tsebi'o doi dirba .i pe'i mi facki lo du'u ma kau tadji lo nu xrugau benji fi lo vi gugde

ni'o «lu pau se ka'a la .kanzas. —sei dy djicni retsku— li'u»

ni'o «lu .y mi na birti tu'a la .kanzas. —sei la .oz. cu cusku— .i ki'u bo mi na te sidbo fi lo cmarai fe lo du'u ky fa'a ma kau crane .i ku'i lo pa moi be lo do se bilga cu nu pagre lo cantu'a .i ba ku .ei frili fa lo ka zvafa'i lo do zdani li'u»

ni'o «lu ta'i ma mi pagre lo cantu'a —sei dy te preti— li'u»

ni'o «lu mi do ba jungau lo du'u mi ma kau jinvi —sei lo cmalu nanmu cu cusku— .i sa'u nai ca lo nu mi klama lo vi gugde kei mi klama fu lo vartisyboi .i do ji'a pu klama pa'o lo vacri fau lo nu se bevri lo vilcarbi'e .i ja'o mi krici lo du'u xagrai tadji lo nu zvabi'o lo ragve be lo kutytu'a kei fa lo nu pagre lo vacri .i lo ka zbasu lo vilcarbi'e cu dukse lo ka nandu kei lo ka cmima lo mi se vlipa .i ku'i mi pu pensi lo tcini gi'e krici lo du'u mi kakne lo ka zbasu lo vartisyboi li'u»

ni'o «lu ta'i ma —sei la .dorotis. cu retsku— li'u»

ni'o «lu lo vartisyboi —sei la .oz. cu cusku— cu marji lo silka noi se gapci lo snipa te zu'e lo nu lo gacri na ka'e barbi'o .i bu'u la mi noldi'u so'i silka cu zvati .i se ki'u bo ba na nabmi fa lo nu zbasu lo vartisyboi .i ku'i bu'u pi ro lo vi gugde cu zvati fa no gapci pe te pi'o lo nu fulta gasnu li'u»

ni'o «lu ga nai na fulta —sei la .dorotis. cu piksku— gi na plixau ma'a li'u»

ni'o «lu jetnu —sei la .oz. cu spusku— .i ku'i tadji fa lo drata noi nu clugau vy lo glare vacri .i lo glare vacri na xagdu'i lo gapci .i ki'u bo va'o lo nu lo vacri cu lenku binxo kei lo vartisyboi cu zvabi'o lo cantu'a ja'e lo nu mi'o farcri li'u»

ni'o «lu ue zo mi'o —sei lo nixli cu krixa— .i xu do klakansa mi li'u»

ni'o «lu go'i li'a —sei la .oz. cu spusku— .i mi tatpi lo nu mi tai ticpre .i va'o lo nu da'i mi barkla lo vi noldi'u lo mi se gugde cu ba zi facki lo du'u mi na te makfa kei gi'e ba bo fengu mi lo ka tcica gy .i se ki'u bo mi bilga lo ka stali lo nenri be lo vi kumfa ze'a pi ro lo donri .i je binxo lo ka se tatpi .i da'i mi zmanei lo ka klama la .kanzas. fi'o se kansa do gi'e za'u re'u zvati lo tsirkuso li'u»

ni'o «lu da'i mi gleki lo nu do mi kansa —sei la .dorotis. cu cusku— li'u»

ni'o «lu ki'e do'u —sei .obu spusku— .i ca ku va'o lo nu do ba sidju mi lo ka fenso lo silka zo'u: mi'o ba co'a gunka tu'a lo do vartisyboi li'u»

ni'o ja'e bo la .dorotis. cu lebna lo jesni .e lo cilta .i je du'i lo nu la .oz. cu sutra katna lo dasri be lo silka lo drani tarmi kei lo nixli cu cnici fenso dy .i pa mai lo dasri be lo carmi crino silka .i re mai lo dasri be lo manku crino .i ci mai lo dasri be lo ri'ojme crino .i ki'u bo la .oz. cu nelci lo nu zbasu lo vartisyboi poi skari lo vrici .i ditcu fa lo djedi be li ci lo nu fenso ro lo dasri .i ku'i ca lo nu mulno kei lo barda dakli be fi lo crino silka be'o poi mitre li za'u re no

ni'o ba bo la .oz. cu punji fi lo nenri sefta fe lo cinla gacri co snipa te zu'e lo nu no vacri cu ka'e pagre kei gi'e ba bo noisku lo se du'u lo vartisyboi cu bredi

ni'o «lu ku'i sarcu fa tu'a lo lanka poi ka'e se marce ke'a —sei .obu cusku— li'u» .i ja'e bo .obu minde lo sonci pe lo crino zbikre lo ka jbibei lo barda ke taxfu lanka noi .obu ke'a lasna lo loldi be lo vartisyboi lo so'i skori

ni'o ca lo nu lo ro mei cu bredi kei la .oz. cu benji fi lo ri prenu fe lo notci noi se du'u .obu ba vitke lo banli ke bruna te makfa poi xabju lo dilnu .i lo nuzba cu sutra preja pi ro lo tcadu .i je ro da klama te zu'e lo nu viska lo se manci jvinu

ni'o la .oz. cu minde fi lo nu lo vartisyboi cu se barbei fi lo crane be la noldi'u .i je lo prenu cu kucli mutce catlu vy .i la tinci mudypre pu katna cupra lo barda derxi be lo mudri .i je ca ku ty my zbasu lo fagri my .i je bo la .oz. cu jgari lo dziraipau be lo vartisyboi fau lo nu gapru lo fagri kei te zu'e lo nu lo glare gapci poi ra'i galze'a cu se kavbu fi lo silka dakli .i lo vartisyboi cu zenba lo ka plana kei gi'e galze'a fa'a lo vacri kei co'u lo nu ro mai lo lanka ku po'o cpana lo loldi li'u»

ni'o ba bo la .oz. cu nerbi'o lo lanka gi'e cusku fi lo ro prenu se pi'o lo cladu voksa:

ni'o «lu mi ca cliva te zu'e lo nu vitke .i ca lo nu mi nalzva kei la cpitepygau cu turni do .i mi do minde lo ka tinbe fi cy du'i lo nu do no'a fi mi li'u»

ni'o ca la'e di'u lo vartisyboi cu carmi lacpu lo skori poi te jorne vy lo loldi .i ri'a bo lo vacri poi nenci cu glare .i je la'e di'u rinka lo nu lo vartisyboi cu mutce lo ka mleca lo bartu vacri lo ka linto kei ja'e lo nu carmi lacpu te zu'e lo nu galze'a fa'a lo tsani

ni'o «lu ko ti klama doi .dorotis. —sei la te makfa cu krixa— .i ko sutra .i se va'o nai bo lo vartisyboi cu to'o vofli li'u»

ni'o «lu mi na kakne lo ka tolcri la .totos. su'o da —sei la .dorotis. ku noi na djica lo nu cliva lo ri cmalu gerku cu spuda— li'u» .i la .totos. pu bajra se ka'a lo midju be lo remgunma te zu'e lo nu gercmo fa'a lo citno mlatu .i je ro mai la .dorotis. cu tolcri ty .i dy lafti ty gi'e bajra fa'a lo vartisyboi

ni'o dy zvati ki vy vi lo nu so'u roi stapa .i je la .oz. cu tengau lo xance te zu'e lo nu sidju dy lo ka nerkla lo lanka .i ca bo —sei .krak.— lo skori cu porpi .i je lo vartisyboi cu galze'a fa'a lo vacri se cau la .dorotis.

ni'o «lu ko xruti —sei dy krixa— .i mi ji'a djica lo nu mi klama li'u»

ni'o «lu mi na kakne lo ka xruti doi dirba —sei la .oz. ne'i lo lanka cu lausku— .i co'o li'u»

ni'o «lu co'o —sei ro da krixa— li'u» .i ro lo kanla cu se farna lo gapru poi nu la te makfa cu se marce lo lanka fau lo nu zenba ca ro mokca lo ka galtu lo tsani

ni'o la'e di'u nu lo ro da ro re'u viska la .oz. ku no'u la se manci te makfa .i ku'i cumki fa lo nu ri snura tolyli'a la .oma'as. gi'e nau zvati ri .i ku'i lo prenu cu prami morji fi la .oz. gi'e simxu lo ka cusku:

ni'o «lu la .oz. pu ro roi pendo mi'o .i ri ca lo nu zvati cu zbasu se va'u ma'a lo vi melbi pe la ri'ojme tcadu .i je nau ku .obu nalzva gi'e pu gasnu lo nu la prije cpitepygau cu kansa ma'a li'u»

ni'o ku'i ze'a lo djedi be li so'i lo ro da cu badri lo nu cirko la se manci te makfa kei gi'e na kufra

 






lo se mànci te màkfa pe la .oz.
ni'o ni'o pa bi mo'o
to'o mo'i ne'u

ni'o la .dorotis. cu badri lo nu fanmo fa lo nu dy cu pacna lo nu xruti la .kanzas .i ku'i dy ca lo nu pensi ro la'e di'u cu gleki lo nu pu na galze'a ne'i lo vartisyboi .i je ji'a dy badri lo nu ba'o cirko la .oz .i je si'a lo kansa be dy cu go'i

ni'o la tinci mudypre cu jbibi'o dy gi'e cusku:

ni'o «lu je'u mi ga nai fliba lo nu badri tu'a lo nanmu poi dunda lo mi melbi risna mi gi maltolckire .i .ai mi ze'i klaku fi lo nu la .oz. cu canci .i .e'o do xendo vimcu lo mi se klaku te zu'e lo nu mi na furtirse binxo li'u»

ni'o «lu .au —sei dy spuda— li'u» .i ba zi bevri lo bukpu .i ba bo la tinci mudypre cu klaku ze'a lo mentu be li so'o .i je la .dorotis. cu ralci catlu lo se klaku gi'e vimcu ky se pi'o lo bupku .i my ca lo nu ba'o mo'u co'e cu xendo kirsku dy gi'e mulno sabji lo ctile lo sevzi se pi'o lo jmeseljai ctile bo lante te zu'e lo nu rivbi lo nabmi

ni'o la cpitepygau ca turni la ri'ojme tcadu .i je lo prenu to'e ki'u nai lo nu cy na te makfa cu sinma cy .i «lu ki'u bo —sei py cusku— bu'u lo mulno munje cu zasti fa no drata tcadu poi se turni lo terse'a nanmu li'u» .i je py du'o py cu drani jinvi

ni'o ca lo cerni be ba lo nu lo vartisyboi joi la .oz. cu galze'a zo'u lo vo litru cu pensi'u la nolstizu kumfa gi'e casnu lo cuntu .i la cpitepygau cu zutse lo barda nolstizu .i je lo drata cu sinma sanli ca'u cy

ni'o «lu mi'o na mutce lo ka se malfu'a —sei lo cnino turni cu cusku— .i ki'u bo lo vi badydi'u .e la ri'ojme tcadu mi'o se ponse .i je mi'o zifre lo nu zukte lo se djica .i mi ca lo nu morji lo du'u mi pu za lo cmalu cu gapru lo grana bu'u lo zmufoi pe lo te cange .e lo du'u mi ca turni lo vi melbi tcadu cu mutce lo ka se mansa lo me mi moi li'u»

ni'o «lu mi ji'a —sei la tinci mudypre cu cusku— cu se pluka zei mutce tu'a lo mi cnino risna .i je'u ri po'o je no drata pe lo mulno munje pu se djica mi li'u»

ni'o «lu mi zo'u: gleki lo nu djuno lo du'u virnu dunli ro lo danlu poi pu jmive ku'o gi jo nai virnu zmadu —sei la cinfo cu cumla cusku— li'u»

ni'o «lu mi'o va'o lo nu la .dorotis. cu da'i gleki lo nu xabju la ri'ojme tcadu —sei cpitepygau cu di'a co'e— cu kansi'u lo nu gleki li'u»

ni'o «lu ku'i mi na djica lo nu vi xabju —sei la .dorotis. cu krixa— .i mi djica lo nu klama la .kanzas. gi'e xabju fi'o kansa la fetfamti .em. .e la nakfamti .xenris. li'u»

ni'o «lu va'o ku ma ka'e se zukte —sei la mudypre cu facki zukte retsku— li'u»

ni'o la cpitepygau cu jdice lo nu pensi .i je cy cu tai carmi pensi ja'e lo nu lo pijne .e lo jesni cu co'a barbi'o lo besna .i ro mai cy cusku

ni'o «lu mu'i ma na klacpe la selna'i smani gi'e cpedu lo ka bevri do ga'u lo kutytu'a li'u»

ni'o «lu ue mi no roi pensi la'e di'u —sei la .dorotis. cu gleki cusku— .i prane sidbo .i mi ba zi klama gi'e cpacu la solji mapku li'u»

ni'o dy ca lo nu bevri my la nolstizu kumfa cu cusku lo makfa valsi .i je ba zi bo lo bende be la selna'i smani cu voikla pa'o lo kalri canko gi'e sanli ne'a dy

ni'o «lu do mi'a ca re re'u klacpe —sei la smani noltru fau lo nu krobi'o ca'u lo cmalu nixli cu cusku— .i do ma djica li'u»

ni'o «lu mi djica lo nu do mi vofli bevri la .kanzas. —sei la .dorotis. cu cusku— li'u»

ni'o ku'i la smani noltru cu stedu sligau

ni'o «lu na cumki —sei cusku— .i mi'a ckini lo vi gugde ku po'o gi'e na ka'e cliva gy .i no roi zvati fa su'o la selna'i smani la .kanzas .i je ru'a ba no roi co'e .i ki'u bo sy boi ky na drazva .i da'i mi'a gleki lo nu sidju do ta'i ro lo mi'a selka'e .i ku'i mi'a na ka'e pagre lo kutytu'a .i co'o li'u»

ni'o .e la smani noltru fau lo nu za'u re'u krobi'o cu tolplo lo nalci gi'e to'o voikla pa'o lo canko fau lo nu pi ro lo bende cu jersi

ni'o ni'o la .dorotis. cu bredi lo nu selpa'aspocni klaku .i «lu mi ba'o xaksu lo makfa pe solji mapku —sei dy cusku— .i ki'u bo la selna'i smani mi na ka'e sidju li'u»

ni'o «lu ju'o uu xlali mutce —sei la mudypre ku noi ranti se risna cu cusku— li'u»

ni'o la cpitepygau cu za'u re'u pensi .i je lo ri stedu cu binxo lo tai se punli ja'e lo nu la .dorotis. cu terpa lo nu sy cu spoja

ni'o «lu .e'u mi'o klacpe lo sonci pe lo crino gaskre —sei cy cusku— gi'e stidi cpedu li'u»

ni'o ja'e bo lo sonci cu se klacpe gi'e toldarsi nerkla la nolstizu kumfa ki'u lo nu sy ze'a lo nu la .oz. cu jmive cu no roi jai se curmi fai lo ka klama lo darmau be lo vorme

ni'o «lu lo vi cmalu nixli —sei la cpitepygau fi lo sonci cu cusku— cu djica lo nu pagre lo kutytu'a .i ny ta'i ma ka'e co'e li'u»

ni'o «lu mi na ka'e djuno —sei lo sonci cu cusku— .i ki'u bo no da su'o roi pagre lo kutytu'a .i va'o bo da'i na ku la .oz. cu go'i li'u»

«lu xu no da mi'a ka'e sidju —sei la .dorotis. cu junri te preti— li'u»

ni'o «lu ju'o cu'i la .glindas. cu go'i —sei lo sonci cu stidi— li'u»

ni'o «lu la .glindas. cu me ma —sei la cpitepygau cu retsku— li'u»

ni'o la termafyfe'i pe la snanu .i gy vlirai lo ro termafyfe'i gi'e turni la vonpre .i ji'a lo badydi'u pe gy cu se stuzi lo korbi be lo kutytu'a .i se ki'u bo ju'o cu'i gy djuno lo du'u ma kau tadji lo nu pagre ky li'u»

ni'o «lu la .glindas. cu vrude termafyfe'i vau ie pei —sei lo verba cu retsku— li'u»

ni'o «lu la vonpre cu jinvi lo du'u xamgu —sei lo sonci cu cusku— .i je gy cu xendo ro da .i ti'e la .glindas. cu melbi ninmu gi'e snada lo ka citno stodi kei to'e ri'a nai lo nanca be li so'i be'o poi nu gy jmive li'u»

ni'o «lu ta'i ma mi ka'e klama lo badydi'u pe gy —sei la .dorotis. cu retsku— li'u»

ni'o lo dargu cu sirji fi la snanu —sei lo sonci cu spuda— .i ku'i ti'e dy tolcau lo so'i ckape be lo litru .i zvati lo ricfoi fa lo cilce danlu .e lo lanzu be lo cizra prenu poi na djica lo nu lo fange cu pagre lo ra gugde .i ki'u ku no la vonpre cu su'o roi klama la ri'ojme tcadu li'u»

ni'o lo sonci ba cliva lo drata .i je la cpitepygau cu cusku:

ni'o «lu si'au to'e ki'u nai lo ckape lo xagrai poi la .dorotis. ke'a ka'e zukte cu nu litru klama la snanu gugde gi'e cpedu fi la .glindas. fe lo nu sidju dy .i ki'u bo li'a la .dorotis. va'o lo nu stali ti cu no roi xruti la .kanzas. li'u»

ni'o «lu ju'o do pu za'u re'u pensi —sei la tinci mudypre cu te notci— li'u»

ni'o «lu go'i —sei la cpitepygau cu cusku— li'u»

ni'o «lu .ai mi klakansa la .dorotis. —sei la cinfo cu xusra— .i mu'i bo mi tatpi tu'a lo do tcadu gi'e djicai tu'a lo ricfoi .e lo numra .i je'u mi cilce danlu du'o do .i ji'a la .dorotis. cu nitcu da poi bandu dy li'u»

ni'o «lu jetnu —sei la mudypre cu tugni— .i lo mi ka'amru cu ju'o cu'i sidju dy .i se ki'u bo mi ji'a ba kansa dy lo ka klama la gugde be la snanu li'u»

ni'o «lu .ei ca ma mi'o tolsti —sei la cpitepygau cu retsku— li'u»

ni'o «lu ue xu do klama —sei lo drata cu retsku be fau lo nu ri se spaji— li'u»

ni'o «lu ju'o .i ga nai lo nu da'i la .dorotis. pu na co'e gi lo nu mi se besna cu ze'e ba na fasnu .i dy mi pu lafyvi'u lo grana pe lo gurni foldi gi'e gidva mi la ri'ojme tcadu .i ja'o ro lo mi zanfu'a cu se gasnu dy .i je .ai mi co'u lo nu dy cu co'a xruti la .kanzas. cu se va'u no roi cliva dy li'u»

ni'o «lu ki'e do —sei la .dorotis. cu ckire cusku— .i ro do mutce lo ka xendo mi .i ku'i .au mi tolsti ca lo cumki traji be lo ka clira li'u»

ni'o «lu .ei mi'o klama co'a lo bavlamdei cerni —sei la cpitepygau cu spuda— .i .e'e mi'o ca brebi'o .i ki'u bo ba clani nunli'u li'u»

 






lo se mànci te màkfa pe la .oz.
ni'o ni'o pa so mo'o
se gunta la damba tricu

ni'o ca lo bavla'i cerni la .dorotis. cu tolrinsa cinba lo melbi ke crino nixli .i je lo ro da jo'u lo sonci pe lo crino zbikre cu desysimgau lo xance noi pu klakansa fe'e co'u lo balvrogai .i ca lo nu la badypre be la vrogai cu viska lo gunma cu mutce lo ka se spaji lo nu ri ka'e cliva lo melbi tcadu te zu'e lo nu za'u re'u raktu lifri .i ku'i by ba zi toltelgau lo vistci noi by ke'a xrugau setca lo crino tanxe ku'o gi'e cusku lo so'i xendo valsi pe te zu'e tu'a lo nunli'u

ni'o «lu do mi'a ca turni —sei by fi la cpitepygau cu cusku— .i se ki'u bo do nitcu lo nu xruti mi'a se rai lo kamsutra li'u»

ni'o «lu .ai mi ba xruti va'o lo nu kakne —sei la cpitepygau cu spuda— .i ku'i .ei pa mai mi sidju la .dorotis. lo nu xruti lo zdani li'u»

ni'o la .dorotis. ca lo nu ro re'u tolrinsa lo xendo badypre cu cusku:

ni'o «lu mi pu se xendo mutce bu'u lo do kukte tcadu .i je ro prenu mi pu xendo .i mi na ka'e cusku lo se du'u ma kau ni mi do ckire li'u»

ni'o «lu ko na troci doi dirba —sei by spusku— .i da'i mi'a gleki lo nu do mi'a stali .i ku'i va'o lo nu do djica lo nu xruti la .kanzas. kei mi pacna lo nu do snada li'u» .i ba bo by cu kargau lo bravro pe lo bartu bitmu .i je lo bende cu cadzu pagre gi'e co'a litru

ni'o lo solri cu carmi te gusni ca lo nu lo mi'a pendo cu selfargau lo ri flira la gugde pe la snanu .i ro boi py mutce lo ka gleki gi'e pa'acni gi'e kansi'u lo ka cmila kei gi'e tavysi'u .i la .dorotis. cu za'u re'u mulno lo ka pacna lo nu xruti lo zdani .i je la cpitepygau .e la tinci mudypre cu gleki lo ka plixau dy .i la cinfo zo'u: cy sumne lo vifne vacri se kai lo ka se kukte kei gi'e muvgau lo rebla lo pa mlana lo drata ri'a lo nu mulno gleki lo nu di'a zvati lo nurma .i ca bo la .totos. cu bajra ru'u lo drata gi'e jersi lo ctetoldi .e lo todma'u fau lo nu ru'i gleki gercmo

ni'o «lu lo tcadu nunji'e mi na sai mapti —sei la cinfo fau lo nu lo ro da cu cadzu sutra cu te notci— .i mi pu cirko lo barda rectu bo klani co'a lo nu mi xabju ty .i je nau ku mi djica lo ka jarco fi lo drata danlu fe lo ni mi ba'o virnu zenba li'u»

ni'o ca ku lo litru cu carna gi'e ro re'u catlu la ri'ojme tcadu .i viska fe po'o lo gunma be lo slanydi'u be ti'a lo crino bitmu be'o be'o .e lo darno galmau be lo ro da be'o po'u lo slanydi'u jipno .e lo boldi'u vu'o pe la noldi'u pe la .oz.

ni'o «lu ja'o la .oz. pu na tai xlali te makfa —sei la tinci mudypre fau lo nu ganse lo nu lo ri rinsa ne'i lo cutne cu ru'u muvdu cu cusku— li'u»

ni'o «lu .obu pu djuno lo du'u ta'i ma kau dunda lo besna mi .i je ji'a xamgu mutce besna —sei la cpitepygau cu cusku— li'u»

ni'o «lu la .oz. va'o lo nu da'i pu pinxe pi su'o lo mintu kamvirnu poi pu dunda fi mi —sei la cinfo cu jmina cusku— cu virnu mutce nanmu li'u»

ni'o la .dorotis. cu cusku no da .i la .oz. pu na gasnu lo ri se nupre be fi dy .i ku'i .obu pu troci se kai lo xagrai selka'e .i se ki'u bo dy boi .obu fraxu .i cu'u .obu ji'a .obu xamgu nanmu gi'u xlali te makfa

ni'o lo nunli'u pe lo pa moi be lo djedi cu nu pagre lo crino foldi .e lo carmi xrula vu'o poi sruri la ri'ojme tcadu .i lo litru cu sipna fi'o se cpana lo srasu fau lo nu no drata be lo tarci cu gapru .i je ja'a xamgu surla

ni'o ca lo cerni ly litru co'u lo nu tolyli'a lo rotsu ricfoi .i na cumki fa lo nu srukla ry .i ki'u bo ry. simlu lo ka kuspe fa'a lo pritu je zo zunle lo jai ve'a ka'e viska .i ji'a ly na darsi lo ka cenba lo ka litru klama fa'a ma kau .i ki'u bo terpa lo ka farcri .i ja'e bo sisku lo stuzi poi da'i bu'u ke'a filrai fa lo ka nerkla lo ricfoi

ni'o la cpitepygau ku noi lidne cu ro moi tolcri lo barda tricu poi se jimca lo tai ganra preja ja'e lo nu lo bende ka'e cnita pagre .i se mu'i bo cy cu cadzu fa'a lo tricu .i ku'i ca sai lo nu binxo lo cnita be lo pa moi be lo jimca kei jy fa'a ni'a krobi'o gi'e skori simsa sruri cy .i je ba zi bo cy cu lafti se vimcu fi lo loldi gi'e se renro fa'a lo litru kansa

ni'o la'e di'u na crori'a la cpitepygau .i ku'i spaji cy .i je cy cu simlu lo ka laxselfi'u tcemli kei ca lo nu la .dorotis. cy lafti

ni'o «lu vi drata canlu fa lo jbini be lo tricu —sei la cinfo cu jungau— li'u»

ni'o «lu ko curmi lo nu mi troci pa moi —sei la cpitepygau cu cusku— .i mu'i bo mi na se crori'a lo nu se renro li'u» .i cy klama lo drata tricu ca lo nu tavla .i ku'i lo jimca cu ba zi sai jairbi'o cy gi'e renro cy lo pu se zvati

ni'o «lu cizra —sei la .dorotis. cu basna cusku— .i .ei mi'o ma zukte li'u»

ni'o «lu lo tricu cu simlu lo ka ba'o jdice lo ka damba mi'o gi'e tolcfagau lo mi'o nunli'u —sei la cinfo cu te notci— li'u»

ni'o «lu ia mi ji'a ba troci —sei la mudypre fau lo nu janco punji lo ri ka'amru cu cusku— li'u» .i my cadzu lo pa moi be lo tricu be'o noi ke'a pu tai jursa tarti tu'a la cpitepygau .i ca lo nu lo pa barda jimca cu cnita krobi'o te zu'e lo nu jgari my kei la mudypre cu vlile ke ka'amru darxi jy tai lo jalge be lo nu katna fi lo re spisa .i ba zi sai bo lo tricu cu co'a desygau lo ri ro jimca tai lo nu da'i cortu .i je la tinci mudypre cu snura pagre lo cnita be ty

ni'o «lu .e'e sai —sei my fa'a lo drata cu krixa— .i ko sutra li'u» .i lo ro da fa'a ca'u bajra gi'e pagre lo cnita be lo tricu fau lo nu se xrani fa no da po'u na'e la .totos. ku noi se kavbu lo cmalu jimca gi'e se desygau ja'e lo nu gerki'a .i ku'i la mudypre cu ba zi katna vimcu lo jimca gi'e zifygau lo cmalu gerku

ni'o lo drata tricu pe lo ricfoi na zukte fi lo nu zunti .i ja'e bo co'a jinvi lo du'u lo po'o pa moi be lo lijgri be lo tricu cu kakne lo ka krogau lo ri jimca kei .e lo du'u lo bi'u nai tricu cu pulji tu'a lo ricfoi gi'e pu se manci vlipa jai se gasnu te zu'e lo nu gasnu lo nu no fange cu nerkla lo ricfoi

ni'o lo vo litru cu frili cadzu pagre lo tricu co'u lo nu tolyli'a lo darno korbi be lo ricfoi .i ba ku sei spaji ly ca'u viska lo rajycla bitmu poi simlu lo ka marji lo blabi portcelanu .i xutla tai tu'a lo sefta be lo palta gi'e galmau lo ly. stedu

ni'o «lu .ei mi'o ma zukte ca ku —sei la .dorotis. cu retsku— li'u»

ni'o «lu mi ba zbasu lo rajyserti —sei la tinci mudypre cu cusku— .i ki'u bo ju'o mi'o nitcu lo nu ravyparkla lo bitmu li'u»

 







lo se mànci te màkfa pe la .oz.
ni'o ni'o re no mo'o
lo kukte ke portcelanu gugde

ni'o ze'a lo nu la mudypre cu zbasu lo rajyserti lo mudri poi my ke'a tolcri lo ricfoi kei la .dorotis. cu vreta gi'e sipna .i ki'u bo se ta'inri'a lo ve'u nu cadzu .i la cinfo ku ji'a djine tarmi vreta binxo te zu'e lo nu sipna .i je la .totos. cu re'o vreta

ni'o la cpitepygau cu catlu la mudypre ze'a lo nu my cu gunka kei gi'e cusku:

ni'o «lu mi na ka'e facki ga lo krinu be lo nu lo vi bitmu cu vi zvati gi lo du'u ma kau te zbasu li'u»

ni'o «lu ko surgau lo do besna gi'e na xanka tu'a lo bitmu —sei la mudypre cu spuda— .i ma'a ca lo nu ba'o cpare lampagre by cu djuno lo du'u ma kau zvati lo ragve li'u»

ni'o ba za lo temci lo rajyserti cu mulno .i simlu lo ka juxre .i ku'i la tinci mudypre cu birti lo du'u by tsali gi'e sarji lo sarcu .i la cpitepygau cu cikygau la .dorotis. .e la cinfo .e la .totos. gi'e jungau fi lo du'u lo rajyserti cu mulno .i la cpitepygau cu pa moi lo cpare gi'e ku'i tai juxre ja'e lo nu la .dorotis. cu nitcu lo nu jibni jersi gi'e fanta lo nu cy cu farlu fi .i cy ca lo nu lo ri stedu cu binxo lo gapru be lo bitmu cu cusku «lu ue sai li'u»

ni'o «lu ko di'a klama —sei la .dorotis. cu cladu cusku— li'u»

ni'o ja'e bo la cpitepygau cu di'a gapyparkla gi'e tsebi'o lo gapru be lo bitmu .i je la .dorotis. cu gapygau lo ri stedu by gi'e krixa «lu ue sai li'u» du'i lo nu la cpitepygau pu no'a

ni'o ba bo la .totos. cu klama lo gapru gi'e ba zi sai bo co'a gercmo .i ku'i la .dorotis. cu gasnu lo nu ty cu smaji

ni'o la cinfo cu selyli'e fi lo parkla .i je la tinci mudypre cu ro moi .i ku'i ro lo re mei cu krixa «lu ue sai li'u» co'a lo nu catlu ga'u lo bitmu .i lo ro da ca lo nu zutse tai lo linji lo gapru be lo bitmu cu catlu lo cnita gi'e viska lo cizra se jvinu

ni'o ca'u ku lo barda se kuspe lo gugde cu se loldi da poi xutla je camgu'i je blabi dunli lo loldi be lo barda palta .i zvati fa so'i zdani poi mulno marji lo portcelanu gi'e zilcintypu'i lo camgusrai .i lo bi'u nai zdani cu mutce lo ka cmalu .i lo brarai cu na galmau lo xadmidju be la .dorotis. .i zvati fa ji'a lo melbi je cmalu cagdaidi'u noi lo portcelanu bitmu cu sruri .i je ru'u sanli fa lo so'i bakni .e lo so'i xirma .e lo so'i xarju .e lo so'i jipci vu'o noi ro ke'a marji lo portcelanu

ni'o ku'i cizrai lo ro mei fa lo prenu poi xabju lo vi cizra gugde .i zvati fa lo ladycpani'u .e lo lankujni'u vu'o noi dasni lo carmi skari nimcreka zi'e noi lo pasyskaci be ke'a cu mulno se gacri lo solji banra ku'o .e lo noltruti'u noi dasni lo meltcerai pastu pe lo rijno .e lo solji .e lo zirpu ku'o .e lo lanku'i poi dasni lo tupcidni palku poi sraji se sriba'a lo xunblabi .e lo pelxu .e lo blanu zi'e poi lo solji batke cu zvati lo ke'a cutci ku'o .e lo noltruti'u poi lo jemna nolmapku cu cpana lo stedu be ke'a zi'e poi dasni lo .ermine pastu .e lo xulbu'u torluznaukosta ku'o .e lo xajmi xampre pe lo se rufygau pastu zi'e poi lo cukla xunre cu barna lo ke'a molmla zi'e pe lo clani je konju mapku .i ji'a cizrai lo ro mei fa lo du'u ro lo bi'u nai prenu cu mulno marji lo portcelanu gi'e tai cmalu ja'e lo nu lo brarai be py cu na galmau lo tupcidni be la .dorotis.

ni'o lo litru ca lo cfari cu se catlu no da po'u na'e bo lo pa cmalu ke zirpu portcelanu gerku noi se stedu lo barda mutce zi'e noi klama lo bitmu gi'e gercmo fa'a ly se pi'o lo cmalu voksa gi'e ba bo to'o bajra

ni'o «lu .ei mi'o ta'i ma zvabi'o lo loldi —sei la .dorotis. cu retsu— li'u»

ni'o lo rajyserti cu dukse lo ka tilju kei lo nu lafti .i se ki'u bo la cpitepygau ri falcru fo lo bitmu .i je lo drata te zu'e lo nu lo jdari loldi na crogau lo jamfu be dy cu fa'a ni'a plipe lo gapru be cy .i li'a dy mutce lo ka kurji lo nu na plipe lo flira ja'e lo nu lo pijne cu tunta lo jamfu .i ca lo nu lo ro mei cu snura zvati lo loldi cu lafti la cpitepygau ku noi lo xadni be ke'a cu ba'o binxo lo ka pintce ku'o gi'e toljusyga'i lo sudysrasu pe cy lo draseltai

ni'o «lu mi'o nitcu lo ka pagre lo vi cizra stuzi kei lo ka klama lo ragve —sei la .dorotis. cu cusku— .i ki'u bo nalpijyzu'e da'i fa mi'o lo ka klama fa'a su'o na'e bo lo snanu li'u»

ni'o tolsti lo ka cadzu pa'o lo gugde be lo portcelanu prenu .i je pa moi lo se penmi fa lo portcelanu ladycpani'u noi ca'o ladycpa lo portcelanu bakni .i ca lo nu lo litru cu jbibi'o kei lo bakni cu suksa fa lo nu lo bakni cu tikpa gi'e tikpa falgau lo stizu .e lo baktu .e ji'a sai lo ladycpani'u .i je lo ro da farlu lo portcelanu loldi fau lo nu cladu savru

ni'o la .dorotis. cu selpajytce viska lo nu lo bakni ba'o porpi lo pa tuple kei .e lo nu lo baktu cu vreta gi'e se spisa so'i da kei .e lo nu lo uu ladycpani'u zo'u: lo zunle bircidni cu se fenra

ni'o «lu .oi sai —sei lo ladycpani'u cu fengu krixa— .i ko catlu lo se gasnu be do .i lo pa tuple be lo mi bakni pu porpi .i je mi nitcu lo ka klagi'a by lo me lo cikrypre moi ja'e lo nu ty se nipyjongau .i mu'i ma do klama ti gi'e tepygau lo mi bakni li'u»

ni'o «lu mi xenru mutce —sei la .dorotis. cu spuda— .i .e'o ko mi'a fraxu li'u»

ni'o ku'i lo melbi ladycpani'u cu dukse lo ka fengu kei lo ka spusku su'o da .i ly se fanza lafti lo tuple gi'e to'o klagi'a lo bakni fau lo nu lo uu danlu cu nadydzu fi lo tuple ci mei .i ca lo nu cliva lo litru kei lo ladycpani'u cu so'i roi ze'i jursa catlu ga'u lo tuple fa'a lo juxre fange fau lo nu stogau lo fenra bircidni lo ka jibni lo xadmlapau

ni'o la .dorotis. cu mutce lo ka badri lo vi malfu'a

ni'o «lu .ei mi'o vi mutce lo ka jundi —sei lo xendo me la mudypre cu cusku— .i se va'o nai bo cumki fa lo nu mi'o xrani lo vi melbi ke cmalu prenu ja'e lo nu ri ba no roi di'a kanro li'u»

ni'o bu'u lo darmau milxe la .dorotis. cu penmi lo melbi traji dasni ke citno noltruti'u noi klasti ca lo nu viska lo fange kei gi'e co'a to'o bajra

ni'o la .dorotis. cu djica lo ka zenba lo ka viska lo noltruti'u .i se mu'i bo dy bajra jersi .i ku'i lo portcelanu noltruti'u cu krixa:

ni'o «lu ko mi na jersi .i ko mi na jersi li'u»

ni'o ny tai terpa ke cmalu se voksa ja'e lo nu la .dorotis. cu klasti gi'e cusku «lu ki'u ma na ku li'u»

ni'o «lu ki'u —sei la noltruti'u cu spusku be fau lo nu ri ji'a klasti bu'u lo snura darno— lo nu mi va'o lo nu bajra cu ka'e farlu ja'e lo nu mi porpi li'u»

ni'o «lu ku'i xu do na ka'e se cikre —sei lo nixli cu retsku— li'u»

ni'o «lu ja'a go'i .i ku'i da ba lo nu se cikre cu no roi dunli fi lo ka melbi —sei la noltruti'u cu spusku— li'u»

ni'o «lu la'a jetnu —sei la .dorotis. cu cusku— li'u»

ni'o «lu ta me la xampre ku noi pa mei me lo mi'a xampre —sei lo portcelanu ninmu cu di'a co'e— zi'e noi ro roi troci lo ka sanli fi lo stedu .i ra pu tai so'i roi porpi ja'e lo nu pa no no mokca be ra cu se cikre .e lo nu na sai melbi .i va ku ra ca klama .i ja'o do ka'e zgana li'u»

ni'o je'u lo xedgei ke cmalu xampre cu ca'o cadzu fa'a ku .i je la .dorotis. cu viska lo nu to'e ki'u nai tu'a lo xy. melbi taxfu co xunre je pelxu je crino xy mulno se gacri lo fenra poi se farna ro da zi'e noi jarco lo du'u so'i mokca be xy pu se cikre

ni'o la xampre cu setca lo ri xance lo ra daski .i je ba lo nu baljygau lo molmla gi'e tolclite sedysa'orgau fa'a lo drata cu cusku
«lu

 doi melbi melni'u
                .i do catlu ki'u
                   ma la xampre uu
.i do tinsa carmi
   gi'e sirji se tarmi
      tai lo nu pu citka lo grana ku

li'u»

ni'o «lu ko smaji —sei la noltruti'u cu cusku— .i xu do na djuno lo du'u ti fange gi'e .ei se fartra fi lo ka sinma li'u»

ni'o «lu —sei la xampre cu xusra— li'u» .i je xy ba zi sanli fi lo stedu

ni'o «lu ko na se fanza la xampre —sei la noltruti'u fi la .dorotis. cu cusku— .i lo ri stedu cu se fenra so'i da .i ja'e bo xy bebna li'u»

ni'o «lu mi na sai se fanza —sei la .dorotis. cu cusku— .i ku'i do tai melbi —sei dy di'a co'e— ja'e lo nu mi birti lo du'u da'i mi kakne lo ka dirba prami do .i je'a pei mi xruti bevri do la .kanzas. gi'e punji do lo fagzda kajna pe la fetfamti .em. .i mi ka'e bevri do fau lo nu do nenri lo mi lanka li'u»

ni'o «lu da'i la'e di'u se jalge lo nu mi mutce lo ka tolgleki —sei la portcelanu noltruti'u cu spusku— .i sa'u nai vi ku bu'u lo mi'a gugde mi'a jmive co gleki gi'e ka'e ge tavla gi muvdu vau tai lo se nelci be mi'a .i ku'i ro da poi me mi'a zo'u: ca ro nu da se bevri fi lo darno kei lo da cidni cu tinsa binxo ja'e lo nu ro pa mei lo se kakne be da fa lo ka sirji sanli gi jo'u melbi se jvinu .i li'a lo nu mi'a ri ckaji cu ro pa mei lo jai se kanpe be fai lo ka mi'a zukte ca lo nu mi'a cpana lo fagzda kajna fa'u lo kajnyvroni'e fa'u lo xa'urku'a jubme .i ku'i lo mi'a nunji'e be bu'u lo vi gugde be mi'a cu mutce lo ka pukmau

ni'o «lu da'i mi va'o ji'a sai lo nu mi zildu'a lo mulno munje cu na zukte fi lo nu do tolgleki —sei la .dorotis.— .i se ki'u bo mi ba cusku zo co'o li'u»

ni'o «lu co'o —sei la noltruti'u cu spuda— li'u»

ni'o lo litru cu jundi cadzu pa'o lo portcelanu gugde .i lo cmalu danlu je ro lo prenu cu toljmaji lo ly. ve klama fau lo nu terpa lo nu lo fange cu popygau vo'a .i je ba za lo cacra be li ji'i pa lo litru cu tolyli'a lo drata fanmo gi'e tolyli'a lo drata portcelanu bitmu

ni'o by mleca ku'i lo pa moi lo ka galtu .i je ta'i lo nu sanli lo trixe be la cinfo kei lo ro da snada lo ka juxre klama lo galraipau .i ba bo la cinfo cu jajgau lo ri tuple gi'e plipe lo gapru be lo bitmu .i ku'i ca sai lo nu plipe kei lo rebla be cy cu catke lo portcelanu malsi ja'e lo nu porpi lo so'i spisa

ni'o «lu ui nai —sei la .dorotis. cu cusku— .i ku'i je'u pe'i zanfu'a mi'o fa lo nu mi'a xrani lo vi cmalu prenu no drata be lo ka popygau pa bakni tuple je pa malsi .i ro boi py tai filpo'i li'u»

ni'o «lu ja'a go'i —sei la cpitepygau cu cusku— .i je mi ckire fi lo nu mi marji lo sudysrasu gi'e na ka'e frili selxai .i zasti fa lo xlamau be lo nu cpitepygau li'u»

 

 

 





lo se mànci te màkfa pe la .oz.
ni'o ni'o re pa mo'o
la cinfo cu binxo lo noltru be lo danlu

ni'o ba lo nu cnita cpare lo portcelanu bitmu kei lo litru cu zvati lo tolpluka gugde ne lo so'i cimtu'a zi'e noi se gacri lo clani je mabla srasu .i nandu fa lo nu cadzu se cau lo nu farlu lo cimde'u kevna .i ri'a bo lo srasu cu tai rotsu ja'e lo nu ky na ka'e se viska .i ku'i ta'i lo nu ralci cuxna lo ve klama cu snura cadzu co'u lo nu tolcliva lo sligu loldi .i ku'i bu'u ku lo gugde cu simlu lo ka cilce traji .i je ba lo clani je ta'inri'a nu cadzu pa'o lo demspa cu nerkla lo drata ricfoi noi lo tricu pe ke'a cu bramau je tolcitmau lo ro ba'o se viska

ni'o «lu lo vi ricfoi cu prane lo ka kukte —sei la cinfo cu xusra be fau lo nu gleki catlu lo sruri— .i mi no roi viska lo melbi zmadu stuzi li'u»

ni'o «lu si'au ta drimanku —sei la cpitepygau cu cusku— li'u»

ni'o «lu na sai go'i — sei la cinfo cu spuda— .i da'i mi djica lo nu xabju ti ze'a lo nu nunji'e .i ko ganse lo du'u ma kau ni lo ba'o sudbi'o pezli pe ni'a lo do jamfu cu ranti .e lo du'u ma kau ni ricfu je crino fa lo clika be fi lo vi tolci'o tricu .i ju'o no cilce danlu ka'e djica tu'a lo pukmau zdani li'u»

ni'o «lu ju'o cu'i lo cilce danlu ca zvati lo ricfoi —sei la .dorotis. cu cusku— li'u»

ni'o «lu ru'a go'i —sei la cinfo cu spuda— .i ku'i mi vi na viska su'o boi cy dy li'u»

ni'o lo gunma cu cadzu pagre lo ricfoi co'u lo nu ry cu manku dukse fi lo nu za'o cadzu .i la .dorotis. .e la .totos. .e la cinfo cu vrebi'o gi'e sipna ze'a lo nu la mudypre jo'u la cpitepygau cu zgana jundi tai lo fadni

ni'o ca lo nu cerni binxo cu di'a litru .i pu lo nu ba'o ve'u cadzu cu tirna lo dizlo selcmo be lo so'i cilce danlu .i la .totos. cu tepcmo milxe .i ku'i no lo drata cu terpa .i je ca'o klama fo lo xamgu se cadzu pluta co'u lo nu tolcliva lo tricu kalri noi lo su'o ki'o danlu pe lo ro tarmi ke'a jmaji .i zvati fa lo tirxu .e lo xanto .e lo cribe .e lo labno .e lo lorxu .e lo ro drata pe lo mivmu'e .i je ze'i lo mokca la .dorotis. cu terpa .i ku'i la cinfo cu ciksi lo nu lo danlu cu ca'o pensi'u gi'e casnu .i je cy fo lo selcmo fa'u sance cu djuno lo du'u dy se raktu lo barda

ni'o ca lo nu cy cu tavla kei so'o lo danlu cy co'a viska .i je suska fa lo nu lo barda casnu bo girzu cu smaji binxo tai lo nu lo makfa cu se pilno .i lo brarai be lo tirxu cu jbikla la cinfo gi'e cusku fau lo nu krobi'o:

ni'o «lu fi'o doi io noltru be lo danlu .i do klama ca lo mapti be lo nu damba lo mi'a bradi gi'e gasnu lo nu lo ro danlu pe lo ricfoi cu di'a panpi simxu li'u»

ni'o «lu ma do'o raktu —sei la cinfo cu smaji milxe cusku— li'u»

ni'o «lu ro mi'a se ckapa —sei lo tirxu cu spusku— tu'a lo vlile bradi poi pu za klama lo vi ricfoi .i barda carmi cizda'u .i simsa lo barda jukni poi se xadni da poi bradu'i lo xanto ku'o gi'e se tuple da poi cladu'i lo tricu stani .i se tuple lo bi tai clani tuple .i je fau lo nu cpare pagre lo ricfoi cu co'a jgari lo danlu lo pa tuple gi'e lacpu dy fa'a lo moklu noi bu'u ke'a cu citka dy tai lo nu lo jukni cu citka lo sfani .i na ku su'o mi'a snura .i ze'a bo lo bi'u nai vlipa danlu cu jmive .i je mi'a pu jmaji lo nuncasnu te zu'e lo nu jdice lo du'u mi'a mi'a ta'i ma kau kurji .i ca bo do mi'a jbikla li'u»

ni'o la cinfo cu ze'i pensi

ni'o «lu xu su'o drata cinfo cu zvati lo vi ricfoi —sei cy retsku— li'u»

ni'o «lu na go'i .i lo su'o cinfo pu zvati .i ku'i lo bi'u nai cizda'u ba'o citka ro boi cy .i ji'a no lo pu zvati cinfo cu jibni do lo kambra .a lo kamvirnu li'u»

ni'o «lu va'o lo nu mi selfamgau tu'a lo do bradi zo'u: xu do'o ba krobi'o fa'a mi gi'e tinbe fi mi poi noltru lo ricfoi —sei la cinfo cu te preti— li'u»

ni'o «lu mi'a ba gleki go'i —sei lo tirxu cu spuda— li'u» .i je lo ro drata danlu cu laucmo se pi'o lo tsali selcmo «lu .ai mi'a go'i li'u»

ni'o «lu lo do barda jukni ma zvati ca ku —sei la cinfo cu retsku— li'u»

ni'o «lu tu noi jbini lo cindu tricu —sei lo tirxu fau lo nu jarco se pi'o lo crane jamfu cu cusku— li'u»

ni'o «lu ko xamgu kurji lo vi pendo be mi —sei la cinfo cu cusku— .i se va'o bo mi ba zi klama gi'e damba lo cizda'u li'u»

ni'o la cinfo cu tolrinsa lo ri pendo gi'e jgira cadzu to'o te zu'e lo nu damba lo bradi

ni'o lo barda jukni cu sipna vreta ca lo nu la cinfo jy tolcri .i je jy se jvinu lo tai tolmelbi ja'e lo nu lo ra bradi cu gapru selfargau lo nazbi ri'a lo nu rigni .i lo tuple cu clani du'i lo se xusra be lo tirxu .i je lo xadni cu se gacri lo rufsu ke xekri kerfa .i se moklu lo barda pe lo kinli denci poi cladu'i lo remna jamfu .i ku'i lo stedu cu jorne lo plana xadni lo cnebo poi cinla dunli lo bifce xadmidju .i la'e di'u gasnu lo nu la cinfo cu te sidbo lo du'u ma kau xagrai lo tadji be lo nu gunta lo danlu .i ki'u bo djuno lo du'u lo nu damba dy ca lo nu sipna cu filmau lo nu co'e ca lo nu cikna .i la cinfo cu barda plipe gi'e prane cpanybi'o lo trixe be lo cizda'u .i ba bo la cinfo fau lo nu pa roi darxi fi lo ri tilju jamfu fi'o xarci lo kinli jgalu cu ka'arvi'u lo stedu be lo jukni lo xadni .i cy fi plipe gi'e catlu jy co'u lo nu lo clani tuple cu co'u desku noi ca ke'a cy djuno lo du'u jy morsi mulno

ni'o la cinfo cu xruti lo rickalri noi lo danlu pe lo ricfoi cu denpa cy bu'u ke'a cu jgira cusku:

ni'o «lu do na za'o nitcu lo nu terpa tu'a lo do bradi li'u»

ni'o ba bo lo danlu cu krobi'o fa'a la cinfo ku poi noltru dy .i je cy cu nupre lo nu ba xruti gi'e turni vau ca lo nu la .dorotis. cu snura klama la .kanzas.






lo se mànci te màkfa pe la .oz.
ni'o ni'o re re mo'o
lo gugde be la vonpre

ni'o lo vo litru cu pagre lo ve vimcu ricfoi fau lo nu snura .i je ly ca lo nu barbi'o lo manku cu ca'u viska lo nitsalpo cmana noi se gacri fe'e co'a lo galraipau fe'e co'u lo dziraipau lo barda ke rokci spisa

ni'o «lu ba nandu nu cpare —sei la cpitepygau cu cusku— .i ku'i mi'o nitcu lo nu zvabi'o lo ragve be lo cmana kei to'e ki'u nai li'u»


ni'o cy klama gidva .i je lo drata cu jersi .i xai tolcliva zei jibni lo pa moi be lo rokci ca lo nu tirna lo nu lo rufsu voksa cu krixa «lu ko klasti li'u»


ni'o «lu do me ma —sei la cpitepygau cu retsku— li'u»


ni'o ba bo lo stedu cu co'a dzaselji'u ga'u lo rokci .i je lo voksa cu cusku «lu lo vi cmana mi'a se ponse .i je mi'a na curmi lo nu da pagre cy li'u»


ni'o «lu ku'i mi'a pagre nitcu —sei la cpitepygau cu cusku— .i mi'a klama lo gugde be la vonpre li'u»


ni'o «lu ku'i .e'a nai do go'i —sei lo voksa cu spusku— li'u» .i je va stapa klama fi lo trixe be lo rokci fa lo cizra traji prenu be te rai lo ro ba'o se viska be lo litru


ni'o py mutce lo ka tordu gi'e rotsu kei gi'e se stedu lo barda noi pinta bu'u lo galraipau gi'e se sarji lo rotsu cnebo poi se cinje so'i da .i ku'i py no sai da se birka .i je la cpitepygau ca lo nu viska la'e di'u cu na xanka lo nu lo tai nonseldju danlu cu ka'e fanta lo nu cpare lo cmana .i se ki'u bo cusku «lu mi xenru lo nu na zukte lo se djica be do .i ku'i mi'a nitcu lo nu gapru lampagre lo do cmana .i ju do gleki la'e di'u li'u» .i je la cpitepygau cu virnu cadzu fa'a ca'u

ni'o fi'o sutra dunli lo nu lindi kei lo stedu be lo prenu cu fa'a ca'u zilce'a .i je lo cnebo cu tcena co'u lo nu lo stedu galraipau noi pinta cu janli lo midju be la cpitepygau gi'e gasnu lo nu cy fau lo nu so'i roi gunro cu fa'a ni'a farlu re'o lo cmana .i fi'o na ru'e sutra dunli lo nu klama kei lo stedu cu xruti lo xadni .i je lo prenu cu jursa cmila gi'e cusku «lu na frili dunli lo do se kanpe li'u»


ni'o lo clatce ke cmila sance cu se krasi lo drata rokci .i je la .dorotis. cu viska lo nu lo su'o panono nonselbirka me la mruli stedu cu sanli lo cmana mlana (to ti'a ro rokci pa boi my sy cu sanli toi)

ni'o la cinfo cu binxo lo ka mutce lo ka fengu lo nu cmila lo nu la cpitepygau cu se xlali .i je fau lo nu cmoni lo cladu noi se mirsna lo lidvru simsa cu bajra fa'a lo gapru be lo cmana


ni'o za'u re'u ku lo stedu cu sutra lo ka zilce'a .i je la cinfo cu binxo lo ka fa'a ni'a gunro lo cmana tai lo nu se janli lo xacycelboi


ni'o la .dorotis. cu fa'a ni'a bajra gi'e sidju la cpitepygau lo nu sa'irbi'o .i je la cinfo ku noi cinmo lo ka se cagna nalmli cu jbibi'o dy gi'e cusku «lu no da prali fi lo nu damba lo prenu pe lo cecla stedu .i no prenu ka'e fapro li'u»


ni'o «lu .ei mi'o va'o mo —sei dy retsku— li'u»


ni'o «lu ko klacpe la selna'i smani —sei la tinci mudypre cu stidi— .i do za'o zifre lo nu za'u re'u minde sy li'u»


ni'o «lu .i'a —sei dy spuda— li'u» .i je fau lo nu dasybi'o la solska mapku cu bacru lo makfa valsi .i la smani cu sutra du'i lo prula'i .i je ba zi lo so'u mokca lo mulno bende cu sanli ca'u la .dorotis.


ni'o «lu do mi'a ma minde —sei la smani noltrunau fau lo nu dizlo krobi'o cu te preti— li'u»


ni'o «lu ko mi'a bevri ga'u lo cmana lo gugde be la vonpre —sei lo nixli cu spuda— li'u»

ni'o «lu .ai gasnu —sei la noltrunau cu cusku— li'u» .i je ba zi bo la selna'i smani cu kavbu lo vo litru .e la .totos. lo birka gi'e to'o bevri voikla .i ca lo nu pagre lo gapru be lo cmana kei la mruli stedu cu se fanza mutce krixa gi'e cecla lo stedu lo galtu vacri gi'e ku'i na ka'e tcena la selna'i smani ku noi snura bevri la .dorotis. .e lo ri pendo ga'u lo cmana gi'e punji fi lo loldi bu'u lo melbi gugde be la vonpre

ni'o «lu ca ro re'u ka'e klacpe mi'a —sei lo jatna fi la .dorotis. cu cusku— .i co'o do'u .a'o do se zanfu'a li'u»


ni'o «lu co'o do'u ki'e sai —sei lo nixli cu spuda— li'u» .i je la smani cu galze'a ne'i lo vacri gi'e ba zi bo co'u se viska


ni'o lo gugde be la vonpre cu simlu lo ka ricfu gi'e gleki stuzi .i zasti fa lo so'i foldi co ma'urbi'o gurni pe to'e se cau lo xamgu se sefta dargu poi jbini lo foldi ku'o .e lo melbi ke cinje cmari'e noi lo tsali ke'a cripu .i lo bitmu .e lo zdani .e lo cripu zo'u: lo ro ri se cintypu'i lo carmi xunre pa'a lo nu se cintypu'i nu'i ge lo pelxu bu'u lo gugde pe la .uinkis. nu'u gi lo blanu bu'u lo gugde pe la maxpre .i la vonpre ku noi tordu joi plana zi'e noi simlu lo ka xendo cu dasni lo xunre noi carmi frica lo crino srasu .e lo pelxu gurni


ni'o la smani pu punji fi lo jibni be lo cange zdani .i je lo vo litru cu cadzu klama zy gi'e darxi lo vorme .i vy se kargau lo speni be lo te cange .i je ca lo nu la .dorotis. cu cpedu lo ka te dunda lo cidja kei lo ninmu cu dunda fi lo ro da fe lo xamgu vacysai noi vasru lo ci titpesxu .e lo vo titnanba .e lo kabri be lo ladru bei se va'u la .totos.


ni'o «lu ma ni darno la badydi'u be la .glindas. —sei lo verba cu cusku— li'u»


ni'o «lu na darno mutce —sei lo speni be lo te cange cu spusku— .i ko litru lo dargu be la snanu .i se va'o bo do ba za tolcliva by li'u»

ni'o lo gunma fau lo nu kirsku lo xendo ninmu cu za'u re'u co'a litru gi'e cadzu re'o lo foldi gi'e pagre lo melbi cripu vau co'u lo nu ca'u viska lo melbi mutce badydi'u .i ca'u lo vrogai cu zvati fa lo ci citno nixli noi dasni lo melbi ke xunre taxfu noi se korbi lo solji dasri .i je ca lo nu la .dorotis. cu jbibi'o kei pa boi ny fi dy cu cusku


ni'o «lu mu'i ma do klama la snanu gugde li'u»


ni'o «lu lo nu penmi la vrude termafyfe'i ku noi vi turni —sei dy spusku— .i .e'o do mi ty cu klagi'a li'u»

ni'o «lu ko mi jungau lo du'u ma kau do cmene .i se va'o bo mi ba te preti fo la .glindas. fi lo se du'u xu kau gy ba randa lo nu do penmi li'u» .i lo ro da cu cmene jungau .i je lo nixli sonci cu klama lo nenri be la badydi'u .i ba za lo su'o mokca sy xruti gi'e cusku lo se du'u la .dorotis. .e lo drata cu jai se curmi fai lo ka ba zi penmi





lo se mànci te màkfa pe la .oz.
ni'o ni'o re ci mo'o
la .glindas. no'u la vrude termafyfe'i
cu curmi lo se djica be la .dorotis.

ni'o lo gunma pu lo nu klama la .glindas. cu se klagi'a fi pa lo kumfa be la badydi'u be'o noi bu'u ke'a la .dorotis. cu lumci lo ri flira gi'e kompli lo ra kerfa .i je la cinfo cu desyvi'u lo pulce lo ra ne'okre .i je la cpitepygau cu tamgau lo xagrai lo sevzi .i je la mudypre cu spali lo ri tinci gi'e sabji lo ctile lo ra te jorne

ni'o lo gunma ca lo nu ro vo'a ka'e xamgu se jarco cu jersi lo sonci nixli se ka'a lo barda kumfa noi bu'u ke'a la termafyfe'i .glindas. cu zutse lo zirxunjme nolstizu

ni'o gy ge melbi gi citno vau te ga'a lo ra kanla .i lo kerfa be gy cu ricfu xunre skari gi'e flecu djine farlu lo janco .i lo taxfu cu curve blabi .i ku'i lo kanla be gy cu blabi .i je gy cu xendo catlu lo cmalu nixli

ni'o «lu mi se va'u do ka'e mo doi pe mi verba —sei gy retsku— li'u»

ni'o la .dorotis. cu te lisri fi lo mulno la termafyfe'i .i lo nu lo vilcarbi'e cu bevri la .dorotis. lo gugde pe la .oz .i lo nu dy co'a se slabu lo ri kansa pendo .i lo se manci selfri be xai

ni'o «lu lo mi balrai se djica —sei dy jmina cusku— cu nu xruti la .kanzas .i mu'i bo la fetfamti .em. cu ju'o jinvi lo du'u lo xlali mi pu selfri .i je la'e di'u ba gasnu lo nu .ebu dribi'o .i je va'o lo nu na ku lo se crepu pe lo ca nanca cu xagmau lo me lo prula'i moi zo'u ju'o la nakfamti .xenris. cu na ka'e xamgu renvi li'u»

ni'o la .glindas. crasa'obi'o gi'e cinba lo titla je gapselfa'a flira be lo prami je cmalu nixli

ni'o «lu .e'o lo do xendo risna cu se zandapma —sei gy cusku— .i mi birti lo du'u mi do ka'e jungau lo du'u ma kau tadji lo nu xruti la .kanzas. li'u» .i je ba bo jmina cusku «lu .i ku'i do va'o lo nu do xruti cu bilga lo ka dunda la solji mapku mi li'u»

ni'o «lu .i'a sai —sei la .dorotis. cu cusku— .i je'u my mi na za'o plixau .i je do va'o lo nu ponse cu kakne lo ka minde la selna'i smani ci roi ku li'u»

ni'o «lu .i je pe'i mi ba nitcu lo my te selfu ci po'o roi —sei la .glindas. cu cisma spusku— li'u»

ni'o la .dorotis. cu ba dunda la solji mapku gy .i je la termafyfe'i cu cusku fi la cpitepygau fe «lu do ba mo ca lo nu la .dorotis. ma'a ba'o cliva li'u»

ni'o «lu mi ba xruti la ri'ojme tcadu —sei cy spuda— .i mu'i bo la .oz. pu gasnu lo nu mi turni .i je lo prenu mi nelci .i pa po'o da se xanka mi gi'e nu ta'i ma kau klama lo bancu be lo cmana be la mruli stedu li'u»

ni'o «lu .ai mi se pi'o la solji mapku cu minde la selna'i smani lo nu bevri do lo balvrogai pe la ri'ojme tcadu —sei la .glindas. cu cusku— .i ki'u bo da'i xlali fa lo nu caurgau lo prenu lo tai se manci turni li'u»

ni'o «lu xu mi ja'a zilmanci —sei la cpitepygau cu retsku— li'u»

ni'o «lu do tolfadni —sei la .gindas. cu spusku— li'u»

ni'o gy fau lo nu selfarbi'o la tinci mudypre cu retsku «lu do mo ca lo nu la .dorotis. cu cliva lo vi gugde li'u»

ni'o my sa'orsa'i re'o lo ri ka'amru gi'e ze'i pensi .i ba bo my cu cusku «lu la .uinkis. pu xendo zei mutce mi gi'e djica lo nu mi uy cu turni kei ba lo nu la palci termafyfe'i pu mrobi'o .i mi nelci la .uinkis .i je mi va'o lo nu ka'e xruti la stici gugde cu zmanei no da lo nu ze'e turni uy li'u»

ni'o «lu lo re moi be lo mi se cpedu be fi la selna'i smani —sei la .glindas. cu cusku— cu nu sy do snura bevri lo gugde be la .uinkis .i lo do besna cu brame'a da'i lo me la cpitepygau moi .i ku'i do carmi zmadu je'u cy (to ca lo nu do xamgu se spali toi) .i je mi birti lo du'u do ba prije je xamgu turni la .uinkis. li'u»

ni'o ba bo la termafyfe'i cu catlu lo barda je se kaskre cinfo gi'e retsku «lu ca lo nu la .dorotis. ba'o xruti lo ri zdani zo'u: do mo li'u»

ni'o «lu ti'a lo cmana pe la mruli stedu —sei la mudypre cu spusku— cu barda ke tolci'o ricfoi .i je ro lo danlu poi bu'u xabju cu jdice lo du'u mi vo'a noltru .i da'i mi va'o lo nu ka'e xruti lo bi'u nai ricfoi cu bu'u gleki mutce lifri lo mi nunji'e li'u»

ni'o «lu .ai lo ci moi be lo mi se cpedu be fi la selna'i smani —sei la .gindas. cu cusku— cu nu sy do bevri lo do ricfoi .i ba ku zo'u .ai mi ki'u lo nu ba'o xaksu lo makfa pe la solji mapku cu dunda my la smani noltru te zu'e lo nu ri jo'u lo ri bende cu ba ze'e zifre li'u»

ni'o la cpitepygau .e la tinci mudypre .e la cinfo cu ca stace kirsku la vrude termafyfe'i lo ri te xendo .i je la .dorotis. cu cusku:

ni'o «lu ju'o do xamgu du'i lo nu do melbi .i ku'i do mi na xa'o jungau lo du'u ta'i ma kau xruti la .kanzas. li'u»

ni'o «lu lo do rijno skari cutci do ba bevri ga'u lo kutytu'a —sei la .glindas. cu spusku— .i da'i do va'o lo nu pu djuno fi lo cy se vlipa cu ka'e xruti lo do fetfamti .em. ca lo pa sai moi be lo djedi poi do zvati lo vi gugde ca ke'a li'u»

ni'o «lu ku'i va'o ku mi na te dunda lo mi se manci besna —sei la cpitepygau cu krixa— .i da'i mi zvati ze'a pi ro lo mi nunji'e lo zmufoi pe lo te cange li'u»

ni'o «lu .i je da'i mi na te dunda lo mi dirba risna —sei la tinci mudypre cu cusku— .i da'i mi sanli gi'e furtirtolcaubi'o vau bu'u lo ricfoi co'u lo fanmo be lo munje li'u»

ni'o «lu .i je da'i mi ze'e toldarsi —sei la cinfo cu cusku— .i je da'i no lo danlu pe lo ricfoi cu cusku lo xendo valsi mi li'u»

ni'o «lu pi ro la'e di'u jetnu —sei la .dorotis. cu cusku— .i je mi gleki lo nu mi pu plixau lo vi xamgu pendo .i ku'i ca lo cabna noi nu ro boi py cu tolcau lo se djica traji gi'e gleki lo nu ji'a ponse lo se turni tumla zo'u: mi jinvi lo du'u .ei mi xruti la .kanzas. li'u»

ni'o «lu lo rijno skari cutci —sei la vrude termafyfe'i cu vlipa lo banli .i pa lo cinri traji selkai be cy cu ka ka'e bevri do ro stuzi pe lo munje se zu'e lo ci nu stapa .i je ro lo ci nu stapa cu se ditcu lo nu kalgaisligau .i do jai sarcu fai lo ka po'o ci roi jalsimgau lo cucti'e gi'e minde lo cutci lo nu bevri do lo do se djica

ni'o «lu va'o lo nu jetnu zo'u: —sei lo verba cu gleki cusku— mi ba zi cpedu fi cy fe lo nu bevri mi la .kanzas. li'u»

ni'o vy srugau lo birka lo cnebo be la cinfo gi'e cinba cy fau lo nu toljursa catke lo ri barda stedu .i ba bo vy cu cinba la tinci mudypre ku noi ca'o klaku tai lo tamsmi poi mutce lo ka ckape lo ri terjo'e .i ku'i vy pamjai lo ranti je terse'a xadni be la cpitepygau se ba'i lo nu cinba lo se cintypu'i stedu be cy kei gi'e facki lo du'u vy ji'a klaku fi lo vi seldri nu cliva lo ri prami pendo

ni'o la .glindas. ku no'u la xamgu cu stapa klama fi lo ri zirxunjme nolstizu te zu'e lo nu tolrinsa cinba lo cmalu nixli .i je la .dorotis. cu kirsku gy lo nu pu tai xendo la .dorotis. .e lo ri pendo

ni'o la .dorotis. cu ca co'a salci jgari la .totos. lo birka .i je ca lo nu ba'o ro re'u tolrinsa cu ci roi jalsimgau lo trixe be lo cutci fau lo nu cusku:

ni'o «lu ko mi bevri lo zdani ju'e la fetfamti .em. li'u»

ni'o ba zi lo mokca dy carna pagre lo vacri .i tai sutra ja'e lo nu viska ja ganse no na'e bo lo brife poi siclu re'o lo kerlo

ni'o la rijno cutci cu so'u ci roi stapa .i je ba bo la .dorotis. cu tai suksa mu'usti ja'e lo nu pu lo nu djuno lo du'u zvati ma kau cu so'o roi gunro lo srasu

ni'o ku'i ba lo barda dy tsebi'o gi'e ru'u catlu

ni'o «lu ue sai —sei dy krixa— li'u»

ni'o ki'u bo dy zutse lo ganra sastu'a pe la .kanzas. .i je ca'u vi zvati fa lo cnino ke cange zdani poi la nakfamti .xenris. ba lo nu lo vilcarbi'e cu darbei lo tolci'o cu zbasu .i la nakfamti .xenris. ca'o ladycpa lo bakni bu'u lo cagdalstu .i je la .totos. pu plipe fi lo birka be dy gi'e ca ca'o bajra fa'a lo cagdalstu fau lo nu carmi gercmo


ni'o la .dorotis. cu sa'irbi'o gi'e sajbi'o lo du'u dasni lo po'o smoka .i ki'u bo la rijno cutci pu sepybi'o ca lo nu vofli pa'o lo vacri kei gi'e ze'e seltolcrinalka'e bu'u lo cantu'a

 







lo se mànci te màkfa pe la .oz.

ni'o ni'o re vo mo'o
nu di'a zdazva

ni'o la fetfamti .em. cu pu zi barkla lo zdani te zu'e lo nu jaursabji lo kobli kei ca lo nu fa'a ca'u catlu gi'e viska lo nu la .dorotis. cu fa'a bajra

ni'o «lu doi pe mi dirba verba —sei fy krixa be fau lo nu birjai lo cmalu nixli gi'e cinba dy boi pi ro lo flira— .i do klama fi ba'e ma li'u»


ni'o «lu lo gugde pe la .oz. —sei la .dorotis. cu junri cusku— .i je zvati ti fa la .totos. ku ji'a .i ui sai doi fetfamti .em .i mi tai gleki lo nu di'a zdazva li'u»



fa'o